Matayo 27 - The Holy Bible In Alur (Lur) Revised Orthography

Yesu i Wang’ Pilato

¹ Nie kinde ma piny uru, julam ma dongo ceke ku judongo mi dhanu de giporo lembe kum Yesu kara ginege:

² e gitwie, gicidho kude cen, man gimie ni Pilato ma jabim.

Tho pa Yuda

³ Ka Yuda, m’ucibe, neno nia jupoko lembe rac i wie, elund elokre, man edwoko kum mola ma tar pier adek ba julam ma dongo ku judongo,

⁴ ewacu kumae, Adubo kum acibo rimo m’umbe dubo. Ento giwacu kumae, En e ang’o iwa? cung i dhoge.

⁵ Man ekonjo kum mola ma tar i hekalu, eaine woko; ecidh edeire.

⁶ Man julam ma dongo gigamu kum mola ma tarne, giwacu kumae, Cik uyio ngo ya jukethgi i kakanpiny, kum en e wel piny mi rimo.

⁷ E giporo lembe, gidong’ ging’iewd kude podho mi yaca, ma juyiko ie welo.

⁸ Kum kumeno podho maeno julwong’o kumae, Podho mi rimo, cil i ceng’ maeni.

⁹ Lembe ma Yeremia ma jabila yero lund utimbre kakare, m’ewacu kumae, Gigamu sente mi mola ma tar pier adek, wel piny pa ng’atu ma juturo wel piny i kume, ma jumoko ma kind nyithi Israel gituro wel piny i kume;

¹⁰ man gimie ni podho yaca, calu Rwoth ung’olo ira.

Pilato Penjo Yesu

¹¹ Nie Yesu cungo wang’ jabim: jabim de penje, ewacu kumae, In i Ubimo mi Juyahudi? Yesu wacu ire kumae, Iyero.

¹² E ka julam ma dongo ku judongo de gigobe, edwoko lembe moko ngo.

¹³ Pilato lund uwacu ire kumae, Iwinjo min lembe dupa ma giyero i kumi no ngo?

¹⁴ E eloko ire lembe moko ngo, ungo kadok lembe acel de ngo: ketho i jabim uwang’ lii apila.

Jung’olo Tho wi Yesu

¹⁵ Nwang’u en e kura pa jabim ya egony jakol acel i agba ni udul dhanu, ng’atu ma giyenyo.

¹⁶ I nindo maeni nwang’u jakol acel nuti kugi, ma pire yik, ma julwong’o Baraba.

¹⁷ Ka kumeno ka gicokri karacelo, Pilato wacu igi kumae, Wuyenyo ng’a m’agony iwu? Baraba, kadi Yesu ma julwong’o Kristu?

¹⁸ Kum eng’eyo nia gimie kum kumira.

¹⁹ E kinde m’ebedo wi kom mi pokolembe, e cege oro lembe ire, ewacu kumae, Kud irodhri i lembe pa ng’atu ma pwe; kum asendra ku giki dupa tin ku wang’ lek i kume.

²⁰ Nwang’u julam ma dongo ku judongo giloko pido i udul dhanu kara gikwai Baraba, man ginyoth Yesu.

²¹ Ento jabim uloko lembe ewacu igi kumae, Ng’a ma wuyenyo agony iwu i kind juario maeni? E giwacu kumae, Baraba.

²² Pilato wacu igi kumae, Abilund timo ang’o kum Yesu ma julwong’o Kristu? Kagi ceke giwacu kumae, Wek jugure.

²³ Man ewacu kumae, Nedi, etimo ang’o ma raci? Ento gikok apila kumae, Dong’ jugure.

²⁴ Kum kumeno ka Pilato neno nia ecopo timo gin moko ngo, ento yakni re m’ubenyai, egamu pi, elogo ko cinge i wang’ udul dhanu, ewacu kumae, An ambe ku dubo kum rimb ng’atu ma pwe maeni; wucung i dhoge.

²⁵ Dhanu ceke giloko lembe giwacu kumae, Rimbe bed i wiwa, ku nyithindho mwa de.

²⁶ Elund egonyo igi Baraba; ento efodo Yesu emie de ya jugure.

Asikari Cayu Yesu

²⁷ Asikari pa jabim gilund gitero Yesu i Odtiti, man gicoko ungu asikari pet i wang’e.

²⁸ E giwodho bongu pare, man gironye ku jabia ma kwar ngbo.

²⁹ Man gikiedo jamkermiwic mir ukudho giroyo de i wie, giketho undodi de i cinge ma yor acwic; e girum i wang’e, gicaye ko, giwacu kumae, Moth iri, Ubimo mi Juyahudi!

³⁰ Man ging’ulo lau i kume, gigamu undodi gigoyo ko wie.

³¹ E ka gidaru caye, giwodho jabia kud i kume, gironye de ku kendi pare, e gipeye gici gigure.

Maram Juguro Ko Yesu wi Yen M’athara

³² E ka giwok woko, ginwang’u ng’atu acel ma Jakurene, ma nyinge Simon: gicung’e ya gici gikugi, kara eyei yen m’athara pare.

