Tito 1 - The Holy Bible In Alur (Lur) Revised Orthography

Moth

¹ Paolo, jamiru pa Mungu, man jakwenda pa Yesu Kristu calku yioyic mi ju ma Mungu goyo nying’gi, man ng’eyong’ec mi lemandha ma en e calku bedo ma ayi Mungu ni i kume,

² i genogen mi kwo ma rondo ku rondo, ma Mungu, ma kucop cwayu ndra ngo, ung’olo por yang’ con;

³ ento enyutho lembe pare i nindo pare gire i lemkwenda, juketho lembene i kora calku lembang’ola pa Mungu ma Jalar mwa;

⁴ ni Tito, ma nyathin para mandha i yioyic m’uribowa: Bero ku kwiocwiny m’uai ba Mungu ma Wego ku Kristu Yesu ma Jalar mwa.

Tic pa Tito i Krete

⁵ Kum lembe nini aweki i Krete, kara iyik gin m’urem, man iketh judongo ku bang’ adhura ceke, calu ang’olo iri;

⁶ tek ng’atu moko adote mbe i wie, en e nico ma won dhaku acel, ma won nyithindho m’uyio, ma judotogi ngo nia gi jurop kadi juco.

⁷ Kum jalieu kobedo ma adote mbe i wie be, calu jakurpiny pa Mungu; udhuko ngo, jang’ecwiny ma vur vur de ngo, jakwakwa ma wi pigulok ungo, jagoc ungo, jamar kuloka ma rac ungo;

⁸ ento ebed ng’atu ma gwoko welo ber, ma jamar gin ma ber, ma pidoie nger, ma pwe, ma leng’ de, ma kwere gire;

⁹ ma cwinye cungo ki kum lembe mandha ma calku lemponji, kara ecopo juko juk ku ponji m’ulil, ecopo tuco wi jupiem bende.

¹⁰ Kum dhanu ma juco gi dupa ma gi juwec mananu ku weg abombi, ju ma gi weg yaa ci dit ma kumeno,

¹¹ ma jukojumi dhoggi be; ku ju ma giredho udi kpo, ma giponjo gin ma maku ku giponji, ni kuloka ma rac.

¹² Ng’atu acel m’i kindgi gigi, en e jabila migine, ewacu kumae, Jukrete gi jundra thiri thiri, gi yedi ma rac, gi jumbo ma kutim tic ungo.

¹³ Lembatuca maeni en e andha. Kum kum lembe nini jukgi ku kwinyo, kara gibed i yioyic m’ulil,

¹⁴ ma gikuciko ithgi ngo kum uda mi Juyahudi, ku lembang’ola mi dhanu m’ukier kum lemandha.

¹⁵ Gin ceke leng’ ni ju ma leng’: ento ni ju m’ucido ma juyic ungo re gin moko mbe ma leng’ igi; ento pidoic migi ku pidocwiny migi cido.

¹⁶ Gituco nia ging’eyo Mungu; enke ku tic migi gikwere, gi ju ma judagu, man juco, man ku ba tic ma ber ceke en e gin moko ngo igi.