Obadia 1 - The Holy Bible In Alur (Lur) Revised Orthography

Jwigri mi Edom

¹ Ginmawokiwang’ pa Obadia. Rwoth Yehova wacu kumae, pi Edom: Wawinjo rwonglembe m’uai ba Yehova, man juoro jadhulembe i kind thek, m’uwacu kumae, Wuai, man dong’ waeyu wakiedu kude,

² Nen, adwoki nok i kind thek: jucei dit.

³ Kuhaya mir adundeni bombi, E in m’ibedo i odcana, ma kabedo peri ni malu; m’uwacu i adundene kumae, Ng’a ma bikela piny i ng’omi?

⁴ Kadok iidho malu pamir acur, man kadok juketho ot peri kind cero, abikeli piny ku kuca, Yehova wacu.

⁵ Tek jukwo bino i beng’i, tek weg ayeki bino ku diewor (ei maram ithumbri woko!), gibikwalu kende cil m’eromogi ngo? tek jupon ulok ubino i beng’i, gibiweko nyingulok moko m’udong’ ungo?

⁶ Ei maram juyenyo ko gin pa Esau! ei maram juyenyo ko piny m’akana pare m’upondo!

⁷ Dhanu ceke mi lembariba peri gikeli i yo peri, cil i kieu: dhanu ma cwinywu kwio wukugi gibombi, man gisegi; ju m’ucamu kwen peri giketho uwic i theri: ng’eyothelembe mbe i ie.

⁸ I ceng’ maeca, Yehova wacu, abinyotho jurieko ku i Edom ungo, man ng’eyothelembe ku wi got mir Esau de ngo?

⁹ Man dhanu peri ma tek, E Teman, cwinygi bing’abre, kara juthum dhanu kubang’gi nzu ku nek ku wi got mir Esau.

¹⁰ Kum rop m’utimbre kum umeru ma Yakobo, lewic biumi, man ibithumbri woko mi nja.

¹¹ I ceng’ m’icungo ie lokaca, i ceng’ ma juwirok gitero ie piny pare cen, man juwirok gimondo i dhugola pare, man gigoyo jara wi Yerusalem, in de i calu acel m’i kindgi.

¹² Ento kud inen wi ceng’ p’umeru i ceng’ mi ruvwa pare, man anyong’a kud unegi kum nyithindho pa Yuda i ceng’ mi nyoth migi; kadok aweca de kud iwec ku kuhaya i ceng’ mi masendi.

¹³ Kud imond i dhugang’ mi dhanu para i ceng’ mi ruvwa migi; eyo, kud inen wi can migi i ceng’ mi ruvwa migi, kadok cingwu de kud wuketh wi piny migi i ceng’ mi ruvwa migi.

¹⁴ Man kud icung i akarayo, kara juthum woko dhanu pare m’uboth; man kud wucib dhanu pare m’udong’ i ceng’ mi masendi.

¹⁵ Kum ceng’ pa Yehova ni ceng’ni wi thek ceke: calu itimo, ebitimbre iri; cul peri bidwog i wii giri.

¹⁶ Kum calu wumadhu wi got para ma leng’, thek ceke bimadhu kumeca thiri thiri; eyo, gibimadhu, gibimwonyo, man gibibedo calu gimbe.

Yung mi Israel

¹⁷ Ento i got Sayuni ju m’uboth bibedo nuti, man ebibedo leng’; man ot pa Yakobo bimwonyo piny migi.

¹⁸ E ot pa Yakobo bibedo ni mac, man ot pa Yusuf ni lebmac, ot pa Esau de ni soka, man gibiliel i kindgi, e gibiwang’ugi; man ng’atu moko mbe ma bidong’ ni ot pa Esau; kum Yehova yero maeni.

¹⁹ Man ju ma yor ariwa ma piny bimwonyo got mir Esau, man ju mi poga bimwonyo Jufilisti; man gibimwonyo podho pa Efraim, man podho mi Samaria; man Benyamin bimwonyo Gilead.

²⁰ Man ng’eca mir udul maeni ni nyithindho mir Israel, ma gini i kind Jukanani, gibimwonyo cil kum Zarefath; man ng’eca mi Yerusalem, ma gini i Sefarad, gibimwonyo adhura ma yor ariwa ma piny.

²¹ Man jubodh biidho malu wi got Sayuni kara gipok lembe mi got mir Esau; e ker bibedo pa Yehova.