Tic Mi Jukwenda 10 - The Holy Bible In Alur (Lur) Revised Orthography

Petro giku Kornelio

¹ Nwang’u ng’atu moko nuti i Kaisaria, ma nyinge Kornelio, en e jego mir ungu asikari ma julwong’o udul asikari mi Juitaliano,

² en e jabero, en e ng’atu ma lworo Mungu de ku juode ceke, m’ebedemio giramia dit ni dhanu, ebederwo ni Mungu de thiri thiri.

³ Eneno ku ginmawokiwang’ngbeng’, nwang’u ene calu saa mir abung’wen mi ceng’, malaika pa Mungu bino i bang’e, ewacu ire kumae, Kornelio.

⁴ En de, kan enene tel, e lworo make, ewacu kumae, Girang’o, Rwoth? Man ewacu ire kumae, Rwo peri ku giramia peri giidho malu gibedo ni poi i wang’ Mungu.

⁵ Kawono dong’ ior dhanu i Yopa, gici gigam Simon, ma julwong’o Petro:

⁶ ebedo ku Simon moko ma jabodho mir adila, ma ode ni dhu nam.

⁷ Ka malaika m’uweco i bang’e ai, elwong’o jutic pare ario m’i ot, kud asikari ma lworo Mungu ma kind ju ma kuro kume thiri thiri;

⁸ e kan eyero gin ceke igi, eorogi i Yopa.

⁹ Nie urwone, ka gibecidho i woth migi, man gidhingo adhura de, Petro idho malu i ot nirwo, calu saa mir abusiende:

¹⁰ e kec umaku nege, man eyenyo ecam: ento kinde ma gibeyiko cam, e piny urwinyo kude biti;

¹¹ man eneno polo yabre, e gin moko beloro calu bongu ma dit, ma julure ku gunde ang’wen i ng’om:

¹² ma ie ju kwond yedi ceke ma tiendgi ang’wen ang’wen ku gin ma lak i ng’om de ku winyo m’i lietho bende.

¹³ E dwal uwok i bang’e kumae, Ai malu, Petro; ineg icam.

¹⁴ Ento Petro wacu kumae, Kumeno ngo, Rwoth; kum gin ma swa ku m’ucido de fokacamu ki ngo.

¹⁵ Dwal uwok i bang’e kendo mir arionde kumae, Gin ma Mungu lonyo kud idwoke ni gin ma swa.

¹⁶ Gin maeni timbre wang’ adek: e ndhu ndhu nica jugamu jamblur nica i polo.

¹⁷ Nie kinde ma Petro ie pido dit pi ginmawokiwang’ nia nyo thelembene nik ang’o, nen, dhanu ma Kornelio oro, ma gipenjo ka ot pa Simon, gicungo dhugang’,

¹⁸ man gilwong’o gipenjo tek Simon ma julwong’o Petro bedo keca.

¹⁹ E kinde ma Petro bepido pi ginmawokiwang’, Tipo wacu ire kumae, Nen, dhanu adek gibeyenyi.

²⁰ Ento ai malu, ilor piny, wuci wukugi, cwinyi kud ubed jiji: kum aorogi an.

²¹ E Petro loro ba joca, ewacu kumae, Nen, an a ng’atu ma wubeyenyo: kum kumeno wubino kum lembang’o?

²² Giwacu kumae, Kornelio ma jego, ng’atu ma pwe man ng’atu ma lworo Mungu, pire ber de ba thek dho mi Juyahudi, malaika ma leng’ upoye ya eor julwong’i ibin i ot pare, ewinj lembe i beng’i de.

²³ E ka kumeno elwong’ogi i bang’e man emio igi kagonjo. E urwone eai malu gicidho gikugi, e umego kucel ma i Yopa de gicidho gikugi.

²⁴ Urwone gimondo i Kaisaria. Nwang’u Kornelio bekurogi, ku jupagi ku jurimbe de m’elwong’ogi gicoko dhoggi karacelo.

²⁵ E kan etimbre nia Petro mondo, Kornelio girombo gikude, e epodho piny the tiende, man erwo ire.

