Thangambere 42 - The Holy Bible In Alur (Lur) Revised Orthography

Utumin Yusuf Gibino i Misiri Nisaku Cam

¹ Nie Yakobo neno nia cam ni i Misiri, man Yakobo wacu ni wote kumae, Nedi wuneno weng’wu?

² Man ewacu kumae, Nen, awinjo nia cam ni i Misiri: wulor piny kuca, man wung’ieu iwa ku kuca; kara wabed kwo, man ku watho.

³ E utumin Yusuf apar giloro piny kara ging’ieu cam ku i Misiri.

⁴ Ento Benyamin, m’umin Yusuf, Yakobo ore ngo ku utumin; kum ewacu kumae, Kuno nyo gin ma rac bitimbre i kume.

⁵ Man wot Israel gibino kara ging’ieu i kind ju m’ubino: kum ndru ni i ng’om Kanan.

⁶ Man Yusuf en e jabim wi ng’om; en e ng’atu ma ng’iewo ni dhanu ceke mi ng’om. Man utumin Yusuf gibino, e girum piny gigi ire arieba wang’gi i ng’om.

⁷ E Yusuf uneno utumin mire, man eng’eyogi, ento epale igi gire ni jawirok, man eweco kugi ma tek; man ewacu igi kumae, Wuai kani? E giwacu kumae, Kud i ng’om Kanan kara wang’-ieu cam.

⁸ E Yusuf ung’eyo utumin mire, ento ging’eye ngo.

⁹ Man Yusuf upoi kum lek m’eleko pigi man ewacu igi kumae, Wun wu juganda; wubino kara wunen muneru mi ng’om.

¹⁰ E giwacu ire kumae, Ungo, rwoth para, ento jutic peri gibino kara ging’ieu cam.

¹¹ Wan ceke wa wot ng’atu acel; wan wa dhanu mandha, jutic peri gi juganda ngo.

¹² E ewacu igi kumae, Ungo, ento wubino kara wunen muneru mi ng’om.

¹³ Man giwacu kumae, Wan wa jutic peri wa utumego apar wi ario, wa wot ng’atu acel i ng’om Kanan; man, nen, ma cogo ni ba wegwa i ceng’ maeni, man acel umbe.

¹⁴ E Yusuf uwacu igi kumae, Eno m’uketho ayero iwu awacu kumae, Wun wu julib;

¹⁵ jubimulo iwu ku maeni: ku kwo pa Farao wubiai keni ngo, tek umegwu ma nok kubino keni ngo.

¹⁶ Wuor ng’atu acel m’i kindwu, man wek ekel umegwu, man wun wubibedo atwia, kara jumul lembe mu, tek lemandha ni i iwu: tek kumeno ngo ku ba kwo pa Farao wun wu juganda andha.

¹⁷ Man eketho gi ceke i ka ma jukuro mi ceng’ adek.

¹⁸ Man Yusuf uwacu igi i ceng’ mir adege kumae, Wutim maeni, man wubed kwo; kum alworo Mungu:

¹⁹ tek wu dhanu mandha, wek ng’atu acel ma kind utumegwu bed atwia i otkol; ento wucidhi, wuyei cam pi ndru ma ni i udiwu:

²⁰ man wukel utumegwu ma cogo i bang’a; kum kumeno lembe mu bibedo andha, man wubitho ngo. Man gitimo kumeca.

²¹ E giwecri gigi kumae, Dubo ni i wiwa andha kum umegwa, kum waneno can mi ng’eyong’ec pare, kinde m’ekwayuwa, e wakwero winjo; ka kumeno can maeni wok i wiwa.

²² Man Ruben uloko lembe igi, ewacu kumae, Ayero iwu ngo, awacu kumae, Kud wudub kum nyathinne; e wukwero winjo? ka kumeno bende, nen, julwong’o rimbe.

²³ Man ging’eyo ngo nia Yusuf uwinjogi; kum jaloklembe ni i kindgi.

²⁴ Man elokre gire cen kud i bang’gi, e eywak; man edwogo i bang’gi, e eweco i bang’gi, man egamu Simeon kud i kindgi, e etwie i wang’gi.

Utumin Yusuf Gidok i Kanan

²⁵ Yusuf ulund ung’olo ya jupong’ jamni migi ku cam, man judwok sente migi kubang’gi kubang’gi ng’atuman i usau pare, man nia jumi igi cemo mi yo: e jutimo igi kumeca.

²⁶ E giketho cam migi wi kana migi, man giai keca.

²⁷ Man ka ng’atu acel m’i kindgi yabu dhu usau pare kara emi cemo ni kana pare i kagonjo, eneno sente pare; man, nen, eni i dhu usau pare.

²⁸ Man ewacu ni utumin mire kumae, Judwoko sente para; man, nen, eni i usau para: e cwinygi ng’abre, man gilokri man ba wadi man ba wadi, ma kumgi bemiel, giwacu kumae, Maeni ang’o ma Mungu timo i bang’wa?

²⁹ E gibino ba Yakobo ma weggi i ng’om Kanan, man giyero ire gin ceke m’utimbre i kumgi, giwacu kumae,

³⁰ Ng’atu, ma rwoth mi ng’ombuca, eweco ma tek i bang’wa, man ewacu nia wa juganda mi ng’om.

³¹ E wawacu ire kumae, Wan wa dhanu mandha; wan wa juganda ngo:

³² wan wan umego apar wi ario, ma wot wegwa; acel umbe, man ma cogo ni karacelo ku wegwa tin i ng’om Kanan.

³³ Man ng’atuno, ma rwoth mi ng’ombuca, ewacu iwa kumae, Abing’eyo ku maeni nia wu dhanu mandha: wek umegwu acel i bang’a, man wuter cam pi ndru ma ni i udiwu, e wucidh i yo mu;

³⁴ e wukel umegwu ma cogo i bang’a: e abilund ng’eyo nia wu juganda ngo, ento nia wu dhanu mandha: kum kumeno abigonyo umegwu, man wubiloko kuloka i ng’om.

³⁵ Man etimbre kinde ma gikonjo usau migi, nia, nen, ku ba dhanu ceke ng’atuman sente pare m’atwia ni i usau pare: e kinde ma gin ku weggi gineno sente migi m’atwia, lworo negogi.

³⁶ E Yakobo ma weggi wacu igi kumae, Wukabu nyithindho para kud i bang’a: Yusuf umbe, man Simeon de mbe, e wubikabu Benyamin woko: gin maeni ceke ni i wia.

³⁷ E Ruben uyero ni won, ewacu kumae, Neg wota ario tek adwoke i beng’i ngo: mie i cinga, man abidwoke i cingi kendo.

³⁸ Man ewacu kumae, Woda biloro piny karacelo kudu ngo; kum umin utho, man edong’ e kende: tek gin ma rac utimbre i kume i yo ma wucidho i ie, wubilund tero lwar para ku can i liel.