Tic Mi Jukwenda 25 - The Holy Bible In Alur (Lur) Revised Orthography

Paolo Upenjo ba Kaisari

¹ Ka kumeno, ka Festo wok i ng’ombuno, yo ng’ei ceng’ adek eai Kaisaria eidho malu Yerusalem.

² Man julam ma dongo ku judongo mi Juyahudi gipiko ie lembe kum Paolo; man gikwaye,

³ gipenjo bero igi i kume, y a eore Yerusalem e gipido lembe ya gibinege i yo.

⁴ Ento Festo loko lembe, nia Paolo jubekure Kaisaria, nia en de fodi nyanok ebidok kuca.

⁵ Ewacu kumae, Ka kumeno dong’ jutego m’i kindwu walor piny wakugi, man tek gin moko ma rac ni i ng’atuno, wek gidote.

⁶ E kan evuto i kindgi ma sagu ceng’ abora kadi ceng’ apar de ngo, eloro piny Kaisaria; e urwone ejany wi kom mi pokolembe, eng’olo de ya jukel Paolo.

⁷ E kan ewok, Juyahudi ma giai Yerusalem giloro piny gicungo gitieke, gikelo acukadhok dupa ma rac de i wie ma gicopo ketho ngo ya jung’ei nia en e andha;

⁸ nie Paolo yero lembe pare kumae, Kadok kum cik mi Juyahudi, kadi kum hekalu de, kadi kum Kaisari de, adubo lembe ki ngo.

⁹ Ento Festo, m’uyenyo ya Juyahudi gifoye, edwoko lembe ni Paolo ewacu kumae, Iyenyo icidh i Yerusalem e ka jubicipoko lembe peri mi gin maeni i wang’a kuca?

¹⁰ Ento Paolo wacu ku mae, Acungo wang’ kom mi pokolembe pa Kaisari, ka ma maku jupok ie lembe para: ni Juyahudi atimo gin moko ma rac ungo, calu in bende ing’eyo cu.

¹¹ Ka kumeno tek an a jadubo, man atimo gin moko ma romo ku tho, akwero ngo ya atho; ento tek gin maeni andha ngo ma joni gidota ko, ng’atu moko mbe ma copo mia igi. Ayenyo ndhu ba Kaisari.

¹² Ka kumeno ka Festo, gipido lembe giku dilo, elund eloko lembe kumae, Iyenyo ba Kaisari: ba Kaisari ibicidho.

Jukelo Paolo i Wang’ Agripa ku Berenike

¹³ Nie ka ceng’ moko kadhu, Agripa m’ubimo giku Berenike de giwok Kaisaria, man gimotho Festo.

¹⁴ Man ka girio kuca ceng’ dupa, Festo pedho lembe pa Paolo i wang’ ubimo, ewacu kumae, Nwang’u ng’atu moko nuti ma Feliki weke jakol;

¹⁵ pi ng’atuni, kan ani i Yerusalem, julam ma dongo ku judongo mi Juyahudi giyero pire ira, gipenja ya apok lembe pare.

¹⁶ Aloko igi lembe, nia en e kura mi Jurumi ngo ya juwodh ng’atu moko, ma fodi ng’atu ma judote gikunendri ku wang’gi ngo, ma fodi jukuyio ngo de ya eyer pi lembe ma judote ko.

¹⁷ Ka kumeno ka gicoko dhoggi keni, agalu ngo, ento urwone ajany wi kom mi pokolembe, man ang’olo ya jukel ng’atuno.

¹⁸ Pi ng’atuno, ka weg adote pare gicungo, gikelo adote mi gin ma rac ungo calu m’awacu nyo:

¹⁹ ento gibedo ku penji moko i kume pi kisoma migi gigi, man pi Yesu moko, m’utho, e ma Paolo wacu nia ebedo kwo.

²⁰ An de, kum ang’eyo ngo maram juluro ko thelembe maeni, apenje tek eyenyo eci Yerusalem ka ma jubipoko ie lembe mi gin maeni.

²¹ Ento ka Paolo yenyo jugwoke ni pokolembe pa Augusto, ang’olo ya jugwoke maram abiore ko ba Kaisari.

²² Man Agripa wacu ni Festo kumae, An bende ayenyo awinj ng’atuno an. Ewacu kumae, Urwo ibiwinje.

²³ Ka kumeno urwone, kan Agripa wok giku Berenike de, kud ayunga ma dit, gimondo de ka ma juwinjo ie lembe ku jego ma dit ku judongo ma i adhura de, e Festo ng’olo ya jukel Paolo i ie.

²⁴ E Festo wacu kumae, Ubimo Agripa, ku dhanu ceke ma wanuti wakudu kakeni de, wuneno ng’atu maeni, ma udul Juyahudi ceke giyero pire ira, kud i Yerusalem kuni bende, ma gibekok akoka ya maku kud ebed kwo kendo.

²⁵ Ento anwang’u nia etimo gin moko ngo ma romo ku nek: man kum eyenyo en bang’ Augusto akeco ya aore.

²⁶ Pi ng’atuno abedo ku gin moko ngo ma cu m’agor ni rwoth para. Kum kumeno akele woko i weng’wu, ndhu i weng’i, ubimo Agripa, kara, yo ng’ei titine, abed ku gin moko m’agor.

²⁷ Kum kud i bang’a emaku piny ungo, nioro jakol, ma jukunyutho pir adote mi kume ngo.