Yakobo 5 - The Holy Bible In Alur (Lur) Revised Orthography

¹ Aeno dong’ kawono, wu julonyo, wuywaki wugoi nduru de kum masendi mu ma biwok i kumwu.

² Jupiny mu nyothre, kendi mu de ungulu camu.

³ Mola mu ma kwar ku mola mu ma tar de munyali camu: munyaline bibedo ni giranyutha i kumwu, man ebicamu kumwu pami mac. Wukanu piny m’akana mu i dhu kajik mi ng’om.

⁴ Nen, sukulia mi jutic m’unyaru i podho mu, ma wutwonogi kud azindi, ubeywak: man ywak mi ju m’unyaru mondo i ith Rwoth mir udul.

⁵ Wubedo abeda i ng’om, wunwang’u mutoro mu de; wucamu ma cwinywu kwio i ceng’ mi nek.

⁶ Wugonjo ng’atu ma pwe, wunege de; en de egut iwu ngo.

Twiocwiny ku Rwo

⁷ Ka kumeno wutwi cwinywu, umego, cil i bino pa Rwoth. Nen, jatipodho bekuro nying’ cam ma pire tek mi ng’om, m’etwio cwinye i kume, cil ma koth ma kwong’a ku macen de bicwi i wie.

⁸ Wun bende dong’ wutwi cwinywu; wuketh adundewu nyang’: kum bino pa Rwoth udhingo.

⁹ Umego, kud wung’ur kum juwedu ma ng’atuman ung’ur kum wadi man kum wadi, kara ku jupok lembe i wiwu: nen, japoklembe cungo dhugola.

¹⁰ Umego, wuting’ jubila ma giyero lembe ku nying Rwoth ni por mi masendi ku mi twiocwiny de.

¹¹ Nen, walwong’ogi jumugisa gi ju ma giciro cir: wudaru winjo pi twiocwiny pa Yob, man wudaru neno kajik lembe pa Rwoth, maram Rwoth e won ngisi, ku kisa bende.

¹² Ento ma sagu wi gin ceke, juwada, kud wukwong’ kwong’, kadi ku polo, kadok ku ng’om, kadok ku kwong’ mange de: endre wuwek eyo mu bed ndhu ni eyo, man ungo mu de ubed ndhu ni ungo; kara pokolembe kud upodh i wiwu.

¹³ Ng’atu moko m’i kindwu besendre? wek erwo. Ng’atu moko anyong’a benege? wek ewer wer mi pak.

¹⁴ Ng’atu m’i kindwu kume lithi? wek elwong’ judongkanisa: man wek girwo pire, giwir mo i kume i nying Rwoth:

¹⁵ man rwo ma ku yioyic bikeyo kum ng’atu ma kume lith, e Rwoth biting’e malu; man ke tek edubo lembe moko, jubiweko pire woko ire.

¹⁶ Ka kumeno dong’ wutuc dubo mu ng’atuman utuc ni wadi man ni wadi, man wurwo ma ng’atuman urwo pi wadi man pi wadi, kara kumwu kei. Kwac pa ng’atu ma pwe yire dit i ticne.

¹⁷ Elia en e ng’atu ma ku kum calu wan, man erwo ma tek ya koth kud ucwi; e koth ucwi ngo i ng’om rundi adek ku dwi abusiel.

¹⁸ Man ekwayu kendo; e polo coro koth, ng’om de cego nyinge.

¹⁹ Juwada, tek ng’atu moko m’i kindwu wingre kum lemandha, e ng’atu moko dwoke;

²⁰ wek eng’ei, nia ng’atu m’uloko jadubo kud i yo ma nwang’u ekier i ie, ebibodho kwo acel kud i tho, man ebiumo udul dubo dupa.