Matayo 3 - The Holy Bible In Alur (Lur) Revised Orthography

Yohana ma Jabaputisi Uponjo

¹ Man ceng’ maeno Yohana ma Jabaputisi bino, ku yero i yamba mi Yahudi, ewacu kumae,

² Wulok cwinywu; kum ker mi polo ni ceng’ni.

³ Kum maeni en e ng’atu ma Isaya ma jabila yero pire ewacu kumae, Dwand ng’atu acel m’ukok akoka i yamba, Wuyik yo pa Rwoth, Wudwok yo pare atira.

⁴ Nwang’u Yohanane bedo ku kendi pare mi yuk ngamia, ku del mir adila i piere; cemo pare de en e bonyo ku kic m’i thim.

⁵ E dhanu mi Yerusalem, ku mi Yahudi ngung’, ku mi ng’om ceke ma ng’et Yordan gilund gicidho i bang’e;

⁶ gimaku baputisi de i bang’e i kulo Yordan, ma gituco ko lemdubo migi de.

⁷ Ento kan eneno dupa mi Jufarisayo ku Jusadukayo de gibebino ba baputisi pare, ewacu igi kumae, Wu nyikwai thwol, ng’a m’upoyowu nipiei ni kwinyo ma bibino?

⁸ Ka kumeno wuceg nyingwu m’uromo ku lokocwiny:

⁹ man iwu kud upid nia wuwac i iwu giwu kumae, Wabedo kud Ibrahim ni wegwa: kum awacu iwu, nia Mungu copo ting’o nyithindho ni Ibrahim ku kidi maeni.

¹⁰ Meni cil kawono lei uvuto ther ulag yen: ka kumeno ku ba yen ceke m’ucego nyinge ma ber ungo jung’ole piny, jubole de i mac.

¹¹ Amio iwu baputisi i pi mi lokocwiny: ento ng’atu m’ulubo ng’eya ebedo ku tego ma sagu an, ma wara pare aromo ngo ya ayei: ebimio baputisi iwu i Tipo Maleng’ i mac bende:

¹² udheru pare ni i cinge, man ebililo laru pare mii; man ebicoko nganu pare i dero, ento ebiwang’u cunge ku mac ma negre ngo.

Yesu Maku Baputisi

¹³ Yesu lund uai Galilaya ebino Yordan ba Yohana, nimaku baputisi i bang’e.

¹⁴ Ento Yohana yenyo ecere, ewacu kumae, An e ma can baputisi m’amak i beng’i nega, e idong’ ibino i bang’a?

¹⁵ Ento Yesu loko lembe ewacu ire kumae, Yi maeni kawono: kum emaku piny iwa kumeno ya waketh bedopwe ceke timbre kakare. E elund eyie.

¹⁶ Yesu de, kan emaku baputisi, eai malu tho kud i pi: nen, polo yabre ire, man eneno Tipo Mungu beloro calu akuru, ebino de i wie;

¹⁷ man nen, dwal uai i polo, uwacu kumae, Meni Woda ma jamerna, ma mutoro nega i kume.