Kitabu Mir Ang’wende Pa Musa Wel 21 - The Holy Bible In Alur (Lur) Revised Orthography

Jukanani Gikiedo ku Israel

¹ Man Jakanani, m’ubimo mir Arad, m’ubedo yor ariwa ma piny, uwinjo nia Israel ubebino i yo mir Atharim; man ekiedo kud Israel, e eyaku kindgi ni ng’eca.

² E Israel ung’olo lembang’ola ni Yehova, man giwacu kumae, Tek ibimio dhanu maeni i cinga andha, abilund nyotho adhura migi kot.

³ E Yehova winjo dwand Israel, man emio Jukanani; e ginyothogi kot kud adhura migi: man nying’ kakeca julwong’o Horma.

Thwol ma Ve Mac

⁴ Man giwotho ugambre kum got Hor ku yo ba Nam Makwar, kara giwir ng’om Edom: e ng’eyong’ec mi dhanu dieng’ dit kum yoje.

⁵ Man dhanu weco rac kum Mungu, man kum Musa kumae, Pirang’o wuwodhowa woko ku i Misiri kara watho i langa? kum kwen umbe, pi de mbe; man ng’eyong’ec mwa dagu kwen ma yot maeni.

⁶ E Yehova oro thwol ma ve mac i kind dhanu, e gitong’o dhanu; man dhanu mir Israel utho dupa.

⁷ E dhanu bino ba Musa, man giwacu kumae, Wadubo, kum waweco rac kum Yehova, man i kumi; kwai Yehova, kara ekab thwol woko kud i bang’wa. E Musa rwo pi dhanune.

⁸ E Yehova wacu ni Musa kumae, Thiedh iri thwol ma ve mac, man idhoke kum yen: man ebitimbre, nia ku ba dhanu ceke ma thwol utong’ogi, kinde m’enene, ebikwo.

⁹ Man Musa thiedho thwol mi mola, man edhoke kum yen: e etimbre, nia tek thwol utong’o ng’atu moko, kinde m’eneno ba thwol mi mola, ebedo kwo.

Juisraeli Urobo Ng’et Moab

¹⁰ Man nyithindho mir Israel uwotho, e gigonjo i Oboth.

¹¹ Man giwotho ugambre Oboth, e gigonjo i Iyeabarim, i langa ma ni i wang’ Moab, yor i kawok ceng’.

¹² Giwotho ugambre kuca, man gigonjo i poga mi Zered.

¹³ Giwotho ugambre kuca, man gigonjo loka Arnon, ma eni i langa, m’uai kud i kieu mi Juamori: kum Arnon en e kieu mi Moab, i kind Moab ku Juamori.

¹⁴ Kum kumeno juwacu i kitabu mi Lwiny pa Yehova kumae, Vaheb i Sufa, Ku poga mir Arnon,

¹⁵ Man ng’et poga m’alora M’ulengre yo ba udi mir Ar, Man m’ujengre wi kieu mi Moab,

¹⁶ Man ugambre keca giwotho kum Ber: ma en e kulo m’atong’a ma Yehova wacu pire ni Musa kumae, Cok dhanu karacelo, man abimio igi pi.

¹⁷ Israel ulund uwero wer maeni: Por malu, E kulo m’atong’a; wuwer i bang’e:

¹⁸ Kulo m’atong’a, ma judongomawijo tong’o, Ma judong dhanu tong’o, Kud uluth p’ubimo, man ku yen migi. Man giai i langa giwotho kum Matana;

¹⁹ man giai Matana giwotho kum Nahaliel; man ugambre Nahaliel giwotho kum Bamoth;

²⁰ man giai Bamoth gicidho i poga ma ni i podho mi Moab, wi usimbru Pisga, ma neno piny wi ng’om ngele.

Israel Uvoyo Sihon

²¹ E Israel uoro jukwenda ba Sihon m’ubimo mi Juamori, ewacu kumae,

²² Wek akadh kud i ng’om peri: wabikier cen i podho ngo, kadi i podho mir ulok de ngo; wabimadhu kum pi mi kulo m’atong’a ngo: wabiwotho i ngudru p’ubimo, maram wakadhu ko kieu peri.

²³ E Sihon uyio ngo nia Israel ukadh kud i kieu pare: ento Sihon ucoko dhanu pare ceke karacelo, man gitero ali bang’ Israel i langa, man ewok i Yahaz; e ekiedo kud Israel.

²⁴ Man Israel ugoye ku lak palamularu, e emwonyo ng’om pare ugambre Arnon cil kum Yabok, cik ba nyithindho mir Arnon; kum kieu mi nyithindho mir Amon e tek.

²⁵ E Israel uyaku adhura maeni ceke: man Israel ubedo i adhura ceke mi Juamori, i Hecbon, man i pacune ceke.

²⁶ Kum Hecbon en e adhura pa Sihon m’ubimo mi Juamori, m’ukiedo kud ubimo ma kwong’a mi Moab, man eyaku ng’om pare ceke kud i cinge, cil kum Arnon.

²⁷ Kum kumeno ju m’uweco ku lembrieko giwacu kumae, Wubin ba Hecbon; Wuwek adhura pa Sihon ugombre man enyang’:

²⁸ Kum mac uai kud i Hecbon, Lebmac ku i adhura pa Sihon: Ewang’u Ar mi Moab, Rwodhi mi ka ma malu mir Amon.

²⁹ Can i wii, Moab! Inyothri, E dhanu mi Kemoc: Emio wote calu ju m’uringo, Man nyige ni ng’eca, Ni Sihon m’ubimo mi Juamori.

³⁰ Wakilogi; Hecbon unyothre cil ba Dibon, Man wanyotho cil kum Nofa, M’utundo kum Medeba.

Israel Uvoyo Og mi Bacan

³¹ Kum kumeno Israel ubedo i ng’om mi Juamori.

³² E Musa oro jucijulib Yazer; e giyaku pacune; man giriemo Juamori ma ni kuca woko.

³³ Man gilokri giidho malu ku yo mi Bacan; e Og m’ubimo mi Bacan uwok woko i wigi, en ku dhanu pare ceke, ku lwiny i Edrei.

³⁴ Man Yehova wacu ni Musa kumae, Kud ilwore: kum amie i cingi, ku dhanu pare ceke, man ng’om pare; e ibitimo i bang’e calu itimo kum Sihon m’ubimo mi Juamori, m’ubedo i Hecbon.

³⁵ Kum kumeno gigoye, ku wote man dhanu pare ceke, maram acel de mbe m’udong’ ire: e gimwonyo ng’om pare.