³³ E ka gibino ka ma julwong’o Golgotha, thelembene kumae, Karupokowic,

³⁴ giinio ire pigulok m’ujebre kud ulecu ya emadhi: kan ebilo de, ekwero madhu.

³⁵ E ka gidaru gure, gigoyo jara, gipoko ko kendi pare i kindgi;

³⁶ e gibedo piny gikure keca.

³⁷ Man giketho agobe pare malu i wie m’ugore kumae, MAENI YESU M’UBIMO MI JUYAHUDI.

³⁸ Julund juguro weg ayeki ario gikugi, acel yo ku cinge ma yor acwic, acel ke yor acam.

³⁹ Ju m’ucikukadhu de gi caye, giyengo wigi,

⁴⁰ giwacu kumae, In m’irungo hekalu, kan igome de ceng’ adek, bodhri giri: tek in i Wod Mungu, lor piny ku wi yen m’athara.

⁴¹ Julam ma dongo bende ma gicaye kumeca, ku jugorcik man judongo, giwacu kumae,

⁴² Elaru jumange; ecopo bodhre gire ngo. En e Ubimo mir Israel; wek elor piny kawono ku wi yen m’athara, e wabiyio ire.

⁴³ Egeno ni Mungu; wek elare kawono, tek eyenye: kum ewacu kumae, An a Wod Mungu.

⁴⁴ Weg ayeki bende ma jugurogi gikugi giredho cac ma kumeno i wie.

Tho pa Yesu

⁴⁵ Nie ugambre i saa mir abusiende mudho yutho ng’om ngung’ cil i saa mir abung’wende.

⁴⁶ Ceng’ni saa mir abung’wende Yesu kok ku dwande ma tek, ewacu kumae, Eli, Eli, lama sabakithani? thelembene kumae, Munguna, Munguna, ikuna nedi

⁴⁷ Jumoko m’i kindgi m’ucungo keca, ka giwinje, giwacu kumae, Ng’atuni lwong’o Elia.

⁴⁸ E ndhu ndhu nica ng’atu acel m’i kindgi uringo, man egamu ucoi, epiko ie picwa, ekethe de wi undodi, man emio ire emadhi.

⁴⁹ Juwagi giwacu kumae, Weki; dong’ wanenu tek Elia bino lare.

⁵⁰ E Yesu kok kendo ku dwande ma tek, man eweko tipone kadhu.

⁵¹ Man nen, kusika mi bongu m’i hekalu kak dra ugambre i wie cik piny; ng’om de yengre; cana de ng’eny;

⁵² odliel de yabre; avu dupa de mi jumaleng’ ma ginindo gicer;

⁵³ E giai woko kud i odliel yo ng’ei cer pare gimondo de i adhura ma leng’ man ginyuthri ni dhanu dupa.

⁵⁴ Nwang’u jego, ku ju ma gibedo gikugi m’ubekuro Yesu, ka gineno digidi, ku gin m’utimbre de, lworo negogi dit apila, giwacu kumae, Andha ng’atuni en e Wod Mungu.

⁵⁵ Mon de dupa ginuti kakeca ma ginene ku cen, ma gigamu lubo ng’ei Yesu kud i Galilaya, ma gitimo ire:

⁵⁶ Mariamu Magdalene, ku Mariamu ma meg Yakobo ku Yose, ma min wot Zebedayo gini i kindgi.

Kuny pa Yesu

⁵⁷ Ka piny udoko uthieno, ng’atu acel ma jalonyo m’uai Arimathaya bino, ma nyinge Yusuf, ma en bende e jalub Yesu:

⁵⁸ ng’atuni cidho ba Pilato, ekwayu avuj Yesu de. Pilato lund ung’olo ya jumie.

⁵⁹ E Yusuf ugamu avuje, eboye de i bongu ma leng’ ma nwang’,

⁶⁰ man ekethe i liel m’aroka i cana ma nyen ma pare gire, m’eroko i cana: eng’ielo kidi ma dit de dhugola mi liende, e ecidho.

⁶¹ Nwang’u Mariamu Magdalene, ku Mariamu mange, gini keca, gibedo kum liel m’aroka i cana.

Jukur Liel

⁶² Nie urwone, ma en e yo ng’ei Yikopiny, julam ma dongo ku Jufarisayo gicokri karacelo ba Pilato,

⁶³ giwacu kumae, Rwoth, wapoi ya jabombi maeno wacu kumae, ma fodi ekwo, Yo ng’ei ceng’ adek abicer kendo.

⁶⁴ Ka kumeno ng’ol ya jukur liel m’aroka i cana krr cil i ceng’ adek, julubne maru bino kwale, gimaru wacu ni dhanu kumae, Ecer ku kind ju m’utho: e awondi ma cen bibedo rac ma sagu ma kwong’a.

⁶⁵ Pilato wacu igi kumae, Wutie ku jukur: wuci wukethe bed krr calu wucopo.

⁶⁶ Ka kumeno gicidho, man giketho liende bedo krr, gimwono ayi kum kidi, jukur de ginuti gikugi.