Kitabu Mir Ang’wende Pa Musa Wel 11 - The Holy Bible In Alur (Lur) Revised Orthography

Yehova Ng’olo nia Ebimio Ring’o

¹ Man dhanu gibedo calu jungedhe, ma gibeyero lem ma rac i ith Yehova: e kinde ma Yehova winjo maeni, ng’ecwiny pare opo; man mac pa Yehova wang’ i kindgi, man ewang’ i tung’ gonjo.

² E dhanu kayu ywak ba Musa; e Musa kwayu Yehova, man mac ujik.

³ Man nying’ kakeca julwong’o Tabera, kum mac pa Yehova wang’ i kindgi.

⁴ Man udul dhanu m’ujebre ma ni i kindgi awanya negogi apila: e nyithindho mir Israel bende giywak kendo, giwacu kumae, Ng’a ma bimio iwa ring’o wacami?

⁵ Wapoi kum rec, ma wacamu i Misiri mananu; kud ukuju, man ukondo, ku matungulu m’i thim, man matungulu, ku matungulu ma lake tek:

⁶ ento ka wono ng’eyong’ec mwa tal; gin moko nyanok de mbe ndhu mana maeni ma juneno.

⁷ Man mana e calu kodhi mir uboko ma ng’wice ng’ar, man kite ve nyithi kidi ma kwar.

⁸ Dhanu giwotho kun ku kun, e gicoke, man girege wi pom, kadi giode ku pany, man gitede i agulu man gitime ni kwen m’apada: man midone ve mido mi mo ma nyen.

⁹ E kinde ma thoi ng’ier kagonjo ku diewor, mana podho i wie.

¹⁰ E Musa winjo dhanu beywak kud i kind wat migi ndri, ku ba dhanu ku ba dhanu, ng’atuman i dhugola mi hema pare: e ng’ecwiny pa Yehova opo dit: man Musa kun.

¹¹ Man Musa wacu ni Yehova kumae, Nedi itimo rac ba jatic peri? man nedi anwang’u bero i weng’i ngo, ketho iketho ter mi dhanu maeni ceke i wia?

¹² Abedo ku ic mi dhanu maeni ceke ani? anyologi, ketho iwacu ira kumae, Ting’gi i kori, calu wego ma japidi ting’o nyathin ma dhoth, ba ng’om m’ikwong’o ni kwarugi?

¹³ Abinwang’u ring’o kani m’ami ni dhanu maeni ceke? kum giywak i bang’a, giwacu kumae, Mi iwa ring’o, wacam.

¹⁴ Acopo yeyo dhanu maeni ceke a kenda ngo kum e pek ira m’usagu.

¹⁵ Man tek itima kumeni, akwei, nega pii wang’ acel, tek anwang’u bero i weng’i; man kud iyi anen can para.

¹⁶ Man Yehova wacu ni Musa kumae, Cok dhanu pier abiro i bang’a mi judongo mir Israel, m’ing’eyo gi judongo mi dhanu, ku jego i wigi; man ikelgi ba hema mi cokri, kara gicung kuca karacelo kudi.

¹⁷ E abiloro piny man wabiweco kudi kuca: man abigamu kum Tipo ma ni i wii, e abikethe i wigi; man gibiyeyo ter mi dhanu karacelo kudi, kara kud iyeye giri i kendi.

¹⁸ Man iwac ni dhanu kumae, Wudwokru giwu leng’ mir urwo, e wubicamu ring’o; kum wuywak i ith Yehova, wuwacu kumae, Ng’a ma bimio ring’o iwa wacami? kum wabedo ber ku i Misiri: ka kumeno Yehova bimio iwu ring’o, e wubicamu.

¹⁹ Wubicamu ceng’ acel ungo, kadi ceng’ ario de ngo, kadi ceng’ abic, kadok ceng’ apar, kadi ceng’ pier ario de ngo,

²⁰ ento dwi dho, cil m’ewok woko kud i odiumwu, man ebedo ni ginmajudagu iwu; kum wukwero Yehova ma ni i kindwu, man wuywak i wang’e, wuwacu kumae, Nedi waai woko kud i Misiri?

²¹ E Musa wacu kumae, Dhanu, m’ani i kindgi, gi dhanu rubanga dak abusiel ma ku tielo; man iwacu kumae, Abimio ring’o igi, kara gicam dwi dho.

²² Jubinego udul rombe ku dhok dhiang’ igi, kara uromgi? kadi jubicoko rec ceke m’i nam karacelo igi, kara uromgi?

²³ E Yehova wacu ni Musa kumae, Cing Yehova jiki? kawono ibineno tek lembe para bitimbre iri kadi ungo.

Judongo Uewo Lembe

²⁴ E Musa wok woko, man eyero lembe pa Yehova ni dhanu: man ecoko dhanu pier abiro mi judongo mi dhanu, man etakugi ng’et Hema gbur.

²⁵ E Yehova loro piny i afuru, man giweco kude, man egamu kum Tipo ma ni i wie, man ekethe wi judongo pier abiro: man etimbre, nia, kinde ma Tipo bedo i wigi, giewo, ento gitimo kumeca kendo ngo.

²⁶ Ento dhanu ario dong’ i kagonjo, nying’ ng’atu acel Eldad, man nying’ ng’atu mucelo Medad: e Tipo bedo i wigi; man gin gi kind ju ma jugoro, ento giwok woko ba hema ngo; e giewo ku i kagonjo.

²⁷ E jalawobi ringo, man eyero ni Musa, ewacu kumae, Eldad giku Medad giewo i kagonjo.

²⁸ E Yocuwa ma wod Nun, ma jakony Musa, m’e ng’atu acel ma kind dhanu pare ma jugoyo wigi, eloko lembe man ewacu kumae, Rwoth para Musa, kwergi.

²⁹ E Musa wacu ire kumae, Nyeko timi ni kuma? maku dhanu pa Yehova ceke gibed jubila, ya Yehova keth Tipo pare i wigi!

³⁰ E Musa cidho emondo i kagonjo, en ku judongo mir Israel.

Yehova Oro Aywer

³¹ E yamu ai ba Yehova, man ekelo aywer kud i nam, man eweko gipodho ba kagonjo, calu woth mi ceng’ acel i ng’ete maeni, man woth mi ceng’ acel i ng’ete mucelo, utieko kagonjo gbur, calu bot ario ku wi ng’om.

³² E dhanu giai malu cing’ nica du, ku diewor soro, man urwone du, e gicoko aywer: e ng’atu m’ucoko nok nwang’u ecoko dero apar: man gimoyogi mba mba igi utieko kagonjo gbur.

³³ Kinde ma ring’o fodi ni i kind lakgi, ma fodi gikunyame ngo, ng’ecwiny pa Yehova opo kum dhanu, man Yehova goyo dhanu ku thong’om ma dit apila.

³⁴ Man nying’ kakeca julwong’o Kibrothhatava, kum giyiko dhanu keca ma awanya negogi.

³⁵ Ugambre Kibroth-hatava dhanu gicidho Hazeroth; man gibedo i Hazeroth.