Thangambere 22 - The Holy Bible In Alur (Lur) Revised Orthography

Jung’olo ya Ibrahim Uthier Isak

¹ Man etimbre yo ng’ei gin maeni, nia Mungu mulo i Ibrahim, man ewacu ire kumae, Ibrahim; man ewacu kumae, Anuti.

² Man ewacu kumae, Kawono gam wodi, wodi kulong’, m’imare, en e Isak, man icidh i ng’om Moria; man ithiere keca ni lam m’awang’a wi got moko m’abiyero pire iri.

³ Man Ibrahim uai pir kugweno, eketho jambwoth de wi kana pare, man egamu awobi pare ario gicidho gikugi, kud Isak ma wode; man etong’o yen mi lam m’awang’a, e eai malu, man ecidho ba ka ma Mungu yero pire ire.

⁴ I ceng’ mir adege Ibrahim uting’o wang’e malu, e eneno ka maeno ku bor.

⁵ Man Ibrahim uwacu ni awobi pare kumae, Wubed keni ku kana, man waku nyathin wabicidho kuca; e wabirwo, man wabibino kendo i beng’wu.

⁶ Man Ibrahim ugamu yen mi lam m’awang’a, man ekethe wi Isak ma wode; man eting’o mac ku pala i cinge: e gicidho gin ario karacelo.

⁷ Man Isak uyero ni Ibrahim ma won, ewacu kumae, Vwa; man ewacu kumae, Anuti, woda. Man ewacu kumae, Nen, mac ku yen de nuti: ento nyathi rombo ni kani ni lam m’awang’a?

⁸ Man Ibrahim uwacu kumae, Mungu binwang’u nyathi rombo ire gire ni lam m’awang’a, woda: kum kumeno gicidho gin ario karacelo.

⁹ Man gibino i ka ma Mungu yero ire pire; man Ibrahim uguro pemblam keca, man ecanu yen kakare, e etwio Isak ma wode, man ekethe wi pemblamne, wi yen.

¹⁰ Man Ibrahim urieyo cinge, man eting’o pala kara eneg wode.

¹¹ E malaika pa Yehova lwong’e kud i polo, man ewacu kumae, Ibrahim, Ibrahim: man ewacu kumae, Anuti.

¹² E ewacu kumae, Kud iketh cingi kum nyathin, kadi gin moko de kud itim i kume; kum kawono ang’eyo nia ilworo Mungu, kum ikwero wodi ngo ira, wodi kulong’.

¹³ Man Ibrahim uting’o wang’e malu, man eneno, man, nen, nyo g rombo moko yor i ng’eye ku tunge kum uboko: e Ibrahim ucidho man egamu nyog rombone, man ethiere ni lam m’awang’a ka wode.

¹⁴ Man Ibrahim ulwong’o nying’ kakeca Yehova-jire (bimio) calu ewacre cil i ceng’ ma tin kumae, Ebinwangre wi got pa Yehova.

¹⁵ Man malaika pa Yehova lwong’o Ibrahim wang’ arionde kud i polo,

¹⁶ man ewacu kumae, Yehova wacu kumae, Akwongra kuda gira kum itimo gin maeni, man ikwero mio wodi ngo, wodi kulong’,

¹⁷ kara i mio mugisa abin ami mugisa iri, man i medo de abin amed kodhini calu cero m’i polo, man calu kwio ma dhu nam; man kodhini bimwonyo dhugang’ pa jadegine;

¹⁸ man i kodhini thek ceke m’i ng’om binwang’u mugisa; kum iworo dwanda.

¹⁹ Kum kumeno Ibrahim udok bang’ awobi pare, man giai gicidho karacelo ba Ber-ceba; man Ibrahim ubedo i Ber-ceba.

Nyikwai Nahor

²⁰ Man etimbre yo ng’ei gin maeni, nia juyero ni Ibrahim, juwacu kumae, Nen, Milka, en bende enyolo nyithindho ni umeru ma Nahor:

²¹ Uz ma kayu pare, man Buz m’umin mire, ku Kemuel ma won Aram,

²² man Kesed, ku Hazo, man Pildac, ku Yidlaf, man Bethuel.

²³ Man Bethuel unyolo Rebeka: maeni abora Milka nyolo ni Nahor, m’umin Ibrahim.

²⁴ Man dhaku pare m’araga, ma nyinge Reuma, enyolo Teba bende, man Gaham, ku Tahac, man Maka.