Kitabu Mir Ang’wende Pa Musa Wel 23 - The Holy Bible In Alur (Lur) Revised Orthography

¹ E Balam uwacu ni Balak kumae, Gur ira pemblam abiro keni, man iyik ira thwoni dhiang’ abiro keni ku nyogi rombe abiro.

² E Balak utimo calu Balam uyero; e Balak giku Balam githiero thwon dhiang’ ku nyog rombo wi pemblam kubang’gi kubang’gi.

³ E Balam uwacu ni Balak kumae, Cung ba lam m’awang’a peri, man abicidho: kuno nyo Yehova bibino waromb kude; man gin ceke ma tek enyutho ira abiyero iri. E ecidho eidho wi nyathi got.

Balam Umio Mugisa wi Israel

⁴ E Mungu rombo ku Balam: man ewacu ire kumae, Ayiko pemblam abiro, man athiero thwon dhiang’ ku nyog rombo i wie kiibang’e kubang’e.

⁵ E Yehova ketho lembe i dhu Balam, man ewacu kumae, Dok ba Balak, man iyer kumeni.

⁶ E edok i bang’e, man, nen, ecungo vut lam m’awang’a pare, en, ku judongomawijo ceke mi Moab,

⁷ Man eting’o lembabola pare, man ewacu kumae, Balak ugama ku i Aram, En e ubimo mi Moab kud i gudi ma yo Nyangu: Koibin, ilam ira Yakobo, Man ibin, idhunj ni Israel.

⁸ Abilamu nenedi, ma Mungu kulamu ngo? Man abidhunjo nenedi, ma Yehova kudhunjongo?

⁹ Kum ku wi cana anene, Man ku bang’ ungulu got ang’ie: Nen, en e dhanu m’ubedo kende, Man jubikwane ngo kind thek.

¹⁰ Ng’a ma copo kwanu utur pa Yakobo, Kadi turo wel mi ng’et Israel mir ang’wende? Wek atho tho pa jabero, Man wek kajikna bed calu pare!

¹¹ E Balak uwacu ni Balam kumae, Itimo ang’o i bang’a? Agemi kara ilam judegina, man, nen, imio mugisa igi andha.

¹² E eloko lembe man ewacu kumae, Maku kud aketh cwinya kara ayer gin ma Yehova ketho i dhoga?

¹³ E Balak uwacu ire kumae, Akwei, koibin kuda i kamange, ku ka m’icopo nenogi i ie; e ibineno ng’etgi ma yo woko kende, man ibinenogi ceke ngo: man ibilamugi ira ku kuca.

¹⁴ Man etere i podho pa Zofim, wi usimbru Pisga, man eguro pemblam abiro, e ethiero thwon dhiang’ ku nyog rombo wi pemblam kubang’e kubang’e.

¹⁵ Man ewacu ni Balak kumae, Cung ba lam m’awang’a peri keni, ka wacirombo ku Yehova kuca.

¹⁶ E Yehova rombo ku Balam, man eketho lembe i dhoge, ewacu kumae, Dok ba Balak, man iwac kumeni.

¹⁷ Man ebino i bang’e, man, nen, ecungo vut lam m’awang’a pare, ku judongomawijo mi Moab karacelo kude. E Balak uwacu ire kumae, Yehova yero ang’o?

¹⁸ Man eting’o lembabola pare, man ewacu kumae, Ai malu, Balak, man iwinji; Cik ithi i bang’a, in i wod Zipor:

¹⁹ Mungu en e dhanu ngo, ma nia ecwayu ndra, Kadok wod dhanu de, ma nia eloko cwinye: Ewacu, man ebitime ngo? Kadi eyero, man ebiketho etundo kakare ngo?

²⁰ Nen, jung’olo ira ya ami mugisa: Man emio mugisa, e acopo loke ngo.

²¹ Eneno dubo i Yakobo ngo; Kadok kier de eneno ngo i Israel: Yehova Mungu pare ni karacelo kude, Man kok mir ubimo ni i kindgi.

²² Mungu wodhogi woko kud i Misiri; Ebedo ku tego ma ve jobi.

²³ Ajoga mbe ku Yakobo andha; Kadok ewo lembe moko de mbe kind Israel: Kawono jubiwacu pi Yakobo man pir Israel kumae, A Mungu timo meni ba!

²⁴ Nen, dhanune giai malu calu min umvor, Man calu thwon umvor etingre gire malu: Ebivuto piny ungo cil m’ecamu ko ayeki ngo, Man cil m’emadhu ko rimb ju ma junegogi.

²⁵ E Balak uwacu ni Balam kumae, Kadok alama kud ilamgi ki, kadi mugisa de kud imi igi ki.

²⁶ Ento Balam uloko lembe man ewacu ni Balak kumae, Ayero iri ngo, awacu kumae, Gin ceke ma Yehova yero, eca akoatim be?

²⁷ E Balak uwacu ni Balam kumae, Koibin kawono, abiteri kamange: kuno nyo ebiyire ni Mungu nia ilamgi ira ku kuca.

²⁸ E Balak utero Balam bang’ usimbru Peor, ma neno piny wi ng’om ngele.

²⁹ E Balam uwacu ni Balak kumae, Gur ira pemblam abiro keni, man iyik ira keni thwoni dhiang’ abiro man nyogi rombe abiro.

³⁰ E Balak utimo calu Balam uwacu, man ethiero thwon dhiang’ ku nyog rombo wi pemblam kubang’e kubang’e.