Kitabu Mir Ang’wende Pa Musa Wel 29 - The Holy Bible In Alur (Lur) Revised Orthography

¹ Man i dwi mir abirone, i ceng’ ma kwong’ane mi dwije, wubibedo ku cokri ma leng’; wubitimo tic moko ma jumuli ko ngo: en e ceng’ mi kudho agwara iwu.

² Wubithiero lam m’awang’a ni ng’wic mido ma ng’ar ni Yehova: thwon dhiang’ acel m’aradu, ku nyog rombo acel, ku nyithi nyogi rombe abiro ma rundigi acel acel ma mulima mbe i kumgi;

³ ku lam mi mogone, mogo ma yom ma jujebo ku mo, ng’ete mir apaje adek mi thwon dhiang’, man ng’ete mir apaje ario mi nyog rombo,

⁴ man ng’ete mir apaje mi nyithi rombe kubang’e kubang’e mi nyithi rombe abiro;

⁵ man nyog diel acel ni lam mi dubo, kara utim adunya piwu;

⁶ umed lam m’awang’a mi dwi m’upor, ku lam mi mogone, man lam m’awang’a ma thiri thiri ku lam mi mogone, man lam m’amadhane, calku lembapokane, ni ng’wic mido ma ng’ar, lam ma jutimo ku mac ni Yehova.

⁷ Man i ceng’ mir apaje i dwi maeni mir abirone wubibedo ku cokri ma leng’; man wubiketho can i ng’eyong’ec mu: wubitimo tic moko ma jumuli kudo ngo;

⁸ ento wubithiero lam m’awang’a ni Yehova ni ng’wic mido ma ng’ar: thwon dhiang’ acel m’aradu, ku nyog rombo acel, man nyithi nyogi rombe abiro ma rundigi acel acel; gibibedo iwu ma mulima mbe i kumgi;

⁹ ku lam mi mogone, mogo ma yom ma jujebo ku mo, ng’et apaje mir adege mi thwon dhiang’, ng’ete mir apaje ario mi nyog rombo acel,

¹⁰ ng’ete mir apaje mi nyithi rombe kubang’e kubang’e mi nyithi rombe abiro:

¹¹ nyog diel acel ni lam mi dubo; umed lam mi dubo mir adunya, ku lam m’awang’a ma thiri thiri, ku lam mi mogone, ku lam m’amadhane.

¹² Man i ceng’ apar wi abije mi dwi mir abirone wubibedo ku cokri ma leng’; wubitimo tic moko ma jumuli kudo ngo, man wubikwiro agba ni Yehova ceng’ abiro:

¹³ man wubithiero lam m’awa ng’a, lam ma jutimo ku mac, mi ng’wic mido ma ng’ar ni Yehova; thwoni dhiang’ m’aradu apar wi adek, man nyogi rombe ario, ku nyithi nyogi rombe apar wi ang’wen ma rundigi acel acel; gibibedo ma mulima mbe i kumgi;

¹⁴ ku lam mi mogone, mogo ma yom ma jujebo ku mo, ng’ete mir apaje adek mi thwoni dhiang’ kubang’e kubang’e mi thwoni dhiang’ apar wi adek, ng’ete mir apaje ario pi nyogi rombe kubang’e kubang’e mi nyogi rombe ario,

¹⁵ man ng’ete mir apaje mi nyithi rombe kubang’gi kubang’gi mi nyithi rombe apar wi ang’wen;

¹⁶ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

¹⁷ Man i ceng’ mir arionde wubithiero thwoni dhiang’ m’aradu apar wi ario, ku nyogi rombe ario, ku nyithi nyogi rombe apar wi ang’wen ma rundigi acel acel ma mulima mbe i kumgi;

¹⁸ ku lam mi mogone man lam m’amadhane mi thwoni dhiang’, mi nyogi rombe de, man mi nyithi rombe, calku wel migi, calku lembapoka;

¹⁹ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

²⁰ Man i ceng’ mir adege thwoni dhiang’ apar wi acel, ku nyogi rombe ario, man nyithi nyogi rombe apar wi ang’wen ma rundigi acel acel ma mulima mbe i kumgi;

²¹ ku lam mi mogone man lam m’amadhane mi thwoni dhiang’, man mi nyogi rombe, man mi nyithi rombe, calku wel migi, calku lembapoka;

²² man nyog diel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

²³ Man i ceng’ mir ang’wende thwoni dhiang’ apar, ku nyogi rombe ario, man nyithi nyogi rombe apar wi ang’wen ma rundigi acel acel ma mulima mbe i kumgi;

²⁴ lam mi mogone ku lam m’amadhane mi thwoni dhiang’, man mi nyogi rombe, man mi nyithi rombe, calku wel migi, calku lembapoka;

²⁵ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

²⁶ Man i ceng’mir abije thwoni dhiang’ abung’wen, ku nyogi rombe ario, ku nyithi nyogi rombe apar wi ang’wen ma rundigi acel acel ma mulima mbe i kumgi;

²⁷ ku lam mi mogone man lam m’amadhane mi thwoni dhiang’, man mi nyogi rombe, man mi nyithi rombe calku wel migi, calku lembapoka;

²⁸ man nyog diel acel ni lam mi dubo; umed lam m’awang’a ma thiri thiri, man lam mi mogone, ku lam m’amadhane.

²⁹ Man i ceng’ mir abusiende thwoni dhiang’ abora, ku nyogi rombe ario, man nyithi nyogi rombe apar wi ang’wen ma rundigi acel acel ma mulima mbe i kumgi;

³⁰ man lam mi mogone ku lam m’amadhane mi thwoni dhiang’, man mi nyogi rombe, man mi nyithi rombe, calku wel migi, calku lembapoka;

³¹ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

³² Man i ceng’ mir abirone thwoni dhiang’ abiro, ku nyogi rombe ario, man nyithi nyogi rombe apar wi ang’wen ma rundigi acel acel ma mulima mbe i kumgi;

³³ ku lam mi mogone man lam m’amadhane mi thwoni dhiang’, man mi nyogi rombe, man mi nyithi rombe, calku wel migi, calku lembapoka;

³⁴ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

³⁵ Man i ceng’ mir aborane wubibedo ku cokri ma leng’: wubitimo tic moko ngo ma jumuli kudo;

³⁶ ento wubithiero lam m’awang’a, lam ma jutimo ku mac, ni ng’wic mido ma ng’ar ni Yehova: thwon dhiang’ acel, ku nyog rombo acel, man nyithi nyogi rombe abiro ma rundigi acel acel ma mulima mbe i kumgi;

³⁷ man lam mi mogone ku lam m’amadhane mi thwon dhiang’, man mi nyog rombo, man mi nyithi rombe, bibedo calku wel migi, calku lembapoka:

³⁸ man nyog diel acel ni lam mi dubo; umed lam m’awang’a ma thiri thiri, ku lam mi mogone, man lam m’amadhane.

³⁹ Wubithiero maeni ni Yehova i agba mu ma juketho, umed lembang’ola mu, ku girathiera mu ma ku berocwiny, ni lam m’awang’a mu, man ni lam mi mogo mu, man ni lam m’amadha mu, man ni lam mi kwiocwiny mu.

⁴⁰ E Musa yero ni nyithindho mir Israel calku gin ceke ma Yehova ng’olo ni Musa.