Kitabu Mir Ang’wende Pa Musa Wel 31 - The Holy Bible In Alur (Lur) Revised Orthography

Culo Kwor mi Jumidiani ku Dwokrileng’ mi Dhanu ma Juyaku

¹ E Yehova yero ni Musa, ewacu kumae,

² Cul kwor mi nyithindho mir Israel kum Jumidiani: yo ku ng’eye jubicoki ba juthu.

³ E Musa yero ni dhanu, ewacu kumae, Wurony jamtho kum dhanu m’i kindwu mir ali, kara gicidh i kum Midian, kara gicul kwor pa Yehova i kum Midian.

⁴ Ku ba suru ceke wuwodh rubanga acel, i kind suru ceke mir Israel, wuorgi ba lwiny.

⁵ Kum kumeno jumio, kud i rubanga mir Israel, rubanga acel ku ba suru ku ba suru, rubanga apar wi ario m’ubedo aronya mir ali.

⁶ E Musa orogi, rubanga ku ba suru ku ba suru, ba lwiny, gin giku Finehaz ma wod Eleazar ma jalam, ba lwiny, karacelo kud agulu mi kamaleng’ kud agwara mi poi i cinge.

⁷ E gikiedo kum Midian, calu Yehova ng’olo ni Musa; man ginego co kubang’gi kubang’gi.

⁸ Man ginego ubimo mi Midian karacelo ku dhanu migi ma junego: en e Evi, ku Rekem, ku Zur, man Hur, ku Reba, gin ubimo abic mi Midian: Balam bende ma wod Beor ginego ku palamularu.

⁹ E nyithindho mir Israel giyaku mon mi Midian ku nyithindhgi ma thindho; ku lim migi ceke, man udul rombe migi ceke, man piny migi ceke, giyaku ni amaci.

¹⁰ E adhura migi ceke i ka ceke ma gibedo i ie, ku kagonjo migi ceke, giwang’u ku mac.

¹¹ E giyaku ayeki ceke, kud amaci ceke, mi dhanu man mi lim.

¹² Man gikelo ng’eca, kud amaci, man ayeki, ba Musa, man ba Eleazar ma jalam, man bang’ udul mi Dyithindho mir Israel, ba kagonjo i pambu mi Moab, ma en e i ng’et Yor dan kum Yeriko.

¹³ E Musa, giku Eleazar ma jalam, ku judongomawijo ceke mir udul, giwok woko nirombo kugi yo ng’ei kagonjo.

¹⁴ Man kwinyo nego Musa kum jego mir udul, en e jego mi rubanga man jego mi dak, m’uai i tic mi lwiny.

¹⁵ Man Musa wacu igi kumae, Wubodho mon ceke ma kwo?

¹⁶ Nen, joni ketho nyithindho mir Israel, ni kum lembapora pa Balam, udubo ni Yehova i lembe mi Peor, e kum kumeno thong’om ubedo i kind udul pa Yehova.

¹⁷ Ka kumeno kawono wuneg co kubang’gi kubang’gi m’i kind nyithindho ma thindho, man wuneg mon kubang’gi kubang’gi m’utig’eyo co ku vuto kude.

¹⁸ Ento nyithindho ma nyir ceke, m’ung’eyo co ngo ku vuto kude, wugwok gi ma kwo iwu giwu.

¹⁹ Man wugonj woko ng’ei kagonjo ceng’ abiro: ng’atu ma tek unego ng’atu moko, man ng’atu ma tek umulo kum jumoko ma junego, wudwokru giwu leng’ i ceng’ mir adege man i ceng’ mir abirone, wuku ng’eca mu.

²⁰ Man pi kendi ceke kubang’e kubang’e, ku gin ceke ma jutimo ku lau, ku tic ceke mi yuk diegi, ku gin ceke ma jutimo ku yen, wubidwokru giwu leng’.

²¹ Man Eleazar ma jalam uwacu ni dhanu mir ali m’ucidho ba lwiny kumae, Maeni lembang’ola mi cik ma Yehova ng’olo ni Musa:

²² ento mola ma kwar, ku mola ma tar, man mola, ku nyunyu, man umbu ma tar, ku nying atum,

²³ gin ceke ma copo nyem i mac ungo, wuketh gikadh kud i mac, e ebibedo leng’; ento wubidwoke leng’ ku pi mi cilo: man gin ceke m’unyem i mac wuketh ekadh kud i pi.

²⁴ E wubilwoko kendi mu i ceng’ mir abirone, man wubibedo leng’; e yo ku ng’eye wubimondo i kagonjo.

