Kitabu Mir Ang’wende Pa Musa Wel 24 - The Holy Bible In Alur (Lur) Revised Orthography

¹ Man kinde ma Balam uneno nia enyayu mutoro i Yehova ya emi mugisa ni Israel, ecidho ngo, calu nindo mucelo, kara eromb kud ajoga, ento eketho wang’e yo ba langa.

² E Balam uting’o wang’e, man eneno Israel ubedo calku suru migi; e Tipo pa Mungu bino i wie.

³ Man eting’o lembabola pare, e ewacu kumae, Balam ma wod Beor uwacu, Man ng’atu ma wang’e mire wacu;

⁴ Ewacu, ng’atu m’uwinjo lembe pa Mungu, M’uneno ginm’uwokiwang’ pa Jategokpo, M’upodho piny, ma wang’e de bedo ayaba:

⁵ E Yakobo, hema peri ber mire ma, E Israel, hema peri mire ma!

⁶ Gimoiri calu poga, Calu podho m’i ng’et kulo, Calu yen ma ng’wice ng’ar ma Yehova pidho, Calu yend musonge m’i ng’et pi.

⁷ Pi bithwogie ku i agulu pare, Man kodhine bibedo i pi dupa, Man ubimo pare bibedo malu ma sagu Agag, Man ker pare bidodre malu.

⁸ Mungu wodhe woko kud i Misiri; Tego pare ve pa jobi: Ebicamu thek ma jusendne, Man ebituro cogo migi nziki nziki, Man ebigoyogi dra kud athero pare.

⁹ Enyoc, eriebre piny calu umvor, Man calu min umvor; ng’a ma bipoye juk malu? Mugisa bed wi dhanu ceke kubang’gi kubang’gi m’umio mugisa iri, Man lam ubed wi dhanu ceke kubang’gi kubang’gi m’ulemi.

Ewolembe pa Balam

¹⁰ E ng’ecwiny pa Balak uopo kum Balam, man epadu cinge karacelo; e Balak uwacu ni Balam kumae, Alwong’i kara ilam judegina, man, nen, imio mugisa igi andha wang’ adek maeni.

¹¹ Ka kumeno kawono ring i kakeri: nwang’u ia wacu nia adodi ni yung ma dit; ento, nen, Yehova ceri ni yung.

¹² E Balam uwacu ni Balak kumae, An bende ayero ni jukwenda peri ngo m’ioro i bang’a, awacu kumae,

¹³ Kadok Balak mi ira ot pare pong’ ku mola ma tar ku mola ma kwar, acopo kadhu ku wi lembe pa Yehova ngo, m’atim ko ber kadi rac ku pidoia gira; gin ma Yehova yero, maeca e m’abiyero?

¹⁴ Man kawono, nen, adok ba dhanu para: koibin, man abiewo iri gin ma dhanu maeni bitimo kum dhanu peri i ceng’ ma cen.

¹⁵ Man eting’o lembabola pare, man ewacu kumae, Balam ma wod Beor uwacu, E ng’atu ma wang’e mire wacu;

¹⁶ Ewacu, ng’atu m’uwinjo lembe pa Mungu, Man m’ung’eyo ng’eyong’ec pa Ng’atu ma Malu Ngbir, M’uneno ginmawokiwang’ pa Jategokpo, M’upodho piny, ma wang’e de bedo ayaba:

¹⁷ Anene, ento kawono ngo; Ang’ie, ento ceng’ni ngo: Cero biai kud i Yakobo, Man uludhbim biai i kind Israel, Man ebigoyo i gui mi Moab, Man ebituro wot yakni ceke piny.

¹⁸ Man Edom bibedo ni pinym’amwonya, Seir bende bibedo ni pinym’amwonya, ma naka judegine; Kinde ma Israel utimo ku kero.

¹⁹ Man ng’atu acel biai kud i Yakobo m’ebicamu ker, Man ebinyotho donge m’udong’ kud i adhura.

²⁰ Man eneno wi Amalek, e eting’o lembabola pare, man ewacu kumae, Naka Amalek en e ma kwong’a mi thek: Ento kajikne ma cen biwok i nyoth.

²¹ Man eneno wi Jakeni, e eting’o lembabola pare, man ewacu kumae, Kabedo peri e tek, Man uthac peri kethre i cana.

²² Ento jubinyotho Kain, Maram Ascur bitere ko i ng’eca.

²³ Man eting’o lembabola pare, man ewacu kumae, E akayo, ng’a ma bibedo kwo kinde ma Mungu timo maeni?

²⁴ Ento combo biai dhu Kitim, Man gibisendo Ascur, man gibisendo Eber; E en bende ebiwok ni nyoth.

²⁵ E Balam uai malu, e ecidho edok i pacu pare; man Balak bende cidho i yo pare.