²⁶ Ento Petro ting’e malu, ewacu kumae, Cungi; an de an a dhanu bende.

²⁷ E ka gibeweco gikude emondo, enwang’u dhanu dupa de gicokri karacelo:

²⁸ man ewacu igi kumae, Wun de wung’eyo giwu nia cik uyio ngo ya ng’atu ma Jayahudi ribre kadi ubin ba ng’atu ma Thekdhanumange; ento Mungu nyutho ira nia kud alwong’ ng’atu moko nia dhanu ma swa kadi m’ucido de:

²⁹ kum kumeno abino ku piem ungo ka julwong’a. Die apenjowu pirang’o wulwong’a.

³⁰ E Kornelio wacu kumae, Ceng’ ang’wen m’ukadhu dre unyoni, abekwiro saa mir abung’wende mi rwo i ot para; nen, ng’atu moko cungo i wang’a ku kendi m’urieny,

³¹ man ewacu kumae, Kornelio, rwo peri winjre giramia peri de gibedo ni poi i wang’ Mungu.

³² Ka kumeno or juci i Yopa, julwong’ Simon, ma julwong’o Petro bin i beng’i; ebedo i ot pa Simon ma jabodho mir adila, dhu nam.

³³ Ka kumeno aoro dhanu i beng’i mor mor; man itimo ber nia ibino. Nie ka kumeno wan ceke wanuti keni i wang’ Mungu, kara wawinj lembe ceke ma Rwoth ung’olo iri.

Petro Ponjo i Ot pa Kornelio

³⁴ E Petro alu dhoge, ewacu kumae, Ang’eyo andha nia dhanu bedo tung’ tung’ ungo i wang’ Mungu:

³⁵ ento i thek ceke ng’atu m’ulwore, m’utimo bedopwe de, e eyie.

³⁶ Lembe ma yang’ eoro ni nyithindho pa Israel m’eyero lembanyong’a mi kwiocwiny kum Yesu Kristu (en e Rwoth mi ceke)

³⁷ lembe nini wung’eyo giwu, ma jurweyo cil i Yahudi ceke, uthekre i Galilaya, yo ng’ei baputisi ma Yohana yero;

³⁸ en e Yesu ma Nazareti, maram Mungu wire ko ku Tipo Maleng’ ku tego bende: m’ebedewotho ko awotha ku timo ber, ku keyo kum dhanu ceke ma wonabali voyogi; kum Mungu ni kude.

³⁹ Wan de wa jumulembe mi gin ceke m’etimo i ng’om mi Juyahudi, kud i Yerusalem; en ma ginege bende, giliere kor yen.

⁴⁰ En ma Mungu ting’e i ceng’ mir adege, emie y a junyuthe,

⁴¹ ni dhanu ceke re ngo, ento ni jumulembe ma Mungu lar ugoyo wigi, en e wan, ma wacamu wamadhu de wakugi ku yo ng’ei cer pare ma kind ju m’utho.

⁴² Man eng’olo iwa ya wayer ni dhanu, man watuc nia maeni en e ng’atu ma Mungu ketho ya ebed japoklembe mi ju ma kwo ku ju m’utho bende.

⁴³ Jubila ceke ginyutho pire, nia ni kum nyinge ku ba dhanu ceke m’uyio ire ebinwang’u ruc mi dubo.

Thekdhanumange Jolo Tipo Maleng’

⁴⁴ E kinde ma Petro beyero lembe nini, Tipo Maleng’ ucore wi dhanu ceke ma giwinjo lembe nini.

⁴⁵ E ju ma weg yaa ma giyio igi wang’ lii, kagi ceke ma gibino giku Petrogi, kum giramia ma Tipo Maleng’ ukonjre wi Thekdhanumange bende.

⁴⁶ Kum giwinjo gibeweco ku dhok mange, giyungo ko Mungu. E Petro lund uloko lembe kumae,

⁴⁷ Ng’atu moko copo cero pi, nia ku jumi baputisi ni joni, ma gijolo Tipo Maleng’ calu wani?

⁴⁸ E eng’olo ya jumi igi baputisi ku nying Yesu Kristu. E gilund gikwaye ya eri i bang’gi ceng’ moko.