Kitabu Mir Ang’wende Pa Musa Wel 14 - The Holy Bible In Alur (Lur) Revised Orthography

Juisraeli Jai ni Yehova

¹ E udul ceke giting’o dwandgi malu, e giywak; e dhanu giywak i diewor maeca.

² E nyithindho mir Israel ceke ging’ur kum Musa man kum Harun: man udul ceke giwacu igi kumae, Maku watho i ng’om Misiri! kadi maku watho i langa maeni!

³ Man Yehova kelowa i ng’om maeni mir ang’o, kara wapodh ku palamularu? Mondwa ku nyithindhwa ma thindho gibibedo ni ayeki: e ber iwa ma sagu ngo ya wadok i Misiri?

⁴ Man giwecri gigi kumae, Dong’ wakethu jego iwa man wadoku i Misiri.

⁵ E Musa giku Harun gilund gipodho arieba wang’gi i nyim cokri ceke mir udul mi nyithindho mir Israel.

⁶ Man Yocuwa ma wod Nun man Kaleb ma wod Yefune, ma gi kind ju m’ulibo ng’ombe, giyeco kendi migi:

⁷ man giyero ni udul ceke mi nyithindho mir Israel, giwacu kumae, Ng’om, ma wakadhu kud i ie nilibe, en e ng’om ma ber apila.

⁸ Tek anyong’a nego Yehova i kumwa, ebilund terowa i ng’om maeca, ebimie iwa de; ng’om ma molo cak ku kic.

⁹ Ento kud wujai ni Yehova, kadok dhanu m’i ng’ombe de kud wulworgi; kum gi kwen iwa: man tipo migi kabre woko kud i wigi, man Yehova ni karacelo kudwa: kud wulworgi.

¹⁰ Ento udul ceke wacu ya jucanygi ku kidi. E der pa Yehova wok i hema mi cokri ni nyithindho mir Israel ceke.

¹¹ Man Yehova wacu ni Musa kumae, Dhanu maeni bicaya nindo ma rokani? man gibiyia ngo nindo ma rokani? kum giranyutha ceke m’atimo i kindgi?

¹² Abigoyogi ku thong’om, man abikabu aba migi, e abikethi idok ni thek m’ulwar ma tek ma sagu gin.

¹³ E Musa wacu ni Yehova kumae, Jumisiri bilund winjo maeni; kum iwodho dhanu maeni kud i kindgi ku tego peri;

¹⁴ e gibiyero maeni ni ju m’ubedo i ng’om maeni. Giwinjo nia ini Yehova ini i kind dhanu maeni; kum in i Yehova juneni wang’ ku wang’, man afuru peri cungo i wigi, man icidho i wang’gi, i mbegi mir afuru ku dieceng’, man i mbegi mi mac ku diewor.

¹⁵ Kawono tek ibinego dhanu maeno calu ng’atu acel, e thek m’uwinjo rwongi gibiyero, gibiwacu kumae,

¹⁶ Kum Yehova copo tero dhanu maeni ngo i ng’om m’ekwong’o igi, ka kumeno enegogi i langa.

¹⁷ Man kawono, akwei, wek tego pa Rwoth ubed dit, calu m’iyero, m’iwacu kumae,

¹⁸ Yehova bedo yo ni ng’ecwiny, man e dit ku mer mi bero, m’eweko ko kier ku dubo; m’ebiweko dubo de ki ngo, m’eketho ko kier mi wego wi nyithindho, wi dhanum’utuk mir adege ku wi mir ang’wende.

¹⁹ Akwei, wek kier mi dhanu maeni, calku dwong’ mi mer mi bero peri, man calu iweko dubo mi dhanu maeni, ugambre i Misiri cil kawono nini.

