Yakobo 4 - The Holy Bible In Alur (Lur) Revised Orthography

¹ Ali m’i kindwu giai kani ku rop bende? giai ba gin maeni ngo, cil bang’ awanya kumwu m’ubekiedo i wathkumwu?

² Awanya ma rac ubenegowu, ere wubedo kudo ngo: wunego nek, man wuketho cwinywu hai kum piny, ento enwangre iwu ngo: wukiedo lwiny wutimo ali de; e wubedo kudo ngo, kum wupenjo ngo.

³ Wupenjo, man wugamu ngo, kum wupenjo aleng’a, kara wulale i awanya mu.

⁴ Wun wu weg gier, wung’eyo ngo nia bedo jarimb ng’om en e adegi ni Mungu? Kumeno ng’atu ma tek uyenyo ebed jarimb ng’om nwang’u ekethre gire ni jadegi pa Mungu.

⁵ Kadi iwu pido ya nyo lembagora pa Mungu yero mananu? Cwiny maeno m’eketho ubed i iwa ava ubenege cil ku kumira?

⁶ Ento emedo bero mange. Kum kumeno lembagora pa Mungu wacu kumae, Mungu gut kum jukuhaya, ento emio bero ni ju ma mol.

⁷ Dong’ wumond kumeno ni Mungu: ento wugut ni wonabali, e ebiringowu.

⁸ Cor i vut Mungu, man ebicoro i vutwu. Wulog cingwu, wu judubo; man wulwok adundewu, wu ju ma pidoiwu ario.

⁹ Dong’ wusendru, can unegwu de, man wuywaki: wek ng’iero mu dok ni can, mutoro mu de ni adieng’acwiny.

¹⁰ Dong’ wujwigru giwu i wang’ Rwoth, man ebiyungowu.

Poko Lembe pa Wedu

¹¹ Kud wuyer nying juwedu ma ng’atuman uyer nying wadi man nying wadi, umego. Ng’atu m’uyero nying umego, kadi m’upoko lembe p’umin, nwang’u eyero kum cik, man epoko lembe wi cik: ento tek ipoko lembe wi cik, meca in i jatim cik ungo, ento in i japoklembe.

¹² Ng’atu acel kende ma en e jang’olcik man japoklembe, e en nini e m’ecopo laru m’ecopo nyotho bende: ento in i ng’a m’ipoko lembe pa wedu e?

Kud Iluli pir Urwo

¹³ Aeno dong’ kawono, wu ju ma wuwacu kumae, Tinuni kadi urwo wabicidho i adhura ma nyo, wabibedo keca de rundi acel, wabiloko kuloka, e wabigamu jupinyne:

¹⁴ ento wung’eyo ngo maram urwo bibedo ko. Kwo peri en e girang’o? kum wun wu lietho ma duny, ma wok nyaswaswa ci, e elund elal woko.

¹⁵ Maku wuwac kumae, Tek Rwoth uyio wabibedo kwo, man wabitimo gin mae kadi maeno.

¹⁶ Ento kawono wuheru i alule mu: ahaye ma kumeno ceke e rac.

¹⁷ Kumeno tek ng’atu m’ung’eyo timo ber, e kan etime ngo, meca edoko ni dubo ire.