Kitabu Mir Ang’wende Pa Musa Wel 34 - The Holy Bible In Alur (Lur) Revised Orthography

¹ Man Yehova yero ni Musa, ewacu kumae,

² Ng’ol ni nyithindho mir Israel, man iwac igi kumae, Kinde ma wumondo i ng’om Kanan (maeni ng’om ma bipodho iwu ni aba, en e ng’om mi Kanan calku kieune),

³ ng’ete mu mir ang’wende ma yor ariwa ma piny bilund gambre kum langa mi Zin kadhu i ng’et Edom, man kieu mu ma yor ariwa ma piny bigambre kum kajik mi Nam Kadu yo nyangu;

⁴ man kieu mu bilokre yor ariwa ma piny ba kaidho mir Akrabim, man ebikadhu Zin; man kawokne bibedo yor ariwa ma piny ni Kadec-barnea; man ebikadhu bang’ Hazar-adar, man ebikadhu cil kum Azmon;

⁵ man kieu bilokre ku ba Azmon tundo ba kulo mi Misiri, man kawokne bibedo dhu nam.

⁶ Man mi kieu ma yo reto, wubibedo ku nam ma dit ku kieune: maeni bibedo kieu mu ma yo reto.

⁷ Man maeni bibedo kieu mu ma yor ariwa ma malu: ugambre kum nam ma dit wubiporo iwu got Hor;

⁸ ugambre kum got Hor wubiporo kum kamondo mir Hamath; man kawok mi kieune bibedo Zedad;

⁹ man kieu bitundo ba Zifron, man kawokne bibedo Hazar-enan: maeni bibedo kieu mu ma yor ariwa ma malu.

¹⁰ Man wubiporo kieu mu ma yo nyangu gambre Hazar-enan tundo kum Cefam;

¹¹ man kieu biloro piny gambre Cefam tundo kum Ribla, i ng’et Ain ma yo nyangu; e kieu biloro piny, man ebitundo ba ng’et nam mi Cinereth yo nyangu;

¹² man kieu biloro piny ba Yordan, man kawokne bibedo ba Nam Kadu. Maeni bibedo ng’om mu calku kieune m’utieke gbur.

¹³ E Musa ng’olo ni nyithindho mir Israel, ewacu kumae, Maeni ng’om ma wubimaku ku gagi, ma Yehova ng’olo ya jumi ni suru abung’wen, man ni ng’et suru:

¹⁴ kum suru mi nyithindho pa Ruben calku udi pa weggi, man suru mi nyithindho pa Gad Calku udi pa weggi, gimaku, man ng’et suru pa Manase maku, aba migi:

¹⁵ suru ario ku ng’et suru gimaku aba migi loka Yordan, ba Yeriko yo nyangu, yo ku wokceng’.

¹⁶ Man Yehova yero ni Musa, ewacu kumae,

¹⁷ Maeni nying’ dhanu ma bipoko ng’om iwu ni aba: Eleazar ma jalam, man Yocuwa ma wod Nun.

¹⁸ Man wugam jaditmawijo acel ku ba sum, upok ng’om ni aba.

¹⁹ E maeni gi nying’ dhanune: Mi suru pa Yuda, Kaleb ma wod Yefune.

²⁰ Man mi suru mi nyithindho pa Simeon, Cemuel ma wod Amihud.

²¹ Mi suru pa Benyamin, Elidad ma wod Kislon.

²² Man mi suru mi nyithindho pa Dan jaditmawijo, Buki ma wod Yogli.

²³ Mi nyithindho pa Yusuf; mi suru mi nyithindho pa Manase jaditmawijo, Haniel ma wod Efod,

²⁴ Man mi suru mi nyithindho pa Efraim jaditmawijo, Kemuel ma wod Ciftan,

²⁵ Man mi suru mi nyithindho pa Zebulun jaditmawijo, Elizafan ma wod Parnak.

²⁶ Man mi suru mi nyithindho pa Isakar jaditmawijo, Paltiel ma wod Azan.

²⁷ Man mi suru mi nyithindho pa Acer jaditmawijo, Ahihud ma wod Celomi.

²⁸ Man mi suru mi nyithindho pa Naftali jaditmawijo, Pedahel ma wod Amihud.

²⁹ Maeni ju ma Yehova ng’olo ya upok aba ni nyithindho mir Israel i ng’om Kanan.