Matayo 25 - The Holy Bible In Alur (Lur) Revised Orthography

Lembabola pi Jumanyir Apar ma Gi Sumba

¹ Ker mi polo jubilund poro ku jumanyir apar ma gi sumba, ma gigamu thala migi, gicidho de nirombo ku cwar mugole.

² Juabic m’i kindgi gi jukusegu, abic ke gi jurieko.

³ Kum ju ma gi jukusegu, ka gigamu thala migi, gigamu ku moje ngo:

⁴ ento ju ma gi jurieko giting’o mo i upoko migi ku thala migi.

⁵ Nie kinde ma cwar mugole galu kagi ceke rip rip uterogi e ginindo.

⁶ Ento i diewor ma ling’ jukok akoka kumae, Nen, cwar mugole! Wuwok wung’ole.

⁷ E jumanyir ma sumba maeno ceke gilund giai malu, gimaku yiko thala migi.

⁸ Man ju ma gi jukusegu giwacu ni ju ma jurieko kumae, Wumi iwa kum mo mu moko do; kum thala mwa betho.

⁹ Ento ju ma gi jurieko gidwoko lembe, giwacu kumae, Kuno nyo ebiromo wan wakudu de ngo: maku wuci ba jukuloka, man wung’ieu mu giwu.

¹⁰ E kinde ma gicidho ning’iewo, cwar mugole wok; e ju ma giyikri gimondo gikugi ba cemo mir ambadha: e juciko dhugola.

¹¹ Ku ng’eye jumanyir wadi ma sumba de gibino giwacu kumae, Rwoth, Rwoth yab iwa do.

¹² Ento eloko lembe, ewacu kumae, Awacu iwu andha, Ang’eyowu ngo.

¹³ Ka kumeno dong’ wuki, kum wung’eyo cenge kadi saane de ngo.

Lembabola pi Talanto

¹⁴ Kum en e calu ka ng’atu acel ubecidho i ng’om mange, elwong’o jumiru pare ma dhe, emio jupiny pare de igi.

¹⁵ Ni ng’atu acel emio talanto abic, ni ng’atu mange de ario, ni mange ke acel, kubang’gi nzu ng’atuman calu ma kakore; e ecidho i woth pare.

¹⁶ Ndhu ndhu nica ng’atu m’ugamu talanto abic ecidho eloko ko talanto abic mange.

¹⁷ Ng’atu m’ugamu ario bende kumeca eloko ario mange.

¹⁸ Ento ng’atu m’ugamu acel re ecidho ekunye i ng’om, ekanu sente pa rwoth pare.

¹⁹ Nie ka nindo ton hai rwoth mi jumiru maeno bino, e gikwanu wel gikugi.

²⁰ Ng’atu m’ugamu talanto abic ebino ekelo talanto abic mange, ewacu kumae, Rwoth, imio ira talanto abic: nen, aloko talanto abic mange.

²¹ Rwoth pare loko ire lembe kumae, Itimo dre, i jatic ma ber mandha de: ibedo mandha i gin ma nyanok, abikethi wi gin dupa; mond i mutoro pa rwoth peri.

²² Ng’atu m’ugamu talanto ario bende ebino ewacu kumae, Rwoth imio ira talanto ario: nen, aloko talanto ario mange.

²³ Rwoth pare wacu ire kumae, Itimo dre, i jatic ma ber mandha de: ibedo mandha i gin ma nyanok, abikethi wi gin dupa; mond i mutoro pa rwoth peri.

²⁴ Ng’atu m’ugamu talanto acel ubino bende ewacu kumae, Rwoth, ang’eyo nia in i ng’atu ma lembe peri tek, ikayu ka ma icoyo i ie ngo, icoko de ka m’imoyo i ie in ungo;

²⁵ e lworo maka, acidho de akanu talanto peri i ng’om: nen, piny peri ni giri.

²⁶ Ento rwoth pare loko lembe ewacu ire kumae, In i jatic ma rac ma janyap bende, ing’eyo nia akayu ka m’acoyo an ungo, acoko ka m’aketho i ie an ungo;

²⁷ ka kumeno maku iketh sente para ba juwil sente, kara kan abino agam gira ku kulokane de.

²⁸ Ka kumeno wumai talanto woko kud i bang’e, wumi de ni ng’atu ma won talanto apar.

²⁹ Kum ku ba dhanu ceke ma tek ubedo ko emire ire, man ebibedo ko le: ento ng’atu m’ubedo ko ngo, cil maeno m’ebedo ko de jubimayu woko.

³⁰ Man wubai jamiru ma kuloka pare mbe i mudho ma woko: ywak ku kayu lak de bibedo nuti.

Pokolembe wi Thek

³¹ Ento ka Wod dhanu bibino i dwong’ pare, ku malaika ceke gikugi, ebilund jany wi komker mi dwong’ pare:

³² man thek ceke bicokri i wang’e: man ebikoyo kindgi ku juwagi, calu jakwac koyo rombe ku kind diegi;

³³ man ebiketho rombe yo ku cinge ma yor acwic, diegi ke yo ku cinge ma yor acam.

³⁴ Ubimo bilund wacu ni ju ma yo ku cinge ma yor acwic kumae, Wubin wu ju ma Vwa dwokowu jumugisa, wucam pacu mi ker m’ubedo ayika iwu ugambre i thekri mi ng’om:

³⁵ kum nwang’u kec unega, man wumio ira acam; nwang’u rieu unega, man wumio ira giramadha; nwang’u a welo, man wujola;

³⁶ muneru de, man wuronya; nwang’u kuma lith, man wuliewa; nwang’u ani i odkol, man wubino i bang’a.

³⁷ Weg bedopwe gibilund loko ire lembe, gibiwacu kumae, Rwoth, waneni awene ma kec ubenegi, ka wamio iri cami? kadi ma rieu benegi, ka wamio iri giramadha?

³⁸ Waneni de awene m’i welo, ka wajoli? kadi muneru, ka waronyi?

³⁹ Waneni de awene ma kumi lithi, kadi i odkol, ka wabino i beng’i

⁴⁰ Ubimo de biloko lembe ebiwacu igi kumae, Andha awacu iwu kumae, Kum calu wutime ni ng’atu acel ma kind utumira maeni, cil ni maeni ma gi nyithigiki nwang’u wutime ira.

⁴¹ Ebilund wacu ni ju ma ni yo ku cinge ma yor acam bende kumae, Wuai woko kud i vuta, wun ma wubedo akwong’a, i mac ma rondo ku rondo m’ubedo ayika ni wonabali ku malaika pare:

⁴² kum nwang’u kec unega, wumio ira cemo de ngo; nwang’u rieu nega, wumio ira giramadha de ngo;

⁴³ nwang’u a welo, wujola de ngo; muneru de, wuronya de ngo; kuma lith, ani i odkol de, wuliewa de ngo.

⁴⁴ Gibilund dwoko lembe bende, gibiwacu kumae, Rwoth, waneni awene nwang’u kec ubenegi, kadi rieu, kadi m’i welo, kadi muneru, kadi nwang’u kumi lith, kadi i odkol, ka watimo iri ngo?

⁴⁵ Ebilund loko lembe igi, ebiwacu kumae, Andha awacu iwu kumae, kum calu wutime ngo ni ng’atu acel mi kind maeni ma nyithigiki, nwang’u wutime ira ngo.

⁴⁶ E joni gibicidho migi i masendi ma rondo ku rondo: ento weg bedopwe i kwo ma rondo ku rondo.