Kitabu Mir Ang’wende Pa Musa Wel 16 - The Holy Bible In Alur (Lur) Revised Orthography

Kora, Dathan man Abiram Gicayu Musa

¹ Nie Kora, ma wod Izhar, ma wod Kohath, ma wod Lawi, karacelo ku Dathan man Abiram, ma wot Eliab, man On, ma wod Peleth, ma gi wot Ruben, gigamu dhanu:

² man giai malu i wang’ Musa, karacelo ku jumoko mi nyithindho mir Israel, en e judongomawijo mir udul dak ario ku pier abic, ma julwong’ogi ba cokri, dhanu ma pigi yik;

³ e gicokri gigi karacelo wi Musa man wi Harun, man giwacu igi kumae, Wutedru giwu m’usagu, kum udul ceke gi leng’, kubang’gi ceke, man Yehova ni i kindgi: pirang’o wutingru giwu wi cokri pa Yehova?

⁴ E kinde ma Musa winjo maeni, epodho arieba wang’e:

⁵ man eyero ni Kora man ni njuru dhanune ceke, ewacu kumae, Kugweno Yehova binyutho ng’atu ma pare, man ng’atu ma leng’, man ebiketho ebino ceng’ni en: en e ng’atu m’egoyo wie m’ebiketho ebino ceng’ni en.

⁶ Wutim maeni: wumak tabu, Kora, ku njuru dhanu pare ceke;

⁷ man wuketh mac i igi, man wuketh udok ma ng’wice ng’ar i wie i wang’ Yehova urwo: man ebibedo nia ng’atu ma Yehova goyo wie, ebibedo leng’: wutedru m’usagu, wu wot Lawi.

⁸ E Musa wacu ni Kora kumae, Kawono wuwinji, wu wot Lawi:

⁹ en e gin ma nok iwu, nia Mungu mir Israel ukoyowu ku kind udul mir Israel, kara ecorwu ceng’ni en gire, kara wutim giratima mi hema pa Yehova, man kara wucung i wang’ udul nitimo igi timi;

¹⁰ man nia ecori ceng’ni, ku utumeru ceke ma wot Lawi karacelo kudi? man wuyenyo lamulam bende?

¹¹ Ka kumeno in ku njuru dhanu peri ceke wucokru karacelo wi Yehova: man Harun, en e ng’a ma wung’ur i kume?

¹² E Musa oro jucijulwong’ Dathan gikud Abiram, ma gi wot Eliab; e giwacu kumae, Wabiidho ngo:

¹³ en e gin ma nok nia iwodhowa kud i ng’om ma molo cak ku kici, kara inegwa i langa, ento idong’ idodri gin bende ni jaditmawijo i wiwa?

¹⁴ Man kendo iterowa i ng’om ma molo cak ku kic ungo, kadi imio iwa aba mi pothi ku pothi mir ulok de ngo: e iyenyo ineg wang’ dhanu maeni? wabiidho malu ngo.

¹⁵ E kwinyo ma dit unego Musa, man ewacu ni Yehova kumae, Kud inen girathiera migi ber: amaku kana acel de ngo i bang’gi, kadok ng’atu acel m’i kindgi de atime rac ungo.

¹⁶ E Musa wacu ni Kora kumae, Bed i wang’ Yehova in ku njuru dhanu peri ceke, in, ku gin, ku Harun, urwo:

¹⁷ man kubeng’wu kubeng’wu ng’atuman umak tabu pare, man wuketh udok ma ng’wice ng’ar i wigi, man kubeng’wu kubeng’wu ng’atuman ukel tabu pare i wang’ Yehova, tabu dak ario ku pier abic; in bende, ku Harun, kubeng’wu kubeng’wu ng’atuman ku tabu pare.

¹⁸ E ku ba dhanu ku ba dhanu ng’atuman ugamu tabu pare, man giketho mac i igi, man giketho udok ma ng’wice ng’ar i wie, e gicungo dhugola mi hema mi cokri karacelo ku Musa giku Harun.

¹⁹ Man Kora coko udul ceke i wigi ba dhugola mi hema mi cokri: e dwong’ pa Yehova wok bang’ udul ceke.

²⁰ Man Yehova yero ni Musa giku Harun, ewacu kumae,

²¹ Wukoiru giwu ku kind udul maeni, kara anyothgi pio.

²² E gipodho arieba wang’gi, giwacu kumae, E Mungu, Mungu mi tipo mi kum ceke, tek ng’atu acel udubo, e iyenyo kwinyo negi kum udul ceke?

²³ E Yehova yero ni Musa, ewacu kumae,

²⁴ Yer ni udul, wac kumae, wuai ku ng’et hema pa Kora, ku Dathan, man Abiram.

