Nehemia 9 - The Holy Bible In Alur (Lur) Revised Orthography

Ezra Tuco Dubo mi Juisraeli

¹ Nie i ceng’ pier ario wi ang’wende mi dwi maeni nyithindho mir Israel gicokri ku kwiro cam, man kud usuba, ku ng’om i wigi.

² Man kodhi mir Israel gikoiri gigi ku juwirok, e gicungo gituco dubo migi, ku kier pa weggi.

³ E gicungo i ka migi, man gisomo i kitabu mi cik pa Yehova Mungu migi ng’et ceng’ mir ang’wende; man ng’et ceng’ mir ang’wende mange gituco, e girwo ni Yehova Mungu migi.

⁴ Gilund gicungo wi pem mi Julawi, en e Yecuwa, man Bani, ku Kadmiel, man Cebania, ku Buni, man Cerebia, ku Bani, man Kenani, e gikok ku dwandgi ma tek ba Yehova Mungu migi.

⁵ Julawi, en e Yecuwa, man Kadmiel, ku Bani, man Hacabneya, ku Kerebia, man Hodia, ku Cebania, man Pethahia, gilund giwacu kumae, Wucungi man wumi mugisa ni Yehova Mungu mu m’ugambre nja cil nja; e mugisa bed kum nyingi mi dwong’, m’edodre malu wi mugisa ku pak ceke.

⁶ In i Yehova, in i kendi; itimo polo, polo m’i polo, kud udul migi ceke, ng’om de ku gin ceke ma ni i wie, ku nam man gin ceke ma ni i igi, e igwokogi ceke; man udul m’i polo berwo iri.

⁷ In i Yehova Mungu, m’igoyo wi Abram, m’iwodhe de woko kud i Ur mi Jukaldayo, m’icaku ire nying’ Ibrahim de,

⁸ e inwang’u adundene mandha i weng’i, man itimo lembariba kude ya imi ng’om pa Jakanani, ku Jahiti, man Jaamori, ku Japerizi, man Jayebusi, ku Jagirgaci, ya imie ni kodhi pare, e itimo lembe peri kakare; kum in i pwe.

⁹ Man ineno masendi pa kwaruwa i Misiri, e iwinjo ywak migi dhu Nam Makwar,

¹⁰ man inyutho giranyutha ku musana kum Farao, man kum jutic pare ceke, man kum dhanu ceke ma ni i ng’om pare; kum ing’eyo nia gitimo ku kuhaya i kumgi, e inwang’u iri nying’, calu ebedo tin.

¹¹ Man ipoko nam i wang’gi kara gikadh kud i die nam ku wi ng’om m’uthwo; e ju m’ulubogi ibologi ka ma thuth, calu kidi i pi ma dit.

¹² Man ke itelo wigi ku dieceng’ ku mbegi mir afuru; man ku mbegi mi mac ku diewor, kara umi igi der i yo ma maku giwoth i ie.

¹³ Iloro piny bende wi got Sinai, man iweco kugi kud i polo, e imio igi lembapoka ma pwe man cik mandha, ku ng’ol ma ber man lembang’ola,

¹⁴ man iketho ging’eyo sabatu peri ma leng’, man ing’i olo igi lembang’ola, ku ng’ol, man cik, ku cing’ Musa ma jatic peri,

¹⁵ man imio igi kwen m’uai i polo ni kec migi, man iwodho pi igi kud i cana ni rieu migi, e ing’olo igi nia gimond gimwony ng’om J m’ikwong’o ya imi igi.

¹⁶ Ento gin ku wegwa gitimo ku kuhaya, e giciko ng’utgi, man giwinjo lembang’ola peri ngo,

¹⁷ e gikwero woro, kadok musana peri m’itimo i kindgi de giparu pire ngo, ento giciko ng’utgi, man i jai migi giketho jego kara gidok i ng’eca migi. Ento in i Mungu m’ibedo ayika mi weko dubo, m’i won, bero ku kisa, yo ni ng’ecwiny, man mer mi beroni dit, e ikunogi ngo.

¹⁸ Eyo, ka gitimo igi nyathi dhiang’ m’atwaga, e giwacu kumae, Maeni mungu peri m’uwodhi kud i Misiri, man gitimo gin dupa ma nyayu ng’ecwiny;

¹⁹ ento in i udul kisa peri ikunogi ngo i langa: mbegi mir afuru ai kud i wigi ngo ku dieceng’, kara: utel wigi i gengi; kadok mbegi mi mac ku diewor, kara unyuth igi der, ku yo ma maku giwoth i ie.

²⁰ Imio Tipo peri ma ber bende kara uponjgi, man itwonogi ku mana peri ngo i dhoggi, man imio igi pi ni rieu migi.

