Kitabu Mir Ang’wende Pa Musa Wel 27 - The Holy Bible In Alur (Lur) Revised Orthography

Penji mi Nyig Zelofehad

¹ Nyig Zelofehad, ma wod Hefer, ma wod Gilead, ma wod Makir, ma wod Manase, mi wat pa Manase ma wod Yusuf, ulimd ucoro ceng’ni; man maeni gi nying’ nyige: Mala, man Noa, ku Hogla, man Milka, ku Tirza.

² E gicungo i wang’ Musa, man i wang’ Eleazar ma jalam, man i wang’ judongomawijo kud udul ceke, i dhugola mi hema mi cokri, e giwacu kumae,

³ Wegwa tho i langa, man eni i kind njuru dhanu ngo m’ucokri gigi karacelo i wi Yehova i njuru dhanu pa Kora: ento etho i dubo pare gire; man wote mbe.

⁴ Nedi jukabu nying’ wegwa woko kud i kind wat pare kum wode mbe? Mi iwa piny i kind utumin wegwa.

⁵ E Musa kelo lembe migi i wang’ Yehova.

⁶ Man Yehova yero ni Musa, ewacu kumae,

⁷ Nyig Zelofehad giyero dre: ibimio igi piny mir aba andha i kind utumin weggi; man ibiketho aba pa weggi kadh i bang’gi.

⁸ Man ibiyero ni nyithindho mir Israel ibiwacu kumae, Tek dhanu tho, ma wode mbe, wubilund ketho aba pare kadh ba nyare.

⁹ Man tek nyare mbe wubilund mio aba pare ni utumin.

¹⁰ Man tek utumin umbe, wubilund mio aba pare ni utumin won.

¹¹ Man tek utumin won umbe, wulund wumi aba pare ni wat pare ma ceng’ni kude mi juudine, man ebicame: e ebibedo ni nyithindho mir Israel ni cik ku lembapoka, calu Yehova ng’olo ni Musa.

Yehova Caku Yocuwa ka Musa

¹² E Yehova wacu ni Musa kumae, Idh malu wi got maeni mir Abarim, man inen ng’om m’amio ni nyithindho mir Israel.

¹³ Man kinde m’inene, e in bende jubicoki ba juthu, calu jucoko Harun m’umeru;

¹⁴ kum wujai kum lembe para i langa mi Zin, i jai mir udul, kum dwoka leng’ dhu pi i wang’gi. (Maeni pi mi Meriba mi Kadec i langa mi Zin.)

¹⁵ E Musa yero ni Yehova, ewacu kumae,

¹⁶ Wek Yehova, ma Mungu mi tipo mi kum ceke, uketh dhanu bed wi udul,

¹⁷ ma biwok woko i wang’gi, ma bimondo i wang’gi de, ma bitelo wigi woko, man ma bikelogi i ie; kara udul pa Yehova kud ubed calu rombe ma jakwacne mbe.

¹⁸ E Yehova wacu ni Musa kumae, Gam Yocuwa ma wod Nun, ng’atu ma Tipo ni i ie, man iketh cingi i wie;

¹⁹ man ikethe i wang’ Eleazar nia jalam, man i wang’ udul ceke; man imi ire kur i wang’gi.

²⁰ Man iketh kum yung peri i wie, kara udul ceke mi nyithindho mir Israel giwor.

²¹ Man ebicungo i wang’ Eleazar ma jalam, ma bipenjo pire ku lembapoka pa Urim i wang’ Yehova: ku lembe pare gibiwok woko, man ku lembe pare gibimondo, en, ku nyithindho mir Israel ceke karacelo kude, cil udul ceke.

²² E Musa timo calu Yehova ng’olo ire; man egamu Yocuwa, man ekethe i wang’ Eleazar ma jalam, man i wang’ udul ceke:

²³ man eketho cinge i wie, emio ire kur de, calu Yehova yero ni kum Musa.