Thangambere 8 - The Holy Bible In Alur (Lur) Revised Orthography

Kajik mi Pi M’ucoro Ng’om

¹ E Mungu poi kum Noa, man pi yedi ceke, man pi lim ceke ma gini kude i avurne: man Mungu timo yamu ukadh wi ng’om, e pige dwono;

² kulo bende mi nam ku wang’ polo de gicikri, man koth ucere kud i polo;

³ e pi dok kud i ng’om thiri thiri: man yo ng’ei ceng’ dak acel ku pier abic pi dwono.

⁴ Man avur ubedo wi gudi mir Ararat i dwi mir abirone, i ceng’ mir apar wi abirone mi dwije.

⁵ E pi cikudwono thiri thiri maram dwi mir apaje wok ko: i dwi mir apaje, i ceng’ ma kwong’ane mi dwije wi gudi nen.

⁶ Man etimbre ka ceng’ pier ang’wen uthum, nia Noa yabu wang’ avur m’etimo:

⁷ man eoro ngoro woko, e ecidho kun ku kun, cil ma pi dwono ko kud i ng’om.

⁸ Man eoro akuru woko kud i bang’e, kara enen tek pi dwono kud i wang’ ng’om;

⁹ ento akurune nwang’u yom ungo mi tiende, man edok i bang’e i avur; kum pi ni i wang’ ng’om ngung’: man erieyo cinge, egame de, man ekele i bang’e i avur.

¹⁰ Man ebedo kendo ceng’ abiro mange; man eoro akuru kendo ku i avurne;

¹¹ man akurune dwogo i bang’e uthieno; man, nen, ith ulam ma jujaku ni i dhoge: kum kumeno Noa ng’eyo nia pi dwono kud i ng’om.

¹² Man ebedo kendo ceng’ abiro mange, man eoro akurune; e edwogo kendo ngo i bang’e.

¹³ Man etimbre i rundi dak abusiel kud acel, i dwi ma kwong’ane, i ceng’ ma kwong’ane mi dwije, pi dwono kot kud i ng’om: man Noa yabu wi avur, man eneno, man, nen, wang’ ng’om uthwo.

¹⁴ Man i dwi mir arionde, i ceng’ pier ario wi abirone mi dwije, ng’om uthwo.

¹⁵ E Mungu yero ni Noa, ewacu kumae,

¹⁶ Ai woko kud i avur, in, ku cegi, man woti, ku mond woti wukugi.

¹⁷ Wodh gin ceke ma kwo ma ni kudi kubang’e kubang’e, mi weg kum ceke, winyo, man lim, man gin ma lak i ng’om kubang’e kubang’e ma wotho ku wi ng’om; kara ginyol dit i ng’om, man ginyai, gimedri de wi ng’om.

¹⁸ Man Noa wok woko, ku wote, man cege, man mond wote gikugi:

¹⁹ yedi kubang’e kubang’e, gin ma lak kubang’e kubang’e, ku winyo kubang’e kubang’e, ku gin ceke ma tek wotho wi ng’om, calku wat migi, gicidho woko kud i avur.

²⁰ Man Noa guro pemblam ni Yehova, man egamu kum lim ma leng’ kubang’e kubang’e, man kum winyo ma leng’ kubang’e kubang’e, man ethiero lam m’awang’a wi pemblamne.

²¹ Man Yehova ng’wio ng’wic mido ma ng’ar; man Yehova wacu i adundene kumae, Abilamu ng’om kendo ngo ni kum dhanu, kum lembapora mi pidoic mir adunde dhanu en e rac ugambre kum aradu pare; kadi abigoyo gin ceke ma kwo kubang’e kubang’e kendo ngo, calu atimo.

²² Cil i nindo ceke ma ng’om nuti, kakodhi ku palacam, man nindo mi koyo ku lietho, man cwir ku oro, man dieceng’ ku diewor de bijik ungo.