²¹ Eyo, rundi pier ang’wen igwokogi i langa, e gin moko mbe m’urem igi; bongu migi de ti ngo, tiendgi de kwot ungo.

²² Karacelo ku maeni imio igi ker man kodhidhanu, m’ipoko igi calku makapiny migi: ka kumeno imwonyo ng’om pa Sihon, cil ng’om p’ubimo mi Hecbon, man ng’om pa Og m’ubimo mi Bacan.

²³ Inyayu nyithindho migi bende calu cero m’i polo, man ikelogi i ng’om m’iwacu pire ni kwarugi, nia gibimondo i ie nimwonye.

²⁴ Ka kumeno nyithindho gimondo man gimwonyo ng’ombe, e isagu dhanu m’ubedo i ng’om, en e Jukanani, i wang’gi, man imiogi i cing’gi, kud ubimo migi, ku kodhidhanu m’i ng’ombe, kara gitim calu giyenyo i kumgi.

²⁵ E gimaku adhura ma tek, ku ng’om ma mio, man gidoko weg udi m’uong’ ku gin ma ber ceke, ku pi ma juroo, ku podho mir ulok, man podho mir ulam, ku yen ma cego nyinge dupa: ka kumeno gicamu, e giyeng’, man gicwe, ginyayu anyong’a i igi de kum bero peri ma dit.

²⁶ Ento giwor ungo, man gijai iri, gibayu Cik peri de i ng’eigi, man ginego jubila peri m’utuco wigi kara gilokgi i beng’i kendo, man gitimo gin ma dit ma nyayu ng’ecwiny.

²⁷ Ka kumeno imiogi i cing’ jusendgi, m’usendogi: man i nindo mi can migi, ka giywak i beng’i, iwinjo kud i polo; man calkud udul kisa peri imio igi jular m’ubodhogi kud i cing’ jusend migi.

²⁸ Ento yo ng’ei yom migi, gidubo kendo i weng’i; ka kumeno iwekogi i cing’ jukwojgi, kara gibed ku bim i wigi: ento ka gidwogo, giywak de i beng’i, iwinjo kud i polo; e ibodhogi wang’ udul calku kisa peri,

²⁹ man ituco wigi, kara ikelgi kendo ba cik peri. Ento gitimo ku kuhaya, man giwinjo lembang’ola peri ngo, ento gidubo kum lembapoka peri (ma tek ng’atu moko timo, ebibedo ni kumgi), man giwodho gok, e giciko ng’utgi, man giyenyo ngo giwinji.

³⁰ Ento rundi dupa itwio cwinyi i kumgi, man itiico wigi ku Tipo peri ni kum jubila peri: ento giyenyo ngo ya gicik ithgi: kum kumeno imiogi i cing’ dhanu m’i ng’om.

³¹ Ento i udul kisa peri idarugi kpo ngo, kadi ikunogi de ngo; kum in i Mungu ma jabero ma jakisa de.

³² Ka kumeno kawono, Mungu mwa, ma dwong’, ma jatego, Mungu mi ndiri de, m’ugwoko lembariba ku mer mi bero, kud iyi can ceke nen nok i weng’i, m’uwok i kumwa, i kum ubimo mwa, i kum judongomawijo mwa, man i kum julam mwa, man i kum jubila mwa, man i kum wegwa, man i kum dhanu peri ceke, ugambre i nindo p’ubimo mir Ascur cil tin.

³³ Ento in i pwe i gin ceke m’uwok i kumwa; kum itimo gin mandha, ento wan wadubo;

³⁴ kadok ju m’ubimo mwa de giworo cik peri ngo, ku judongomawijo mwa, man julam mwa, kadi kwaruwa, giwinjo lembang’ola peri de ngo, ku lembatuca peri m’ituco ko wigi de ngo.

³⁵ Kum gitimo iri ngo i ker migi, man i bero peri ma dit m’imio igi, man i ng’om m’ulwar ma mio de m’imio i wang’gi, kadok aloka de gilokri ngo kum tic mi dubo migi.

³⁶ Nen, wan wa jutic i ceng’ maeni, man pi ng’om m’imio ni kwaruwa kara gicam nyinge ku berone, nen, wan wa jutic i ie.

³⁷ Man ecego nyinge dit ni ubimo m’iketho i wiwa kum dubo mwa: gibedo ku tego wi kumwa bende, man wi lim mwa, calu igi yenyo, e wani i lembarida.

Dhanu Ng’olo nia Gibiworo Ciktie

³⁸ Man karacelo ku maeni ceke watimo lembariba mandha, e wagore; man judongomawijo mwa, ku Julawi mwa, man julam mwa, gimwono ayi i kume.