Thangambere 6 - The Holy Bible In Alur (Lur) Revised Orthography

Dubo ma dit mi Dhanu

¹ Man etimbre, kinde ma dhanu maku medri wi wang’ ng’om, man nyir unyole igi,

² nia wot Mungu gineno nyir mi dhanu nia wang’gi leng’; man gigamu igi mon mi ceke ma gifoyo.

³ Man Yehova wacu kumae, Tipona bipiembre ku dhanu nja ngo, kum en bende en e kum: ento ceng’ pare bibedo rundi dak acel ku pier ario.

⁴ Junefili ginuti i ng’om i ceng’ maeca, man bende yo ng’ei maeno, kinde ma wot Mungu gimondo ba nyig dhanu, e ginyolo nyithindho igi: dhanune gi dhanu ma tek ma ginuti con, dhanu ma pigi yik.

⁵ E Yehova neno nia dubo mi dhanu e dit i ng’om, man nia porolembe mi pidoic mir adunde kubang’e kubang’e en e rac kende thiri thiri.

⁶ Man Yehova lokre kum etimo dhanu wi ng’om, man can unege i adundene.

⁷ E Yehova wacu kumae, Abinyotho dhanu m’acwio kud i wang’ ng’om; dhanu, ku yedi, ku gin ma lak i ng’om, ku winyo ma kor polo; kum alokra rac atimogi.

⁸ Ento Noa nwang’u bero i wang’ Yehova.

Noa Timo Avur

⁹ Maeni dhanum’utuk pa Noa. Noa en e ng’atu ma pwe, en e ng’atu ma ndhu cu i kind dhanum’utuk pare: Noa wotho ku Mungu.

¹⁰ E Noa nyolo wote adek, en e Cem, man Ham, ku Yafeth.

¹¹ Man ng’om unyothre i wang’ Mungu, ng’om de pong’ ku rop.

¹² Man Mungu neno ng’om, man, nen, enyothre; kum weg kum ceke ginyotho yo migi wi ng’om.

¹³ Man Mungu wacu ni Noa kumae, Kajik mi weg kum ceke wok i wang’a; kum ng’om upong’ ku rop ni kumgi; man, nen, abinyothogi karacelo ku ng’om.

¹⁴ Tim iri avur mi yen sipre; itim kusika i avurne, man imwone yor i ie ku yo woko de kud udok.

¹⁵ Man maeni en e karamb tim m’ibitime ko: kabor mir avurne bot dak adek, kalacne bot pier abic, man kadongone bot pier adek.

¹⁶ Iketh kaka ma ketho der i avurne, man idare yo malu bot acel; man dhugola mir avurne iketh i ng’ete; time ni kabedo ma piny, ku m’i wie, ku ma wi maeno de.

¹⁷ Man an, nen, akelo pi ma coro ng’om wi ng’om, kara unyoth weg kum ceke, ma yuyo mi kwo ni i ie, ku the polo; gin ceke ma ni i ng’om bitho.

¹⁸ Ento abiketho lembariba para cungo kudi; man ibimondo i avurne, in, ku woti, man cegi, ku mond woti karacelo kudi.

¹⁹ Man ikel gin ceke ma kwo ma ku kum kubang’gi kubang’gi, kwond gin ceke ario ario i avur, kara ugwokgi ma kwo karacelo kudi; gibed ma co ku ma mon.

²⁰ Kind winyo ma ku kitgi ma ku kitgi, man kind lim ma ku kitgi ma ku kitgi, kind gin ma lak i ng’om de ma ku kitgi ma ku kitgi, kagi ceke ario ario gibibino i beng’i, kara gibed kwo.

²¹ Man igam kwond cemo ceke i beng’i ma jucamu, man icoke i beng’i; man ebibedo ni cemo iri, man igi.

²² Noa timo kumeca; calku gin ceke ma Mungu ng’olo ire, etimo kumeca.