Yeremia 10 - The Holy Bible In Alur (Lur) Revised Orthography

Mungu Mandha ku mungu m’araga

¹ Wuwinj lembe ma Yehova yero iwu, E ot mir Israel:

² Yehova wacu kumae, Kud wuponj ng’eyo yo mi thek, man iwu kud uwang’ lu kum giranyutha m’i polo; kum i thek uwang’ lii i kumgi.

³ Kum kura mi kodhidhanu gi gin ma ie nanu; kum ng’atu acel utong’o yen kud i luli, en e tic m’i cing’ jatic ku lei.

⁴ Giruke ku mola ma tar man ku mola ma kwar; gitwie ku musumali ku nyondro, kara kud eyengre.

⁵ Gi calu thith, mi tic m’aloka, man giweco ngo: juting’ogi ating’a, kum gicopo wotho ngo. Kud wulworgi; kum gicopo timo gin ma rac ungo, kadok timo ber de mbe i igi.

⁶ Ng’atu moko mbe ma calu in, E Yehova; in i dit, man nyingi dit i tego.

⁷ Ng’a ma kulwori ngo, E Ubimo mi theki? kum maeni maku in; kum i kind jurieko ceke mi thek, man i bedo migi ceke mi ker, ng’atu moko mbe ma calu in.

⁸ Ento gi calu lim man kitgi mbe karacelo: ponji mir ayi gin m’acwia! en e dundyen kende.

⁹ Mola ma tar ma jufodo ni atangla nuti, ma jukelo kud i Tarcic, man mola ma kwar kud i Ufaz, tic pa jabodho man m’i cing’ jathiedh mola ma kwar; m’ulweku man uluga mi kendi migi; kagi ceke gi tic mi jurieko.

¹⁰ Ento Yehova en e Mungu mandha; en e Mungu ma kwo, man Ubimo mi nja: ng’om yengre ni kwinyo pare, man thek copo ciro ng’ecwiny pare ngo.

¹¹ Wubiwacu igi kumae nia mungu m’ucwio polo ku ng’om ungo, maeni birwinyo kud i ng’om, man kud i the polo.

¹² Etimo ng’om ku tego pare, eketho ng’om ucungo ku rieko pare, man erieyo polo ku ng’eyothelembe pare.

¹³ Kinde m’ewodho dwande, woi mi pi nuti i polo, man eketho afuru idho malu kud i kajik mi ng’om; etimo lukoth ni koth, man ewodho yamu woko ku i kakanpiny pare.

¹⁴ Ku ba dhanu ku ba dhanu ng’atuman udoko calu lim man umbe ng’eyong’ec; ku ba jathiedh mola ma tar ayi gin m’acwia m’ang’ika pare nyayu lewic i wie; kum ayi gin m’acwia m’atwaga pare en e ndra, man yuyo moko mbe i igi.

¹⁵ Gi gin ma ie nanu, gi tic mir abombi: i nindo mi lieu migi gibirwinyo.

¹⁶ Makapiny pa Yakobo calu maeni ngo; kum en e ma kwong’a mi gin ceke; man Israel en e suru mir aba pare: nyinge Yehova mir udul.

Yuda Doko ni Uvuru

¹⁷ Cok jamni peri kud i ng’om E in m’ibedo i atiek mir ali.

¹⁸ Kum Yehova wacu kumae, Nen, abicanyu ju m’ubedo i ng’om woko i nindo maeni, man abisendogi, kara ginwang’e.

¹⁹ Can i wia kum rem para mire! lero para rac dit: ento awacu kumae, Andha maeni en e can para, man maku acire.

²⁰ Hema para nyothre, man thol para ceke cot: nyithindha ai woko kud i bang’a, e gimbe: ng’atu moko mbe m’uguro hema para kendo, man m’uting’o bongu m’ang’aba para malu.

²¹ Kum jukwac udoko va lim, man gipenjo ba Yehova ngo: kum kumeno lembe migi bedo miero ngo, man udul rombe migi ceke lal.

²² Dwal mi rwonglembe, nen, ebino, man woi ma dit kud i ng’om ma yor ariwa ma malu, kara udwok adhura mi Yuda ni uvuru, ni kabedo mir utho.

²³ E Yehova, ang’eyo nia yo mi dhanu en e i ie gire ngo; telo wi dakutielo pare mbe ba dhanu ma wotho.

²⁴ E Yehova, ponja, ento ku mukero; ku ng’ecwiny peri re ngo, imaru dwoka mananu.

²⁵ Konj kwinyo peri woko wi thek m’ung’ei ngo, man wi wat ma lwong’o nyingi ngo; kum ginyotho Yakobo, eyo, ginyothe man gidare, man gidwoko kabedo pare ni uvuru.