Nehemia 11 - The Holy Bible In Alur (Lur) Revised Orthography

Nying’ Dhanu M’ubedo i Yerusalem

¹ Man judongomawijo mi dhanu gibedo i Yerusalem: dong’ dhanu bende gigoyo gagi, kara gikel ng’atu acel ma kind juapar kara ubed i Yerusalem ma adhura ma leng’, man ng’ete abung’wen ke i adhura mange.

² E dhanu mio mugisa ni dhanu ceke m’uwodhri gigi ku berocwinygi ya gibed i Yerusalem.

³ Nie maeni gi judongo mi ng’etker m’ubedo i Yerusalem: ento i adhura mi Yuda ku ba dhanu nzu ng’atuman ubedo ku piny pare i adhura migi, lembene kumae, Israel, ku julam, man Julawi, ku Junethini, man nyithindho mi jutic pa Suleman.

⁴ Man jumoko mi nyithindho pa Yuda, man mi nyithindho pa Benyamin gibedo i Yerusalem. Mi nyithindho pa Yuda ke: Athaya ma wod Uzia, ma wod Zekaria, ma wod Amaria, ma wod Cefatia, ma wod Mahalalel, mi nyithindho pa Perez;

⁵ man Maseya ma wod Baruk, ma wod Kol-hoze, ma wod Hazaya, ma wod Adaya, ma wod Yoiarib, ma wod Zekaria ma wod Jaciloni.

⁶ Wot Perez ceke m’ubedo Yerusalem gi dak ang’wen ku pier abusiel wi abora ma jurukara.

⁷ Man maeni gi wot Benyamin: Salu ma wod Meculam, ma wod Yoed, ma wod Pedaya, ma wod Kolaya, ma wod Maseya, Ithiel, ma wod Yecaya.

⁸ Man yo ng’eye Gabai, man Salai, dak abung’wen ku pier ario wi abora.

⁹ Man Yoel ma wod Zikri en e jalieu migi; man Yuda ma wod Hasenua en e ng’atu mir arionde wi adhura.

¹⁰ Mi julam ke: Yedaya ma wod Yoiarib, man Yakin,

¹¹ man Seraya ma wod Hilkia, ma wod Meculam, ma wod Zadok, ma wod Merayoth, ma wod Ahitub, ma jadit mi ot pa Mungu,

¹² man uturneggi m’utimo tic mi ot, gi dak abora ku pier ario wi ario; man Adaya ma wod Yeroham, ma wod Pelalia, ma wod Amzi, ma wod Zekaria, ma wod Pacur, ma wod Malkija,

¹³ ku utumin mire, ma judongo mi udi pa weggi, dak ario ku pier ang’wen wi ario; man Amacsai ma wod Azarel, ma wod Azai, ma wod Mecilemoth, ma wod Imer,

¹⁴ man utumeggi, dhanu ma ratego, dak acel ku pier ario wi abora. Man jawigi en e Zabdiel, ma wod Hagedolim.

¹⁵ Man mi Julawi ke: Cemaya ma wod Hascub, ma wod Azrikam, ma wod Hacabia, ma wod Buni;

¹⁶ man Cabethai ku Yozabad, mi judongo mi Julawi, ma gi julieu mi tic ma yo woko mi ot pa Mungu;

¹⁷ man Matania ma wod Mika, ma wod Zabdi, ma wod Asaf, ma en e jadit mi theko foyofoc i rwo, man Bakbukia, ma ng’atu mir arionde i kind utumin mire; man Abda ma wod Camua, ma wod Galal, ma wod Yeduthun.

¹⁸ Julawi ceke i adhura ma leng’ gi dak ario ku pier abora wi ang’wen.

¹⁹ Mange ke jukur dhugola, Akub man Talmon, ku uturneggi, ma gikuro dhugang’, gi dak acel ku pier abiro wi ario.

²⁰ Man dong Israel, mi julam, ma Julawi, gini i adhura ceke mi Yuda, ku ba dhanu nzu ng’atuman i aba pare.

²¹ Ento Junethini gibedo i Ofel: man Ziha ku Gicpa gini wi Junethini.

²² Jawic bende mi Julawi i Yerusalem en e Uzi ma wod Bani, ma wod Hacabia, ma wod Matania, ma wod Mika, mi wot Asaf, ma gi juwer, wi tic mi ot pa Mungu.

²³ Kum lembang’ola ai bang’ ubimo pigi, ku giramia ma juketho ni juwer, calu ma cande nuti mi ceng’ku ceng’.

²⁴ Man Pethahia ma wod Mecezabel, mi nyithindho pa Zera ma wod Yuda, ebedo ceng’ni cing ubimo i lembe ceke pi dhanu.

Ju ma Gigonjo i Yerusalem Ungo

²⁵ Man pi pacu, ku pothi migi, jumoko mi nyithindho pa Yuda gibedo i Kariatharba ku pacune man i Dibon ku pacune, man i Yekabzel ku pacune,

²⁶ man i Yecuwa, man i Molada, ku Beth-pelet,

²⁷ man i Hazar-cual, man i Ber-ceba ku pacune de,

²⁸ man i Ziklag, man i Mekona kud i pacune,

²⁹ man i Enrimon, man i Zora, man i Yarmuth,

³⁰ man Zanoa kud Adulam, ku pacunegi, man Lakic ku pothine, man Azeka ku pacune. Ka kumeno gigonjo ugambre Ber-ceba cil kum poga mi Hinom.

³¹ Nyithindho pa Benyamin bende gibedo ugambre Geba, i Mikmac man Aija, man i Beth-el ku pacune de,

³² i Anathoth, ku Nob, man Anania,

³³ ku Hazor, man Rama, man Gitaim,

³⁴ man Hadid, man Zeboim, ku Nebalat,

³⁵ man Lod, kud Ono, ma poga mi jubodho,

³⁶ Man mi Julawi ke, kur moko mi Yuda juribo ku Benyamin.