Nahum 1 - The Holy Bible In Alur (Lur) Revised Orthography

Kwinyo mi Culokwor pa Yehova

¹ Ewolembe ma pi Nineve. Kitabu mi ginmawokiwang’ pa Nahum ma Jaelkoci.

² Yehova en e Mungu ma jangiri man eculo kwor; Yehova culo kwor man epong’ ku kwinyo; Yehova culo kwor wi jukwoje, man ekanu kwinyo ni judegine.

³ Yehova bedo yo ni ng’ecwiny, man dwong’ i tego, man ebiweko judubo ki ngo: Yehova bedo ku yo pare i vira man i wavuvu, man afuru gin utur mi tiende.

⁴ Ejuko nam, man edwone, man edwono kulo ma dongo ceke: Bacan ubedo ng’ic, ku Karmel de; man thiuboko mi Lebanon ubedo ng’ic.

⁵ Gudi yengre i wang’e, man ungulu gudi loi; man ng’om tingre malu i wang’e, eyo, ng’om ngung’, ku gin ceke m’ubedo i ie.

⁶ Ng’a ma copo cungo nyim ng’ecwiny pare? ng’a ma copo bedo i lak ng’ecwiny pare? kwinyo pare konjre woko pami mac, man cana ng’eny kude.

⁷ Yehova en e ber, en e ka ma tek i ceng’ mi can; man eng’eyo ju m’upondo i ie.

⁸ Ento ebijigo kakare ndhu ku pi m’ucore i wie, man ebilubo tok jukwoje cil i mudho.

⁹ Wuporo lembe ang’o kum Yehova? ebijigo ndhu; masendi bitingre wang’ arionde ngo.

¹⁰ Kum ka gimoko calu ukudho, gimer de calu ku giramadha migi, giwang’ pet calu soka m’uthwo.

¹¹ Ng’atu acel uai woko kud ii m’upido lem ma rac kum Yehova, m’uporo lembe mi dubo.

¹² Yehova wacu kumae: Kadok gibedo ku tego ma dho, man dupa de, e kumeno gibithumbri piny, e ebikadhu woko. Kadok naka asendi, abisendi kendo ngo.

¹³ Man kawono abituro mberembere pare kud i beng’i, man abituro kol peri woko.

¹⁴ Man Yehova mio lembang’ola piri, kara ku jucoi mi nyingi kendo: abithumo ayi gin m’acwia m’ang’ika man ayi gin m’acwia m’atwaga kud i ot pa mungu peri; abitimo liel peri; kum i ng’ic hai.

Rwonglembe pi Podho mi Nineve

¹⁵ Nen, wi gudi tiend ng’atu m’ukelo rwonglembe ma ber, m’urweyo pi kwiocwiny! Kwir agba peri. E Yuda tim lembang’ola peri; kum jadubo bikadhu kud i ii kendo ngo; ethumbre woko kot.