Nehemia 8 - The Holy Bible In Alur (Lur) Revised Orthography

¹ E dhanu ceke gicoko dhoggi karacelo calu ng’atu acel i lela ma lac ma ni i wang’ dhugang’ mi pi; man giyero ni Ezra ma jagorcik ya ekel kitabu mi cik pa Musa, ma Yehova ng’olo ni Israel.

² E Ezra ma jalam ukelo cik i wang’ cokri, co ku mon bende, man dhanu ceke ma gicopo winjo ku ng’eyong’ec, i ceng’ mir acende mi dwi mir abirone.

³ Man esomo i ie i wang’ lela ma lac ma ni i wang’ dhugang’ mi pi ugambre pir kugweno cil dieceng’, i vut co ku mon, man i vut ju ma copo ng’eyo; man ith dhanu ceke bedo acika kum kitabu mi cik.

⁴ E Ezra ma jagorcik ucungo wi pem mi yen, ma gitimo pi tije; man dhanu maeni gicungo i ng’ete ma yor acwic, Matithia, man Cema, kud Anaya, man Uria, ku Hilkia, man Maseya; man yo ku cinge ma yor acam ke, Pedaya, man Micael, ku Malkija, man Hacum, ku Hacbadana, man Zekaria, ku Meculam.

⁵ Man Ezra yabu kitabu i wang’ dhanu ceke (kum eni malu wi dhanu ceke); man kan eyabe, dhanu ceke gicungo.

⁶ E Ezra yungo Yehova, Mungu ma dwong’; man dhanu ceke giloko lembe kumae, Amen, Amen, ku ting’o cing’gi malu: e gikulo wigi, man girwo ni Yehova ma wang’gi ni yor i ng’om.

⁷ Yecuwa bende, man Bani, ku Cerebia, man Yamin, man Akub, ku Cabethai, man Hodia, man Maseya, ku Kelita, man Azaria, ku Yozabad, man Hanan, ku Pelaya, man ke Julawi, giloko cikne kara dhanu ng’ei: e dhanune gicungo kakagi.

⁸ E gisomo i kitabune, i cik pa Mungu, ku dwandgi m’acanya: e gituco there, man giketho ging’eyo gin ma jusomo.

⁹ E Nehemia, ma en e jabim, ku Ezra ma jalam ma jagorcik, ku Julawi ma giponjo dhanu, giwacu ni dhanu ceke kumae, Ceng’ maeni en e leng’ ni Yehova Mungu mu; can kud unegwu, kadok aywaka de. Kum dhanu ceke giywak, ka giwinjo lembe mi cik.

¹⁰ Elund ewacu igi kumae, Wucidh i yo mu, wucam gin ma mio, man wumadh gin ma jom, e wuor ng’et piny ba ng’atu ma juyiko gin moko ire ngo; kum tin en e ceng’ ma leng’ ni Rwoth mwa: kadi can de kud unegwu; kum anyong’a pa Yehova en e tego mu.

¹¹ Ka kumeno Julawi gijuko dhanu ceke, giwacu kumae, Wubed ling’, kum ceng’ en e leng’; kadi can de kud unegwu.

¹² E dhanu ceke gicidho i yo migi nicamu, man nimadhu, man nioro ng’et piny, man kara gitim anyong’a ma dit, kum ging’eyo lembe ma juyero igi.

¹³ Man i ceng’ mir arionde wi udi pa wego mi dhanu ceke, gicokri karacelo, man julam, ku Julawi, ba Ezra ma jagorcik, kara giwinj lembe mi cik cu.

¹⁴ Man ginwang’u egore i cik, maram Yehova ng’olo ko ni kum Musa, ya nyithindho mir Israel gibed i otbak i agba i dwi mir abirone;

¹⁵ man nia gior kwenda giyer i adhura migi ceke, man i Yerusalem, giwac kumae, Wucidh wi got, man wukel jang ulam, ku jang ulam m’i thim, ku jang apiralok, man jang thith, man jang yen m’uthare, kara jutim otbak, calu egore.

¹⁶ Ka kumeno dhanu cidho, man gikelogi, e gitimo otbak igi, ku ba dhanu nzu ng’atuman wi ot pare, man i lelagang’ migi, man i lelagang’ mi ot pa Mungu, man i ka ma lac i dhugang’ mi pi, man i ka ma lac mi dhugang’ pa Efraim.

¹⁷ Man cokri ceke mi ju m’ubino kendo kud i ng’eca gitimo otbak, man gibedo i otbage: kum ugambre i ceng’ pa Yocuwa ma wod Nun cil kum ceng’ maeca nyithindho mir Israel gitimo kumeni ngo. E mutoro ma dit apila nuti.

¹⁸ Ceng’ ku ceng’ bende, ugambre i ceng’ ma kwong’ane cil i ceng’ ma cenne, esomo i kitabu mi cik pa Mungu. E gikwiro agba ceng’ abiro; man i ceng’ mir aborane cokri mi rwo nuti, calku lambapoka.