Thangambere 4 - The Holy Bible In Alur (Lur) Revised Orthography

Kain giku Habil

¹ E ng’atuca ng’eyo Eva ma cege; e egamu ie, man enyolo Kain, man ewacu kumae, Agamu ng’atu ma nico ku kony pa Yehova.

² Man kendo enyolo umin mire ma Habil. Man Habil en e jakwac mi rombe, ento Kain en e jafur ng’om.

³ Man etimbre yo ng’ei nindo moko, nia Kain utero girathiera mi nying’ ng’om ni Yehova.

⁴ Man Habil bende, utero nyithi rombe ma kayu mir udul rombe pare ku mione. Man Yehova foyo Habil ku girathiera pare:

⁵ ento efoyo Kain ungo ku girathiera pare. E ng’ecwiny unego Kain dit, man emino wang’e.

⁶ Man Yehova wacu ni Kain kumae Kwinyo negi nedi? man imino weng’i nedi?

⁷ Tek itimo ber, ebiyire iri ngo? man tek itimo ber ungo, dubo bedo dhugola; man yeny pare bibedo yor i beng’i; ento dong’ ibim wie.

⁸ Man Kain uweco ku Habil m’umin. Man etimbre, kinde ma gini i podho, nia Kain upodho wi Habil m’umin mire, man enege.

⁹ Man Yehova wacu ni Kain kumae, Habil m’umeru ni kani? Man ewacu kumae, Ang’eyo ngo: adoko jakwac p’umira’?

¹⁰ Man ewacu kumae, Itimo ang’o? ba rimb umeru ywak i bang’a kud i ng’om.

¹¹ Man kawono julemi ku ba ng’om, m’uyabu dhoge kara ejol rimb umeru kud i cingi;

¹² kan ifuro ng’om, ebimio tego pare kendo ngo iri; ibidoko jang’wec man jawoth m’ariri i ng’om.

¹³ Man Kain uwacu ni Yehova kumae, Masendi para dit ma sagu m’acopo bedo ko.

¹⁴ Nen, iriema woko tin kud i wang’ ng’om; man jubiketho abedo apana ni weng’i; man abibedo jang’wec man jawoth m’ariri wi ng’om; man ebitimbre, nia ng’atu ma tek unwang’a ebinega.

¹⁵ E Yehova wacu ire kumae, Ka kumeno ng’atu ma tek unego Kain, jubiculo kwor i wie bang’ abiro. E Yehova ketho giranyutha kum Kain, kara ng’atu ma tek unene kud enege.

¹⁶ Man Kain uai woko kud i vut Yehova, man ebedo i ng’om mi Nod, ma ni yo nyangu ni Aden.

Nyikwai Kain

¹⁷ Man Kain ung’eyo dhaku pare; man egamu ie, man enyolo Enok: man egomo adhura, e elwong’o nying adhurane Enok, m’ulubo nying’ wode, ma Enok.

¹⁸ Man Enok unyolo Irad: Irad ke nyolo Mehuyael; Mehuyael ke nyolo Methucael; Methucael ke nyolo Lamek.

¹⁹ Man Lamek ugamu ire mon ario: nying’ ng’atu acel Ada, man nying’ ng’atu mucelo ke Zila.

²⁰ Man Ada nyolo Yabal: en e weg wagi ju ma bedo i hema ma weg lim.

²¹ Man nying uminne Yubal: en e weg wagi dhanu ma goyo adungu kud usegu.

²² Man Zila, unyolo Tubal-kain bende, ma jabodho mi jam girathuma mi mola man mi nyunyu kubang’e kubang’e: man nyamin Tubal-kain en e Nama.

²³ Man Lamek uwacu ni mon pare kumae: Ada wuku Zila, wuwinj dwanda; Wu mond Lamek, wuwinj wec para: Kum anego dhanu kum tong’o lero i kuma, Man jalawobi kum goc m’egoya;

²⁴ Tek jubiculo kwor pi Kain wang’ abiro, Andha Lamek wang’ pier abiro wi abiro.

Nyikwai Seth

²⁵ E Adamu ng’eyo dhaku pare kendo; man enyolo nyathin ma nico, e elwong’o nyinge Seth: kum, ewacu kumae, Mungu ketho ira kodhi mange ka Habil; kum Kain unege.

²⁶ Man ni Seth, ire bende junyolo nyathin ma nico; man elwong’o nyinge Enoc. I kinde maeni dhanu maku lwong’o nying’ Yehova.