Jupoko Amaci ma Juyaku

²⁵ E Yehova yero ni Musa, ewacu kumae,

²⁶ Kwan wend amaci ma juyaku mi dhanu man mi lim, in, ku Eleazar ma jalam, ku wi udi mi wego mir udul;

²⁷ man wupok amaci i ng’ete ario: i kind dhanu ma gi riu i ali, m’ucidho woko ba lwiny, man udul ceke.

²⁸ Man wujok ajok ni Yehova ba dhanu mir ali ma gicidho woko ba lwiny: ku ba dak abic ku ba dak abic ng’eyong’ec acel, mi dhanu, man mi koni dhiang’, man mi kana, man mir udul rombe:

²⁹ wugame kum ng’ete migi, man wumie ni Eleazar ma jalam, ni lam m’ating’a pa Yehova.

³⁰ Man kum ng’ete mi nyithindho mir Israel, ibigamu acel ma juwodho kud i kind pier abic kubang’gi kubang’gi, mi dhanu, mi koni dhiang’, mi kana, man mir udul rombe, cil mi lim ceke, man; ibimiogi ni Julawi, m’ugwoko kur mi hema pa Yehova.

³¹ E Musa giku Eleazar ma jalam gitimo calu Yehova ng’olo ni Musa.

³² Nwang’u amaci, m’ukadhu piny ma dhanu mir ali giyaku, en e rombe rubanga dak abusiel ku pier abiro wi abic,

³³ man koni dhiang’ rubanga pier abiro wi ario,

³⁴ man kana rubanga pier abusiel wi acel,

³⁵ man dhanu kagi ceke gi rubanga pier adek wi ario, jumamon ma ging’eyo co ngo ku vuto kude.

³⁶ Man ng’ete, ma en e makapiny mi ju m’ucidho woko ba lwiny, welne rombe rubanga dak adek ku pier adek wi abiro ku dak abic:

³⁷ man ajok pa Yehova mi rombe en e dak abusiel ku pier abiro wi abic.

³⁸ Man koni dhiang’ gi rubanga pier adek wi abusiel; i kind maeni ajok pa Yehova en e pier abiro wi ario.

³⁹ E kana gi rubanga pier adek ku dak abic; i kind maeno ajok pa Yehova en e pier abusiel wi acel.

⁴⁰ Man dhanu gi rubanga apar wi acel; i kind maeni ajok pa Yehova en e dhanu pier adek wi ario.

⁴¹ E Musa mio ajokne, ma en e lam m’ating’a pa Yehova, ni Eleazar ma jalam, calu Yehova ng’olo ni Musa.

⁴² Man mi ng’ete mi nyithindho mir Israel, ma Musa koyo cen ku ba dhanu m’utimo ali

⁴³ (nie ng’ete mir udul en e rombe rubanga dak adek ku pier adek wi abiro ku dak abic,

⁴⁴ man koni dhiang’ rubanga pier adek wi abusiel,

⁴⁵ ku kana rubanga pier adek ku dak abic,

⁴⁶ ku dhanu rubanga apar wi abusiel),

⁴⁷ cil kind ng’ete mi nyithindho mir Israel, Musa wodho acel kud i pier abic kubang’gi kubang’gi, mi dhanu man mi lim, man emiogi ni Julawi, m’ugwoko kur mi hema pa Yehova; calu Yehova ng’olo ni Musa.

⁴⁸ Man jego ma ni wi rubanga mir udul, jego mi rubanga, man jego mi dak, gibino ceng’ni ba Musa;

⁴⁹ man giwacu ni Musa kumae, Jutic peri gikwanu wel mi dhanu mir ali ma gini the cingwa, c ng’atu acel de mbe m’urem i kindwa.

⁵⁰ Man wakelo girathiera pa Yehova, gin ma dhanu ceke kubang’gi kubang’gi ginwang’u, mi ruko mi mola ma kwar, ku nyoro mi ng’udi tielo, man gwang’, ku Jagith mir ayi, ku gwilo mi ith, man alotnbe mi bot, kara utim adunya pi ng’eyong’ec mwa i wang’ Yehova.

⁵¹ E Musa giku Eleazar ma jalam gigamu inula ma kwar i bang’gi, en e jambruko ceke m’atima.

⁵² Man mola ma kwar ceke mi lam m’ating’a ma githiero ni Yehova, mi jego mi rubanga, man mi jego mi dak, en e cekel rubanga apar wi abusiel ku dak abiro ku pier abic.

⁵³ (Kum dhanu mir ali giyaku piny, ku ba dhanu ku ba dhanu ire gire.)

⁵⁴ E Musa giku Eleazar ma jalam gigamu mola ma kwar i cing’ jego mi rubanga man mi dak, man gikele i hema mi cokri, ni poi mi nyithindho mir Israel i wang’ Yehova.