Ruth 4 - The Holy Bible In Alur (Lur) Revised Orthography

Gambri pa Boaz giku Ruth

¹ Nie Boaz uidho malu dhugang’ mir adhurane, man ebedo piny keca: man, nen, wat ma ceng’ni ma Boaz uyero pire kadhu; ewacu ire kumae, In e! bin kue, bed piny keni. E elokre cen, man ebedo piny.

² Man egamu dhanu apar ma judongo mir adhurane, man ewacu kumae, Wubed piny keni. E gibedo piny.

³ Man ewacu ni wat ma ceng’ni kumae, Naomi, m’udwogo kud i ng’om Moab, eloko ng’et ng’om ma en e p’umegwa Elimelek:

⁴ man ia pido ya agony lembene iri, awacu kumae, ng’iewe i wang’ ju m’ubedo keni, man i wang’ judongo mi juthuwa. Tek iyenyo iware, ware: ento tek iyenyo ngo iware, lund iyer ira, kara ang’ei; kum ng’atu moko mbe ma copo ware ndhu in; yo ng’ei ke an. Man ewacu kumae, Abiware.

⁵ Boaz ulund uwacu kumae, Ceng’ m’ing’iewo ng’om i cing’ Naomi ie, ibikong’iewe be ba Ruth ma Nyamoabi bende, ma ci ng’atu m’utho, kara iting’ nying’ ng’atu m’utho wi aba pare.

⁶ E wat ma ceng’ni uwacu kumae, Acopo ware ira gira ngo, amaru nyotho musolu para gira: igam ng’ol para mi war i beng’i; kum acopo ware ngo.

⁷ Nwang’u maeni en e kura Israel I nindo ma con i lembe mi war man i lembe mi kuloka, kara uketh gin ceke ucungi: dhanu wodho wara pare, man emie ba wadi; junyutho nia lembe bedo andha kumeni i Israel.

⁸ Kum kumeno wat ma ceng’ni uwacu ni Boaz kumae, Ng’iewe iri giri. Man ewo dho wara pare.

⁹ Man Boaz uwacu ni judongo, man ni dhanu ceke kumae, Wun wu jumulembe tinuni, nia ang’iewo gin ceke ma naka pa Elimelek, ku gin ceke ma naka pa Kilion man pa Malon, i cing’ Naomi.

¹⁰ Mange ke ang’iewo Ruth ma Nyamoabi, ma ci Malon, ubed dhaku para, kara uting’ nying’ ng’atu m’utho wi aba pare, kara nying’ ng’atu m’utho kud urwiny kind utumin, man kud i dhugang’ mi kakare: wu jumulembe tinuni.

¹¹ E dhanu ceke ma gini dhugang’, man judongo, giwacu kumae, Wan wa jumulembene. Yehova uketh dhaku m’ubino i ot peri calu Rahel ku Leya, gi mon ario ma gigomo ot mir Israel: man igam iri lonyo i Efratha, man ibed ma rwongi yik i Beth-lehem:

¹² ot peri de bed calu ot pa Perez, ma Tamar unyolo ni Yuda, i kodhi ma Yehova bimio iri pa dhaku maeni ma fodi nyaku.

¹³ Kum kumeno Boaz ugamu Ruth, e edoko dhaku pare; man emondo i wie, e Yehova mio ire gamuic, man enyolo nyathin ma nico.

¹⁴ E mon giwacu ni Naomi kumae, Mugisa ni Yehova, m’eweki ngo i ceng’ maeni ma wat peri ma ceng’ni mbe; man dong’ nyinge bed ma rwonge yik i Israel.

¹⁵ Man ebibedo iri ni ng’atu ma dwoko kwo, man ng’atu m’ugwoko tio peri; kum ci wodi, m’umeri, ma en e kuloka iri ma sagu wot abiro, enyole.

¹⁶ E Naomi ting’o nyathine, man ekethe i kore, e edoko japidine.

¹⁷ Man mon ma wedine gicaku nyinge, giwacu kumae, Junyolo nyathin ma nico ni Naomi; e gicaku nyinge Obed: en e won Yese, ma won Daudi.

¹⁸ Nwang’u maeni dhanum’utuk pa Perez: Perez unyolo Hezron,

¹⁹ Hezron ke nyolo Ram, Ram ke nyolo Aminadab,

²⁰ Aminadab ke nyolo Nacon, Nacon ke nyolo Salmon,

²¹ man Salmon ke nyolo Boaz, Boaz ke nyolo Obed.

²² Obed ke nyolo Yese, Yese ke nyolo Daudi.