Kitabu Mir Ang’wende Pa Musa Wel 13 - The Holy Bible In Alur (Lur) Revised Orthography

Juoro Julib i Kanan

¹ Man Yehova yero ni Musa, ewacu kumae,

² Or dhanu, kara gici gilib ng’om Kanan, m’amio ni nyithindho mir Israel: wuor ng’atu acel m’i kind suru pa weggi kubang’gi kubang’gi, kubang’gi kubang’gi ng’atuman ubed jaditmawijo m’i kindgi.

³ E Musa orogi uai kud i langa mi Paran calku lembang’ola pa Yehova: gin ceke gi dhanu ma wi nyithindho mir Israel.

⁴ Man nying’gi eni: Mi suru pa Ruben, Camua ma wod Zakur.

⁵ Mi suru pa Simeon, Cafat ma wod Hori.

⁶ Mi suru pa Yuda, Kaleb ma wod Yefune.

⁷ Mi suru pa Isakar, Igal ma wod Yusuf.

⁸ Mi suru pa Efraim, Hoceya ma wod Nun.

⁹ Mi suru pa Benyamin, Palti ma wod Rafu.

¹⁰ Mi suru pa Zebulun, Gadiel ma wod Sodi.

¹¹ Mi suru pa Yusuf, (thelembene, mi suru pa Manase), Gadi ma wod Susi.

¹² Mi suru pa Dan, Amiel ma wod Gemali.

¹³ Mi suru pa Acer, Sethur, ma wod Mikael.

¹⁴ Mi suru pa Naftali, Nabi ma wod Vofsi.

¹⁵ Mi suru pa Gad, Geuel ma wod Maki.

¹⁶ Maeni gi nying’ dhanu ma Musa orogi gici gilib ng’om. E Musa Lwong’o Hoceya ma wod Nun Yocuwa.

¹⁷ E Musa orogi gici gilib ng’om Kanan, man ewacu igi kumae, Wuidh malu i yo maeni yor ariwa ma piny, e wuidh i ng’om gudi:

¹⁸ e wunen ng’om, maram ebedo ko; ku dhanu m’ubedo i ie, tek gi tek kadi ng’ic, tek gi nok kadi dupa;

¹⁹ man maram ng’ombe bedo ko ma gibedo i ie, tek e ber kadi rac; man maram adhura ma gibedo i ie bedo ko, kadok kagonjo, kadi ka ma tek;

²⁰ man maram ng’ombe bedo ko, tek etop kadi e tek, tek yen ni i ie, kadi umbe. Man wubed ku tegocwiny ma ber, e wukel kum nying yen m’i ng’ombe. Nie en e nindo mi landu mi mwoka mi nyingulok.

²¹ Kum kumeno giidho malu, man gilibo ng’ombe ugambre i langa mi Zin cil kum Rehob, utundo ba kamondo mir Hamath.

²² Man giidho malu yor ariwa ma piny, e gibino Hebron; man Ahiman, ku Cecai, man Talmai, ma gi nyithindho pa Anak, gini keca. (Nie jugomo Hebron rundi abiro ma fodi jukugomo Zoan i Misiri.)

²³ E gibino ba poga mi Eckol, man gitong’o jangulok acel ku kuca ku nzuru nyingulok acel i kume, e gitade ku yen giyeye ko gin ario; man gikelo kum nyingulemo bende, man kum nyingubolo.

²⁴ Kakeca julwong’o poga mi Eckol, kum nzuru mi nyingulok ma nyithindho mir Israel utong’o ku kuca.

²⁵ E gidwogo ma nwang’u ceng’ pier ang’wen uthum ma gidaru libo ko ng’om.

²⁶ E gicidho gibino ba Musa, man ba Harun, man bang’ udul ceke mi nyithindho mir Israel, ba langa mi Paran, ba Kadec; man gidwoko lembe i bang’gi, man bang’ udul ceke, e ginyutho igi nying’ piny m’i ng’ombe.

²⁷ Man giyero ire, giwacu kumae, Watundo ba ng’om ka m’ioro ie wa; emolo cak ku kic andha; man maeni en e nying’ pinje.

²⁸ Ento dhanu m’ubedo i ng’ombe gi tek, man gidwoko adhura tek, e gi dit apila: mange ke waneno nyithindho mir Anak kuca.

²⁹ Amalek ubedo i ng’om ma yor ariwa ma piny: man Jahiti, ku Jayebusi, man Jaamori, gibedo i ng’om gudi; man Jakanani bedo ceng’ni dhu nam, man i ng’et Yordan.

³⁰ E Kaleb ujuko dhanu gi ling’ i wang’ Musa, man ewacu kumae, Wek waidhu kawono, man wagame iwa: kum wacopo sage andha.

³¹ Ento dhanu ma giidho malu karacelo kude giwacu kumae, Wacopo idho malu wi dhanune ngo; kum gi tek ma sagu wan.

³² E gikelo rwonglembe ma rac mi ng’om ma gilibo ni nyithindho mir Israel, giwacu kumae, Ng’om ma wakadhu kud i ie nilibe, en e ng’om ma camu ju m’ubedo i ie; man dhanu ceke ma waneno i ie gi dhanu ma boco dit.

³³ Man waneno Junefili, ma wot Anak, m’uai ba Junefili: man wabedo i wang’wa giwa ve usene, e wabedo kumeca i wang’gi bende.