Pokolembe pa Mungu wi Juisraeli

²⁰ E Yehova wacu kumae, Aweko dubo calku lembe peri:

²¹ ento andha, calu abedo kwo, man calu ng’om yu bipong’ ku dwpng’ pa Yehova;

²² kum dhanu maeno ceke ma gineno dwong’ para, ku giranyutha para, m’atimo i Misiri kud i langa, ento gibidha wang’ apar maeni, man giwinjo dwanda ngo;

²³ andha gibineno ng’om m’akwong’o ni kwarugi ngo, kadok jumoko m’i kindgi de mbe m’ucaya ma gibinene:

²⁴ ento jatic para ma Kaleb, kum ebedo ku tipo mange kude, man eluba ku cwinye ceke, abitere i ng’om m’emondo i ie; man kodhine bimwonye.

²⁵ Nie Jaamaleki ku Jakanani gibedo i poga: urwo wulokru, man wucidh i langa ku yo ba Nam Makwar.

²⁶ Man Yehova yero ni Musa man ni Harun, ewacu kumae,

²⁷ Abitwio cwinya rokani kum udul ma rac maeni, m’ung’ur i kuma? A winjo ng’ur mi nyithindho mir Israel, ma ging’ur ko i kuma.

²⁸ Wac igi kumae, Calu abedo kwo, Yehova wacu, andha calu wuyero i itha, abitimo kumeno i beng’wu:

²⁹ avujwu bipodho i langa maeni; man udul mu ceke ma jukwanu, calku wel mu dho, ugambre kum ma rundi migi pier ario ku ma sagu, m’ung’ur i kuma,

³⁰ andha wubimondo i ng’ombe ngo, m’akwong’o pire nia abiketho wubed i ie, ndhu Kaleb ma wod Yefune, man Yocuwa ma wod Nun.

³¹ Ento nyithindho mu ma thindho, ma wuwacu bibedo ni ayeki, gin e m’abiterogi i ie, e gibing’eyo ng’om ma wukwero.

³² Ento wun, avujwu bipodho i langa maeni.

³³ E nyithindho mu bibedo juwoth i langa rundi pier ang’wen, man gibiyeyo asara mu, cil ma avujwu binyothre ko i langa.

³⁴ Calku wel mi ceng’ ma wiilibo ie ng’ombe en e ceng’ pier ang’wen, ku ba ceng’ ceke kubang’gi kubang’gi en e rundi acel acel, wubiyeyo kier mu, en e rundi pier ang’wen, e wubing’eyo loko lembang’ola para.

³⁵ An, an a Yehova, ayero, andha abitimo maeni ni udul ma rac maeni ceke, ma gicokri karacelo i wia: gibinyothri i langa maeni, e gibitho kuca.

Julib Apar ma Rac Utho

³⁶ Man dhanu, ma Musa oro nilibo, ng’ombe, m’udwogo man giketho udul ceke ging’ur i kume, ku kelo rwonglembe ma rac pi ng’ombe,

³⁷ en e ju maeno ma gikelo rwonglembe ma rac pi ng’ombe, githo ku thong’om i wang’ Yehova.

³⁸ Ento Yocuwa ma wod Nun, man Kaleb ma wod Yefune, gidong’ ma gi kwo i kind joca m’ucidh ulibo ng’ombe.

Juloyo Juisraeli i Horma

³⁹ E Musa yero lembe maeni ni nyithindho mir Israel ceke: man dhanu giywak dit.

⁴⁰ E giai pir kugweno, man giidho malu wi usimbru got, giwacu kumae, Nen, wani keni, man wabiidho ba ka ma Yehova ng’olo: kum wadubo.

⁴¹ E Musa wacu kumae, Wukadhu kawono pirang’o ku wi lembang’ola pa Yehova, kum ebibedo miero ngo?

⁴² Kud wuidhi, kum Yehova ni i kindwu ngo; kara kud wugoiru piny i wang’ judegi mu.

⁴³ Kum Jaameleki ku Jakanani ni kuca i weng’wu, man wubipodho ku palamularu: kum wulokru cen ku lubo Yehova, ka kumeno Yehova bibedo karacelo kudu ngo.

⁴⁴ Ento gijai giidho malu wi usimbru got: ento sanduk mi lembariba pa Yehova, man Musa, giai i kagonjo ngo,

⁴⁵ Jaameleki lund uloro piny, ku Jakanani m’ubedo wi got maeca, man gigoyogi gifodogi piny de, cil kum Horma.