Kitabu Mir Ang’wende Pa Musa Wel 26 - The Holy Bible In Alur (Lur) Revised Orthography

Kwatiu Wel mi Juisraeli i Moab

¹ Man etimbre yo ng’ei thong’omne, nia Yehova wacu ni Musa man ni Eleazar ma wod Harun ma jalam, ewacu kumae,

² Kwan wel mir udul ceke mi nyithindho mir Israel, ugambre kum ma rundi migi pier ario man m’usagu, ku ba udi pa weggi ku ba udi pa weggi, dhanu ceke ma copo wok woko i lwiny i Israel.

³ Man Musa giku Eleazar ma jalam giweco kugi i poga mi Moab ceng’ni Yordan ba Yeriko, ewacu kumae,

⁴ Wugam wel mi dhanu, ugambre kum ma rundi migi pier ario ku ma sagu; calu Yehova ng’olo ni Musa ku nyithindho mir Israel, m’uai woko kud i ng’om Misiri.

⁵ Ruben ma kayu mir Israel; wot Ruben gi eni: pa Hanok, wat mi Juanoki; pa Palu, wat mi Jupalu;

⁶ pa Hezron, wat mi Juhezroni; pa Karmi, wat mi Jukarmi.

⁷ Maeni wat mi Jurubeni; man ju ma jukwanugi mi kindgi gi robanga pier ang’wen ku wi adek man dak abiro ku pier adek.

⁸ Man wot Palu gi eni: Eliab.

⁹ Man wot Eliab gi eni: Nemuel, ku Dathan, man Abiram. Maeni gi Dathan man Abiram maeno, ma udul ulwong’ogi, ma gipiembri ku Musa man ku Harun i njuru dhanu pa Kora, kinde ma gipiembri ku Yehova,

¹⁰ e ng’om ung’amu dhoge, man emwonyogi karacelo ku Kora, kinde ma njuru dhanu maeno tho; nindo nino mac uwang’u dhanu dak ario ku pier abic, e gidoko ni giranyutha.

¹¹ Ento, wot Kora tho ngo.

¹² Wot Simeon tok wat migi gi eni; pa Nemuel, wat mi Junemueli; pa Yamin, wat mi Juyamini; pa Yakin, wat iri Juyakini;

¹³ pa Zera, wat mi Juzerahi; pa Caul, wat mi Jucauli.

¹⁴ Maeni gi wat mi Jusimeoni, rubanga pier ario wi ario ku dak ario.

¹⁵ Wot Gad tok wat migi gi eni: pa Zefon, wat mi Juzefoni; pa Hagi, wat mi Juhagi; pa Cuni, wat mi Jucuni;

¹⁶ pa Ozni, wat mi Juozni; pa Eri, wat mi Jueri;

¹⁷ pa Arod, wat mi Juarodi; pa Areli, wat mi Juareli.

¹⁸ Maeni gi wat mi wot Gad calku ju m’i kindgi ma jukwanugi, rubanga pier ang’wen ku dak abic.

¹⁹ Wot Yuda gi eni: Er man Onan; man Er kud Onan githo i ng’om Kanan.

²⁰ Man wot Yuda tok wat migi gi eni: pa Cela, wat mi Jucelani; pa Perez, wat mi Juperezi; pa Zera, wat mi Juzerahi.

²¹ Man wot Perez gi eni: pa Hezron, wat mi Juhezroni; pa Hamul, wat mi Juhamuli.

²² Maeni gi wat pa Yuda calku ju m’i kindgi ma jukwanugi, rubanga pier abiro wi abusiel ku dak abic.

²³ Wot Isakar tok wat migi gi eni: pa Tola, wat mi Jutolai: pa Puva, wat mi Jupuni;

²⁴ pa Yacub, wat mi Juyacubi; pa Cimron, wat mi Jucimroni.

²⁵ Maeni gi wat pa Isakar calku ju m’i kindgi ma jukwanugi, rubanga pier abusiel wi ang’wen ku dak adek.

²⁶ Wot Zebulun tok wat migi gi eni: Pa Sered, wat mi Juseredi; pa Elon, wat mi Jueloni; pa Yalel, wat mi Juyaleli.

²⁷ Maeni gi wat mi Juzebuluni calku ju m’i kindgi ma jukwanugi rubanga pier abusiel ku dak abic.

²⁸ Wot Yusuf tok wat migi gi eni: Manase gikud Efraim.

²⁹ Wot Manase gi eni: pa Makir, wat mi Jumakiri; man Makir unyolo Gilead: pa Gilead, wat mi Jugileadi.

³⁰ Maeni gi wot Gilead: pa Iezer, wat mi Juiezeri; pa Helek, wat mi Juheleki;

³¹ man pa Asriel, wat mi Juasrieli; man pa Cekem, wat mi Jucekemi;

³² man pa Cemida, wat mi Jucemidai; man pa Hefer, wat mi Juheferi.

³³ Man Zelofehad ma wod Hefer wote mbe, ndhu nyige: man nying’ nyig Zelofehad gi Mala, ku Noa, man Hogla, ku Milka, man Tirza.

³⁴ Maeni gi wat pa Manase; man ju m’i kindgi ma jukwanugi gi rubanga pier abic wi ario ku dak abiro.

