Thangambere 23 - The Holy Bible In Alur (Lur) Revised Orthography

Tho pa Sara. Ibrahim Ung’iewo Kakuny

¹ Man Sara camu ng’om rundi dak acel ku pier ario wi abiro: maeni rundi ma Sara camu ie ng’om.

² Man Sara tho i Kiriatharba (ma en e Hebron), i ng’om Kanan: man Ibrahim ubin ubedo wi liel pa Sara, man kara eywage.

³ Man Ibrahim uai malu kud i wang’ avu pare, man eyero ni nyithindho pa Heth, ewacu kumae,

⁴ An a jawirok man umondo i kindwu: mi ira ng’om mi kakuny karacelo kudu, kara ayik avu para kud i wang’a.

⁵ Man nyithindho pa Heth giloko lembe ni Ibrahim, giwacu ire kumae,

⁶ Winjwa, rwoth para; in i jaditmawijo pa Mungu i kindwa: yik avu peri i odliel mwa ma jufoyo; ng’atu moko mbe m’i kindwa ma bicero odliel pare iri, ento kara iyik avu peri.

⁷ E Ibrahim uai malu, man erum gire ni dhanu m’i ng’ombe, en e ni nyithindho pa Heth.

⁸ Man giweco gikugi, ewacu kumae, Tek en e pidoiwu nia ayik avu para kud i wang’a, wuwinja, man wukwai pira ba Efron ma wod Zohar,

⁹ kara emi ira odng’om mi Makpela, m’ebedo ko, ma ni wi tung’ mi podho pare; wek emie ira mi welpiny ma bo i kindwu ni ng’om mi kayik.

¹⁰ Nie Efron ubedo i dier nyithindho pa Heth: man Efron ma Jahiti loko lembe ni Ibrahim i vut nyithindho pa Heth, cil dhanu ceke ma gimondo i dhugang’ mir adhura pare, ewacu kumae,

¹¹ Ungo, rwoth para, winja: amio podhone iri, ku odng’om ma ni i ie, amie iri; i vut nyithindho mi dhanu para amie iri: yik avu peri.

¹² E Ibrahim ugung’ i wang’ dhanu m’i ng’ombe.

¹³ Man eyero ni Efron i vut dhanu m’i ng’ombe, ewacu kumae, Ento tek iyio, akwei, winja: abimio welpiny mi podhone; game i bang’a, man abiyiko avu para keca.

¹⁴ E Efron uloko lembe ni Ibrahim, ewacu ire kumae,

¹⁵ Rwoth para, winj dwanda: ng’et ng’om ma romo cekel mi mola ma tar dak ang’wen, en e ang’o i kindwa wakudi? ka kumeno yik avu peri.

¹⁶ E Ibrahim uwinjo Efron; man Ibrahim uporo mola ma tarne m’elwong’o i vut nyithindho pa Heth ni Efron, cekel mi mola ma tar dak ang’wen, sente ma weg kuloka gitimo ko.

¹⁷ Kum kumeno podho pa Efron, ma ni i Makpela, ma ni i wang’ Mamre, podhone, man odng’ombe ma ni i ie, ku yedhi ceke ma ni i podhone, ku ma ni i kieune ceke m’utieke gbur, judwoko tek

¹⁸ ni Ibrahim ni piny pare i vut nyithindho pa Heth, i wang’ dhanu ceke m’umondo i dhugang’ mir adhura pare.

¹⁹ Man yo ku ng’ei maeni, Ibrahim uyiko Sara ma cege i odng’om mi podho mi Makpela i wang’ Mamre (ma en e Hebron), i ng’om Kanan.

²⁰ Man podhone, ku odng’ombe ma ni i ie, judwoko tek ni Ibrahim ni piny pare mi kayik ni kum nyithindho pa Heth.