Kitabu Mir Ang’wende Pa Musa Wel 25 - The Holy Bible In Alur (Lur) Revised Orthography

Israel Urwo ni Bal-peor

¹ E Israel ubedo i Citim; e dhanu gimaku timo tarwang’ ku nyig Moab:

² kum gilwong’o dhanu ba lam mi mungu migi; e dhanu gicamu, man girumbri ni mungu migi.

³ E Israel uribre ku Bal-peor: e ng’ecwiny pa Yehova opo kum Israel.

⁴ Man Yehova wacu ni Musa kumae, Gam rwodhi mi dhanu ceke, man iliergi i wang’ ceng’ malu ni Yehova, kara ng’ecwiny pa Yehova ma lake tek ulokre cen kum Israel.

⁵ E Musa wacu ni jupoklembe mir Israel kumae, Ku ba dhanu ku ba dhanu ng’atuman uneg dhanu pare m’uribre ba Bal-peor.

⁶ Man, nen, ng’atu acel ma kind nyithindho mir Israel ubino man ekelo dhaku ma Nyamidiani ba utumin mire i wang’ Musa, man i wang’ udul mi nyithindho mir Israel ceke, kinde ma gibeywak i dhugola mi hema mi cokri.

⁷ Man kinde ma Finehas, ma wod Eleazar, ma wod Harun ma jalam, uneno maeni, eai malu kud i kind udul, man eting’o tong’ i cinge;

⁸ man elubo tok Jaisraeli i hema, man ecobogi plu gin ario, ng’atu ma Jaisraeli giku dhakune de ecobogi plu. Kum kumeno thong’om ucok i kum nyithindho mir Israel.

⁹ Nwang’u ju m’utho ku thong’omne gi rubanga pier ario wi ang’wen.

¹⁰ E Yehova yero ni Musa, ewacu kumae,

¹¹ Finehas, ma wod Eleazar, ma wod Harun ma jalam, uloko kwinyo para woko i kum nyithindho mir Israel, kum nyeko time ku nyeko para i kindgi, ketho nia anyotho nyithindho mir Israel ungo kum nyeko para.

¹² Kum kumeno wac kumae, Nen, amio ire lembariba para mi kwiocwiny:

¹³ man ebibedo ire, man ni nyikwaye yo ng’eye, lembariba mi lamu lam mi nja; kum nyeko time pi Mungu pare, man etimo adunya pi nyithindho mir Israel.

¹⁴ Nwang’u nying’ Jaisraeli ma junego, ma junego karacelo ku Nyamidiani, en e Zimri, ma wod Salu jaditmawijo mi ot pa wego i kind Jusimeoni.

¹⁵ Man nying’ dhaku ma Nyamidiani ma junego en e Kozbi, ma nya Zur; en e wi dhanu mi ot pa wego i Midian.

¹⁶ E Yehova yero ni Musa, ewacu kumae,

¹⁷ Wusend Jumidiani, man wugoigi;

¹⁸ kum gisendowu kud abidhe migi, ma gibombo ko wu i lembe mi Peor, man i lembe pa Kozbi, ma nya jaditmawijo mi Midian, ma nyameggi, ma junego i ceng’ mi thong’om mi lembe mi Peor.