³⁵ Maeni gi wot Efraim tok wat migi: pa Cuthela, wat mi Jacuthelahi; pa Beker, wat mi Jubekeri; pa Tahan wat mi Jutahani.

³⁶ Man maeni gi wot Cuthela: pa Eran, wat mi Juerani.

³⁷ Maeni gi wat mi wot Efraim calku ju m’i kindgi ma jukwanugi, gi rubanga pier adek wi ario ku dak abic. Maeni wot Yusuf tok wat migi.

³⁸ Wot Benyamin tok wat migi gi eni: pa Bela, wat mi Jubelai; pa Acbel, wat mi Juacbeli; pa Ahiram, wat mi Juahirami;

³⁹ pa Cefufam, wat mi Jucefufami; pa Hufam, wat mi Juhufami.

⁴⁰ Man wot Bela gi Ard giku Naman: pa Ard, wat mi Juardi; pa Naman, wat mi Junami.

⁴¹ Maeni gi wot Benyamin tok wat migi; man ju m’i kindgi ma jukwanugi gi rubanga pier ang’wen wi abic ku dak abusiel.

⁴² Maeni gi wot Dan tok wat migi: pa Cuham, wat mi Jucuhami. Maeni gi wat pa Dan tok wat migi.

⁴³ Wat ceke mi Jucuhami, calku ju m’i kindgi ma jukwanugi, gi rubanga pier abusiel wi ang’wen ku dak ang’wen.

⁴⁴ Wot Acer tok wat migi gi eni: pa Imna, wat mi Juimni; pa Icvi, wat mi Juicvi; pa Beria, wat mi Juberi.

⁴⁵ Mi wot Beria gi eni: pa Heber, wat mi Juheberi; pa Malkiel, wat mi Jumalkieli.

⁴⁶ Man nying’ nyar Acer en e Sera.

⁴⁷ Maeni wat mi wot Acer calku ju m’i kindgi ma jukwanugi, gi rubanga pier abic wi adek ku dak ang’wen.

⁴⁸ Wot Naftali tok wat migi gi eni: pa Yazel, wat mi Juyazeli; pa Guni, wat mi Juguni;

⁴⁹ pa Yezer, wat mi Juyezeri; pa Cilem, wat mi Jucilemi.

⁵⁰ Maeni gi wat pa Naftali calku wat migi; man ju m’i kindgi ma jukwanugi gi rubanga pier ang’wen wi abic ku dak ang’wen.

⁵¹ Maeni gi ju ma jukwanugi mi nyithindho mir Israel, rubanga dak abusiel kud acel ku dak abiro ku pier adek.

Jubipoko Ng’om ku Gagi

⁵² Man Yehova yero ni Musa, ewacu kumae,

⁵³ Jubipoko ng’om ni joni ni aba calku wel nying’.

⁵⁴ Ni ju m’usagu mi aba m’usagu, man ni ju ma nok mi aba ma nok: jubimio abane ni dhanu kubang’gi kubang’gi calku ju ma jukwanu ma pare.

⁵⁵ Ento, jubipoko ng’om ku gagi: gibimaku aba calku nying’ suru pa weggi.

⁵⁶ Jubipoko aba migi calku gagi kind ma dit ku ma nok.

Thek pa Lawi

⁵⁷ Man maeni gi ju ma jukwanu mi Julawi tok wat migi: pa Gercon, wat mi Jugerconi: pa Kohath, wat mi Jukohathi: pa Merari, wat mi Jumerari.

⁵⁸ Maeni gi wat pa Lawi: wat mi Julibni, man wat mi Juhebroni, man wat mi Jumali, ku wat mi Jumuci, man wat mi Jukorahi. Man Kohath unyolo Amram.

⁵⁹ Man nying’ dhaku pa Amram en e Yokebed, ma nya Lawi, ma junyolo ni Lawi i Misiri: e enyolo Harun giku Musa man Miriem ma nyameggi ni Amram.

⁶⁰ Man junyolo Nadab gikud Abihu, man Eleazar giku Ithamar ni Harun.

⁶¹ Man Nadab gikud Abihu githo, kinde ma githiero mac ma tung’ i wang’ Yehova.

⁶² Man ju m’i kindgi ma jukwanugi gi rubanga pier ario wi adek, co kubang’gi kubang’gi ugambre kum mi dwi acel ku ma sagu: kum jukwanugi ngo i kind nyithindho mir Israel, kum aba mbe ma jumio igi i kind nyithindho mir Israel.

Kaleb giku Yocuwa Kendgi ma Gidong’

⁶³ Maeni gi ju ma Musa giku Eleazar ma jalam gikwanu, ma gikwanu nyithindho mir Israel i poga mi Moab dhu Yordan ba Yeriko.

⁶⁴ Ento ng’atu moko mbe i kind joni ma Musa giku Harun ma jalam gikwanugi, ma gikwanu nyithindho mir Israel i langa mi Sinai.

⁶⁵ Kum Yehova wacu pigi kumae, Gibitho i langa andha. Man ng’atu acel de mbe i kindgi m’udong’, ndhu Kaleb ma wod Yefune, man Yocuwa ma wod Nun.