Nehemia 13 - The Holy Bible In Alur (Lur) Revised Orthography

Nehemia Dwokogi Leng’ ni Ginmajudagu Ceke

¹ I ceng’ maeca gisomo i kitabu pa Musa i vut dhanu; man junwang’u egore i ie, nia Jaamoni ku Jamoabi kud umond i cokri pa Mungu mi nja,

² kum gicidho ngo nirombo ku nyithindho mir Israel ku kwen man ku pi, ento gimio sukulia ni Balam i wigi, kara elamgi: ento Mungu mwa loko lamne ni mugisa.

³ Man etimbre, ka giwinjo cik, ya gikoyo dhanu ma sai ceke kud Israel.

⁴ Nie ma fodi maeni kutimbre ngo, Eliacib ma jalam, ma juketho wi kusika mi ot pa Mungu mwa, kum en e wat ku Tobia,

⁵ eyiko ire kusika ma dit, ka ma naka giketho ie lam mi mogo, kud udok ma ng’wice ng’ar, kud agulu, ku piny mir apaje mi cam, ku pigulok ma nyen, man mo, ma jumio ni Julawi ku lembang’ola, ku juwer, man jukur dhugola; man lam m’ating’a ma ni julam.

⁶ Ento i nindo maeni ceke nwang’u an a mbe i Yerusalem; kum i rundi pier adek wi arionde mi camuker pa Artacacta m’ubimo mi Babeli acidho bang’ ubimo: man yo ng’ei nindo moko akwayu ng’ol bang’ ubimo,

⁷ e abino Yerusalem, man ang’eyo dubo ma Eleacib utimo pi Tobia, m’eyiko ko ire kusika i lelagang’ mi ot pa Mungu.

⁸ Man enyayu can dit i ia: ka kumeno abayu jamni pa Tobia woko kud i kusikane.

⁹ Alund ang’olo, e gidwoko kusikane leng’: e akelo agulu mi ot pa Mungu keca kendo, ku lam mi mogo man udok ma ng’wice ng’ar.

¹⁰ Man ang’io nia jumio makapiny mi Julawi ngo; ketho nia Julawi ku juwer, m’utimo tic, giringo ba pothi migi kubang’gi kubang’gi.

¹¹ Alund apiemo ku jubim, e awacu kumae, Juweko ot pa Mungu nedi? Man acokogi karacelo, e akethogi kakagi.

¹² E Yuda ceke lund ukelo piny mir apaje mi cam ku mi pigulok ma nyen man mi mo i kakanpiny.

¹³ Man aketho jukur wi kakanpinyne, Celamia ma jalam, man Zadok ma jagorcik, man wi Julawi, Pedaya: man m’ulubogi Hanan ma wod Zakur, ma wod Matania; kum jukwanu y a gi mandha man tic migi nipoko piny ni uturneggi.

¹⁴ Poi pira, E Mungu para, pi maeni, man kud iruc tic ma ber para woko m’atimo pi ot pa Mungu para, man pi gin pare m’ang’ola.

¹⁵ I ceng’ maeca aneno dhanu moko m’ubenyono gin ma bio pigulok i ceng’ sabatu, man m’ukelo kumna de, m’uketho wi kana; ku pigulok, man nyingulok, man ubolo, man kwond ter ceke ma tung’ tung’ bende, ma gikelo i Yerusalem i ceng’ sabatu: man atuco wigi ceng’ ma giloko ie cam.

¹⁶ Dhanu mi Turo bende gibedo i ie, m’ukelo rec i ie, ku kwond jamni ma tung’ tung’, man giloko ba nyithindho mi Yuda, man i Yerusalem i ceng’ sabatu.

¹⁷ Alund apiemo ku weg yung mi Yuda, awacu igi kumae, Gin ma rac ma wutimo, ma wucido ko ceng’ sabatu en e ang’o?

¹⁸ Wegwu timo kumeno ngo, man Mungu mwa kelo gin ma rac maeni ceke i wiwa, ku wi adhura maeni de ngo? ento wukelo kwinyo mange wi Israel ku cido ceng’ sabatu.

¹⁹ Man etimbre nia, ka dhugang’ mi Yerusalem umaku cido ku mudho i wang’ sabatu, ang’olo nia jucik dhugola, man ang’olo nia ku juyabgi maram sabatu thum ko: man jumoko ma kind jutic para aketho wi dhugang’, kara ku jukel ter moko i ceng’ sabatu i ie.

²⁰ Ka kumeno jukuloka man juwil kwond jamni ceke ma kwonde tung’ tung’ gigonjo yo ng’ei Yerusalem wang’ acel kadi ario.

²¹ Alund atuco wigi, man awacu igi kumae, Nedi wugonjo kum gang’i? tek wutimo kumeni kendo, abiketho cinga i kumwu. Ugambre i nindo maeca gibino kendo ngo i ceng’ sabatu.

²² Man ang’olo ni Julawi ya gidwokri gigi leng’, man nia gibin gikur dhugang’, kara gidwok ceng’ sabatu leng’. Poi pira, E Mungu para, pi maeni bende, man iweka calku dit mi mer mi beroni.

²³ I ceng’ maeca bende aneno Juyahudi m’ugamu mon mir Acdod, ku mir Amon, man mi Moab:

²⁴ man nyithindho migi ng’et wec migi en e ku dhu Acdod, man gicopo weco ku dhu Juyahudi ngo, ento calku dhu dhanu kubang’gi kubang’gi.

²⁵ E wadhau kugi, man akwong’ogi, e agoyo jumoko m’i kindgi, man adoyo yukwigi, e aketho gikwong’o ku Mungu, awacu kumae, Wubimio nyigwu ni wotgi ngo, kadi wubigamu migi ni wotwu de ngo, kadi piwu giwu.

²⁶ Suleman m’ubimo mir Israel udubo kum gin maeni ngo? ento kind thek dupa ubimo moko mbe ma calu en, man Mungu pare mare, e Mungu kethe ni ubimo wi Israel ceke: ento cil en mon ma juwirok giketho edubo.

²⁷ Wabiwinjo iwu kara wutim dubo maeni ceke ma dit, ma wudub ko ni Mungu mwa kugamu mon ma nyiwiroki?

²⁸ Man ng’atu acel ma kind wot Yoiada, ma wod Eliacib ma jalam ma dit, en e jalwod Sanbalat ma Jahoroni: ka kumeno arieme woko kud i wang’a.

²⁹ Poi pigi, E Mungu para, kum gicido lamulam, ku lembariba mi lamulam, man mi Julawi.

³⁰ Ka kumeno adwokogi leng’ ni juwirok ceke, man aketho kur pi julam man pi Julawi, kubang’gi kubang’gi ng’atuman i tic pare;

³¹ man pi girathiera mi yen, i nindo ma jung’olo, man pi mwoka. Poi pira ber, E Mungu para.