²⁵ E Musa ai malu man ecidho ba Dathan kud Abiram; man judongo mir Israel gilubo toke.

²⁶ Man eyero ni udul, ewacu kumae, Akwayuwu, wuai ku ba hema mi dhanu ma rac maeni, man kud wumul gin moko ma migi, wumaru nyothru i dubo migi ceke.

²⁷ Kum kumeno giai malu ku ba hema pa Kora, ku Dathan, man Abiram, i ng’etgi kun ku kun; e Dathan gikud Abiram giwok woko, man gicungo i dhugola mi hema migi, ku mon migi, man wotgi, ku nyithindho migi ma thindho.

²⁸ E Musa wacu kumae, Ni kum maeni wubing’eyo nia Yehova ora nitimo tic maeni ceke: kum atimogi ngo ku pidoia gira.

²⁹ Tek dhanu maeni tho calu dhanu mange ceke tho, kadi tek juliewogi calu juliewo dhanu ceke; nwang’u Yehova ora ngo.

³⁰ Ento tek Yehova timo gin ma nyen, man ng’om uyabu dhoge, emwonyogi de, karacelo ku gin ma migi ceke, man guoro piny ma kwo i liel; e wubing’eyo nia dhanu maeni cayu Yehova.

³¹ Man etimbre, kan edaru weco lembe maeni ceke, nia ng’om ma ni thegi kak dra;

³² e ng’om ung’amu dhoge, man emwonyogi, ku juudigi, ku dhanu ceke ma pa Kora, ku piny migi ceke.

³³ Kum kumeno gin, ku gin ceke ma migi, giloro piny ma kwo i liel: e ng’om ucikre i wigi, man ginyothri kud i kind cokri.

³⁴ E Israel ceke m’utiekogi gbur giringo ni kum ywak migi; kum giwacu kumae, Ng’om umaru mwonyowa.

³⁵ Man mac uai ba Yehova, e ewang’u dhanu dak ario ku pier abic ma githiero udok ma ng’wice ng’ar.

³⁶ Man Yehova yero ni Musa, ewacu kumae,

³⁷ Yer ni Eleazar ma wod Harun ma jalam, nia eting’ tabu kud i mac, man eketh mac cen; kum tabune gi leng’,

³⁸ en e tabu mi dhanu maeni m’udubo ketho kwo migi rwinyo; man wek jutimgi ni ban m’afoda ni girauma mi pemblam: kum githierogi i wang’ Yehova: ka kumeno gi leng’; man gibibedo ni giranyutha ni nyithindho mir Israel.

³⁹ Man Eleazar ma jalana ugamu tabu mi mola, ma dhanu ma giwang’ githiero; man gifodogi kpe kpe ni girauma mi pemblam,

⁴⁰ kara ubed ni poi ni nyithindho mir Israel, kara jawirok moko, ma en e kodhi pa Harun ungo, kud ucor ceng’ni kara ewang’ Udok ma ng’wice ng’ar i wang’ Yehova; kara kud ebed calu Kora, man calu njuru dhanu pare: calu Yehova yero ire ni kum Musa.

⁴¹ Ento urwone udul ceke mi nyithindho mir Israel, ging’ur kum Musa man kum Harun, giwacu kumae, Wunego dhanu pa Yehova.

⁴² Man etimbre kinde ma udul ucokri wi Musa man wi Harun, nia gineno yo ba hema mi cokri: man, nen, afuru ume, man dwong’ pa Yehova nen.

⁴³ E Musa giku Harun gibino ba wang’ hema mi cokri.

⁴⁴ Man Yehova yero ni Musa, ewacu kumae,

⁴⁵ Wuai cen ku kind udul maeni, kara anyothgi pio. E gipodho arieba wang’gi.

⁴⁶ Man Musa wacu ni Harun kumae, Gam tabu peri, man iketh mac i ie ku ba pemblam, man iketh udok ma ng’wice ng’ar i wie, man itere pio bang’ udul, e itim adunya pigi: kum kwinyo ai ba Yehova; thong’om uthekre.

⁴⁷ E Harun ugamu calu Musa yero, man eringo i die cokri; man, nen, thong’om uthekre i kind dhanu: man eketho udok ma ng’wice ng’ar i wie, e etimo adunya ni dhanu.

⁴⁸ Man ecungo i kind avu ku ju ma kwo; e thong’om ujik.

⁴⁹ Nie ju ma githo ku thong’omne en e dhanu rubanga apar wi ang’wen ku dak abiro, m’umedo ju m’utho kum lem pa Kora.

⁵⁰ Man Harun udok ba Musa i dhugola mi hema mi cokri: e thong’om ujik.