Thangambere 34 - The Holy Bible In Alur (Lur) Revised Orthography

Juculo Kwor pir Acidi pa Dina

¹ Man Dina ma nyar Leya, m’enyolo ni Yakobo, ecidho woko nineno nyir m’i ng’ombe.

² Man Cekem ma wod Hamor ma Jahivi, ma jaditmawijo mi ng’ombe, enene; man egame, e evuto kude, man ejwige.

³ Man ng’eyong’ec pare moko kum Dina ma nya Yakobo, e emaru nyakune, man eweco ber ba nyakune.

⁴ E Cekem uyero ni won ma Hamor, ewacu kumae, Gam nyaku maeni ira ni dhaku.

⁵ Nie Yakobo winjo nia ecido Dina ma nyare; man wote gini karacelo ku lim pare i thim: e Yakobo bedo yo ma fodi gikutundo ngo.

⁶ Man Hamor ma won Cekem ucidho woko ba Yakobo kara giwec gikude.

⁷ Man wot Yakobo giai kud i thim kinde ma giwinjo: e can umaku dhanune, man kwinyo ma dit umakugi, kum etimo kasegu i Israel i vuto m’evuto ko ku nya Yakobo; ma ginduni maku kud etimbre.

⁸ Man Hamor giweco gikugi ewacu kumae, Ava nyaku mu benego ng’eyong’ec pa woda ma Cekem: akwayuwu, wumie ire ni dhaku.

⁹ Man watim ambadha wakudu; wumi nyigwu iwa, e wugam nyigwa iwu.

¹⁰ E wabibedo wakudu: man ng’om maeni bibedo i weng’wu; wubed man wutim kuloka i ie, man wugam piny iwu i ie.

¹¹ E Cekem uwacu ni won nyaku man ni utumin mire kumae, Wek anwang’ bero i weng’wu, man gin ma wuwacu ira abimio.

¹² Wulwong’ keny m’ulwar man giramia i bang’a, e abimio calu ma wulwong’o i bang’a: ento wumi ira nyakune ni dhaku.

¹³ E wot Yakobo giloko lembe ni Cekem ku Hamor ma won kud abombi, man giwacu, kum ecido Dina ma nyameggi,

¹⁴ man giwacu igi kumae, Wacopo timo gin maeni ngo, ma nia wami nyamegwa ni ng’atu ma fodi jukutimo yaa i kume ngo; kum maeni en e cac iwa.

¹⁵ Wabiyio iwu ni kum lembe maeni kende: tek wubibedo calu wan, nia jutim yaa i kum co m’i kindwu kubang’gi kubang’gi;

¹⁶ e wabilund mio nyigwa i beng’wu, man wabigamu nyigwu iwa, e wabibedo karacelo kudu man wabidoko dhanu acel.

¹⁷ Ento tek wubiwinjowa ngo, nia jutim yaa i kumwu; wabilund gamu nyaku mwa, e wabicidho.

¹⁸ Man lembe migi nyayu mutoro i Hamor, man i Cekem ma wod Hamor.

¹⁹ Man jalawobi maeno galu ngo kutimo gin maeni, kum nya Yakobo nyayu mutoro i ie: man jumio yung ire ma sagu juot pa won ceke.

²⁰ Man Hamor giku Cekem ma wode gibino ba dhugang’ mir adhura migi, e giweco ku dhanu mir adhura migi, giwacu kumae,

²¹ Wabedo ku kwiocwiny ku dhanu maeni; ka kumeno wek gibed i ng’om maeni, man gilok kuloka i ie; kum, nen ng’om ulwar m’uromogi; wek wagam nyiggi iwa ni mon, man wek wami igi nyigwa.

²² Dhanu maeni giyio iwa nia wabed wakugi, ni kum lembe maeni, kara wadok dhanu acel, tek co m’i kindwa kubang’wa kubang’wa jutimo yaa i kumgi, calu gitimo yaa i kumgi.

²³ Lim migi ku piny migi ku lim migi ma mi ter gibibedo mwa ngo? ndhu wayiyu igi kende, e wabibedo wakugi.

²⁴ Man dhanu ceke m’uai i dhugang’ mir adhura pare giwinjo Hamor man Cekem ma wode; e ku ba co ceke jutimo yaa i kumgi, dhanu ceke m’uai dhugang’ mir adhura pare.

²⁵ Man etimbre i ceng’ mir adege, kinde ma fodi rem ni i kumgi, nia juario ma kind wot Yakobo, Simeon man Lawi, utumin Dina, giting’o palamularu, man pare man pare, man gibino kum adhura ling’, e ginego dhanu ma co ceke.

²⁶ Man ginego Hamor ku wode ku lak palamularu, e giwodho Dina woko kud i ot pa Cekem, man gicidho.

²⁷ Wot Yakobo giwok wi ju ma junego, man giyaku adhurane, kum gicido nyameggi.

²⁸ Giyaku udul rombe migi man dhok migi man kana migi, ku piny ma ni i adhurane, ku ma ni i podho de;

²⁹ man lonyo migi ceke, ku nyithindho migi ceke man mon migi, gimaku ni ayeki man gitimo amaci, cil gin ceke ma ni i ot.

³⁰ E Yakobo wacu ni Simeon ku Lawi kumae, Wung’abu cwinya, kara wudwoka ni gin ma judagu ni ju m’ubedo i ng’ombuni, i kind Jukanani man Juperizi: man, kum welna nok, gibicokri gigi karacelo i kuma e gibigoya; man abinyothra, an ku juot para.

³¹ E giwacu kumae, Maku etim kum nyamegwa calu kum won asara?