Kitabu Mir Ang’wende Pa Musa Wel 2 - The Holy Bible In Alur (Lur) Revised Orthography

Karamb Gonjo ku ba Suru mi Juisraeli man Judongo mi Wigi

¹ Man Yehova yero ni Musa giku Harun, ewacu kumae,

² Nyithindho mir Israel bigonjo kubang’gi kubang’gi ng’atuman bang’ abera pare gire, ku giranyutha mi udi pa weggi: gibigonjo gbur ng’et hema mi cokri.

³ Man ju m’ugonjo i ng’ete ma yo nyangu yo ku wokceng’ gibibedo mir abera mi gonjo pa Yuda, calkud udul migi: man Nacon ma wod Aminadab bibedo jadit mi nyithindho pa Yuda.

⁴ Man udul pare, kuju ma jukwanu welgi, gi rubanga pier abiro wi ang’wen ku dak abusiel.

⁵ Man ju m’ugonjo i ng’ete bibedo suru pa Isakar: man Nethanel ma wod Zuar bibedo jadit mi nyithindho pa Isakar.

⁶ Man udul pare, ku ju ma jukwanu welgi, gi dhanu rubanga pier abic wi ang’wen ku dak ang’wen.

⁷ Man suru pa Zebulun: Eliab ma wod Helon bibedo jadit mi nyithindho pa Zebulun.

⁸ Man udul pare, ku ju ma jukwanu welgi, gi dhanu rubanga pier abic wi abiro ku dak ang’wen.

⁹ Dhanu ceke ma jukwanu welgi mi gonjo pa Yuda gi rubanga dak acel ku pier abora wi abusiel ku dak ang’wen calkud udul migi. Gibilar tugo woth.

¹⁰ Abera mi gonjo pa Ruben calkud udul migi bibedo i ng’ete ma yor ariwa ma piny: man Elizur ma wod Cedeur bibedo jadit mi nyithindho pa Ruben.

¹¹ Man udul pare, ku ju ma jukwanu welgi, gi rubanga pier ang’wen wi abusiel ku dak abic.

¹² Man ju ma bigonjo i ng’ete bibedo suru pa Simeon: man Celumiel ma wod Zuricadai bibedo jadit mi nyithindho pa Simeon.

¹³ Man udul pare, ku ju ma jukwanu welgi, gi rubanga pier abic wi abung’wen ku dak adek.

¹⁴ Man suru pa Gad: Eliasaf ma wod Reuel bibedo jadit mi nyithindho pa Gad.

¹⁵ Man udul pare, ku ju m’i kindgi ma jukwanu welgi, gi rubanga pier ang’wen wi abic ku dak abusiel ku pier abic.

¹⁶ Dhanu ceke ma jukwanu mi gonjo pa Ruben gi rubanga dak acel ku pier abic wi acel ku dak ang’wen ku pier abic, calkud udul migi. E gibitugo woth mir arionde.

¹⁷ E hema mi cokri bilund tugo woth, karacelo ku gonjo mi Julawi i kind gonjo: calu gigonjo, gibitugo woth kumeca, ku ba dhanu ceke ng’atuman i kakare, kum abera migi.

¹⁸ Abera mi gonjo pa Efraim bibedo nuti i ng’ete ma yo reto calkud udul migi: man Elicama ma wod Amihud bibedo jadit mi nyithindho pa Efraim.

¹⁹ Man udul pare, ku ju m’i kindgi ma jukwanu welgi, gi rubanga pier ang’wen ku dak abic.

²⁰ Man suru pa Manase bibedo i ng’ete: man Gamaliel ma wod Pedazur bibedo jadit mi nyithindho pa Manase.

²¹ Man udul pare, ku ju m’i kindgi ma jukwanu welgi, gi rubanga pier adek wi ario ku dak ario.

²² Man suru pa Benyamin: Abidan ma wod Gideoni bibedo jadit mi nyithindho pa Benyamin.

²³ Man udul pare, ku ju m’i kindgi ma jukwanu welgi, gi dhanu rubanga pier adek wi abic ku dak ang’wen.

²⁴ Dhanu ceke ma jukwanu welgi mi gonjo pa Efraim gi rubanga dak acel ku wi abora ku dak acel, calkud udul migi. E gibitugo woth mir adege.

²⁵ Abera mi gonjo pa Dan calkud udul migi bibedo i ng’ete ma yor ariwa ma malu: man Ahiezer ma wod Amicadai bibedo jadit mi nyithindho pa Dan.

²⁶ Man udul pare, ku ju m’i kindgi ma jukwanu welgi, gi rubanga pier abusiel wi ario ku dak abiro.

²⁷ Man suru pa Acer gi ju ma gibigonjo i ng’ete: e Pagiel ma wod Okram bibedo jadit mi nyithindho pa Acer.

²⁸ Man udul pare, ku ju m’i kindgi ma jukwanu welgi, gi rubanga pier ang’wen wi acel ku dak abic.

²⁹ Man suru pa Naftali: Ahira ma wod Enan bibedo jadit mi nyithindho pa Naftali.

³⁰ Man udul pare, ku ju m’i kindgi ma jukwanu welgi, gi rubanga pier abic wi adek ku dak ang’wen.

³¹ Dhanu ceke ma jukwanu welgi mi gonjo pa Dan gi rubanga dak acel ku pier abic wi abiro ku dak abusiel. Gibitugo woth cen kud abera migi.

³² Maeni gi ju ma jukwanu welgi mi nyithindho mir Israel ku ba udi pa weggi ku ba udi pa weggi: dhanu ceke ma jukwanu mi gonjo calkud udul migi gi dhanu rubanga dak abusiel ku wi adek ku dak abic ku pier abic.

³³ Ento Julawi jukwanu ngo i kind nyithindho mir Israel; calu Yehova ng’olo ni Musa.

³⁴ E nyithindho mir Israel utimo kumeca; calku gin ceke ma Yehova ng’olo ni Musa, gigonjo kumeca kum abera migi, man gitugo woth kumeca, ku ba dhanu ceke ng’atuman ba wat migi, calku udi pa weggi.