Kitabu Mir Ang’wende Pa Musa Wel 35 - The Holy Bible In Alur (Lur) Revised Orthography

Adhura Abusiel mi Julawi

¹ Man Yehova yero ni Musa i pambu mi Moab dhu Yordan ba Yeriko, ewacu kumae,

² Ng’ol ni nyithindho mir Israel, nia gimi ni Julawi adhura ma gibed i ie ku i aba mi piny migi; man wubimio kakwac ni Julawi ng’et adhura m’utiekogi gbur.

³ E adhura bibedo nuti igi ma gibed i ie; man kakwac migi bibedo nuti mi dhiang’ migi, man mi piny migi, man mi lim migi ceke.

⁴ Man kakwac mir adhura, ma wubimio ni Julawi, bibedo bot rubanga acel ugambre kum gang’kidi mir adhura ku yo woko gbur.

⁵ Man wubiporo yo woko mir adhurane mi ng’ete ma yo nyangu bot rubanga ario, man mi ng’ete ma yor ariwa ma piny de bot rubanga ario, man mi ng’ete ma yo reto de bot rubanga ario, man mi ng’ete ma yor ariwa ma malu de bot rubanga ario, adhura e m’ubin ubed i diere. Maeni bibedo igi ni kakwac mir adhura.

⁶ Man adhura ma wubimio ni Julawi, gibibedo adhura abusiel ni karingo, ma wubimio kara janek uring i ie: man wubimio adhura pier ang’wen wi ario umed maeni.

⁷ Adhura ceke ma wubimio ni Julawi bibedo adhura pier ang’wen wi abora: wubimiogi ku kakwacne.

⁸ Man pir adhura ma wubimio kud i kind piny mi nyithindho mir Israel, ku kind dupa wubigamu dupa; man ku kind ma nyanok wubigamu nyanok: ku ba dhanu ku ba dhanu ng’atuman bimio adhura pare ni Julawi calkud aba pare m’egamu.

Adhura mi Karingo

⁹ Man Yehova yero ni Musa, ewacu kumae,

¹⁰ Yer ni nyithindho mir Israel, man iwac igi kumae, Kinde ma wukadhu Yordan i ng’om Kanan,

¹¹ wubilund ketho adhura iwu ubed ni adhura mi karingo iwu, kara janek m’unego ng’atu moko aka ngo ring kuca.

¹² Man adhurane bibedo iwu ni karingo ni jaculkwor, kara janek kud utho, ma fodi k’ecungo ngo i wang’ udul mi pokolembe.

¹³ Man adhura ma wubimio bibedo iwu adhura abusiel mi karingo.

¹⁴ Wubimio adhura adek loka Yordan, man wubimio adhura adek i ng’om Kanan; gibibedo ni adhura mi karingo.

¹⁵ Ni nyithindho mir Israel, man ni jawirok, man ni umondo ma ni i kindgi, adhura abusiel maeni bibedo ni karingo: kara ku ba dhanu ku ba dhanu m’unego ng’atu moko aka ngo ecopo ringo kuca.

¹⁶ Ento tek egoye ku gin mi nyunyu, ketho nia etho, en e janek: jubiketho janek tho andha.

¹⁷ Man tek egoye ku kidi i cinge, ma dhanu copo tho kudo, e etho, en e janek: jubiketho janek tho andha.

¹⁸ Kadi tek egoye ku gin mi yen i cinge, ma dhanu copo tho kudo, e etho, en e janek: e jubiketho janek tho andha.

¹⁹ Jaculrimo biketho janek tho en gire: kinde m’erombo kude, ebinege.

²⁰ Man tek ecobe mir adegi, kadi ecanye, m’ekanu adhi, ketho nia etho,

²¹ kadi egoye ku cinge kum adegi, ketho nia etho; ng’atu m’ugoye jubinege andha; en e jakwor: jaculrimo binego jakwor, kinde m’erombo kude.

²² Ento tek ecobe yuth ma adegi mbe, kadi tek ecanye ku gin moko ma k’ekanu adhi ngo,

²³ kadi ku kidi moko, ma dhanu tho ko, m’enene ngo, man ebole i kume, ketho nia etho, man en e jadegine ngo, kadok time rac de eyenyo ngo:

²⁴ udul bilund poko lembe i kind jagoc giku jaculrimo calku lembapoka maeni;

²⁵ e udul bibodho janek kud i cing’ jaculrimo, man udul bidwoke bang’ adhura pare mi karingo, m’eringo i ie: man ebibedo i ie maram jalam ma dit bitho ko, ma juwire ku mo ma leng’.

²⁶ Ento tek janek bikadhu kieu mir adhura mi karingo nindo moko, m’eringo i ie,

²⁷ man jaculrimo nwang’e cen ku Icieu mir adhura pare mi karingo, man jaculrimo nego jakwor; dubo mi rimo bibedo i wie ngo,

²⁸ kum maku edong’ i adhura pare mi karingo maram jalam ma dit utho ko; ento yo ng’ei tho pa jalam ma dit janek copo dok i ng’om mi piny pare.

Cik pi Jumulembe ku Jamb war

²⁹ E gin maeni bibedo iwu ni cik ku lembapoka cil ni dhanum’utuk mu kpo i udi mu ceke.

³⁰ Ng’atu ma tek unego ng’atu moko, jubinego janekne i dhu jumulembe: ento jamulembe acel kud utuc kum ng’atu moko ketho etho.

³¹ Man kendo wubigamu jambwar mi kwo pa janek ungo, ma dubo mi tho ni i wie: ento jubiketho etho andha.

³² Man wubigamu jambwar pi ng’atu m’uringo bang’ adhura pare rai karingo ngo, kara edok ebed i ng’om kendo, maram jalam utho ko.

³³ Kum kumeno wubicido ng’om ungo ma wubedo i ie: kum rimo, ecido ng’om; man adunya mbe ma jucopo dunyo ko ng’om kum rimo ma juewiro i ie, ndhu rimo pa ng’atu m’ucwire.

³⁴ Man ibicido ng’om ma wubedo i ie ngo, m’abedo i kinde: kum an, an a Yehova, abedo i dier nyithindho mir Israel.