Matayo 10 - The Holy Bible In Alur (Lur) Revised Orthography

Yesu Caku Jukwenda Apar wi Ario

¹ Man elwong’o julubne apar wi ario i bang’e, man emio igi ng’ol wi tipo m’ucido, ma giwodh kogi woko, man gikei ko kwond tho ceke m’unyang’ i kum ku kwond tho ceke mange de.

² Nwang’u nying’ jukwenda apar wi ario gi eni: Ma kwong’ane, Simon, ma julwong’o Petro, man Andrea m’umin mire; Yakobo ma wod Zebedayo, man Yohana m’umin mire;

³ Filipo, man Bartolomayo; Thoma, man Matayo ma won ajok: Yakobo ma wod Alfayo, man Thadayo;

⁴ Simon ma Jakananayo, man Yuda Iskariote, m’ucibe bende.

Yesu Oro Juapar wi Ario Ku Ng’ol

⁵ Yesu oro juapar wi ario maeni, man eng’olo igi, ewacu kumae, Kud wucidh i yo moko mi Thekdhanumange, man kud wumond i adhura moko mi Jusamaria:

⁶ ento ma sagu wucidh ba rombe m’urwinyo m’i ot pa Israel.

⁷ Ka wucidho de, wuyer, wuwac kumae, Ker m’i polo dhingo.

⁸ Wukei kum weg tho, wuketh ju m’utho cer, wulony weg joi, wuwodh pajogi woko: wumaku k’abamba, dong’ wumi k’abamba.

⁹ Kud wutwek mola ma kwar, kadok mola ma tar de, kadok mola i gbethe mu:

¹⁰ kulubu de ngo mi woth mu, kadok jabia de ario, kadi wara, kadi uluth; kum jatic uromo ku cemo pare.

¹¹ Man i adhura kadi i pacu ceke ma tek wubimondo i ie, wuyeny ng’atu m’uromo i ie; wubed keca de maram wuai ko woko.

¹² Ka wumondo de i ot, wumothe.

¹³ Man tek ode romo, wek kwiocwiny mu bin i wie: ento tek eromo ngo, wek kwiocwiny mu dwog i beng’wu.

¹⁴ Ng’atu ma tek bijolowu ngo, kadi m’uwinjo lembe mu ngo, ka wuai kud i oduca kadi adhura nica, wukir utur m’i tiendwu woko.

¹⁵ Andha awacu iwu kumae, I ceng’ mi pokolembe, pokolembe mi ng’om Sodom ku Gomora bibedo ber ma sagu mir adhura maeno.

Ragedo ma Gibinwang’u

¹⁶ Nen, aorowu calu rombe i kind urudi: ka kumeno wubed riu pami thwol, wubed ming’ de pamir akuru.

¹⁷ Ento wukuru ni dhanu: kum gibimiowu i dilo, i kacokri migi de gibifodowu;

¹⁸ eyo man gibiterowu i wang’ jubim ku ju m’ubimo de pira, ni lembatuca igi ku Thekdhanumange de.

¹⁹ Ento ka jumiowu, cwinywu kud uring maram wubiweco ko kadi pi lembe de ma wubiweco: kum gin ma wubiyero bimire iwu i saa nica.

²⁰ Kum wuweco wun ungo, ento Tipo pa Wegwu e m’ubeweco i iwu.

²¹ Umego de biting’o umin wang’ tho, won nyathin de biting’o nyathi pare: nyithindho de gibijai kum junyodo migi, e gibiketho juneggi.

²² Man dhanu ceke gibidaguwu kum nyinga: ento ng’atu m’uciro cil i kajikne, ng’atuni e ma biboth.

²³ Ento ka ginyayu ragedo i kumwu i adhura maeni, wuring i mange: kum andha awacu iwu kumae, Wubikadhu ku i adhura pa Israel ungo, ka fodi Wod dhanu kubino ngo.

²⁴ Jalub sagu japonji pare ngo, kadok jamiru de sagu rwodhe ngo.

²⁵ Eromo ni jalub ya ebed calu japonji pare, jamiru de calu rwodhe. Tek gilwong’o won ot Beelzebul, gibilwong’o wat pare kumeno ma sagu dit!

Ng’atu ma Maku Julwor

²⁶ Ka kumeno kud wulworgi: kum gin moko mbe ma umbre, ma binyuthre ngo; ma kandre de, ma bing’eire ngo.

²⁷ Gin m’ayero iwu i piny ma col wuyer i der: gin ma wuwinjo de i ithwu, wuyere wi ot.

²⁸ Man kud wulwor ju ma nego kum, ento ng’eyong’ec re negre igi ngo: ento ma sagu wulwor ng’atu ma copo nyotho ng’eyong’ec ku kum de i gehena.

²⁹ Kira ario juloko ku sente ngo? man acel m’i kindgi mbe ma bipodho i ng’om ma Wego mbe:

³⁰ ento cil yukwiwu ceke kwandre.

³¹ Ka kumeno kud wulwor: wun wu ber ma sagu kira dupa.

Tuco Kristu i Wang’ Dhanu

³² Ka kumeno ku ba dhanu nzu ma bituca i wang’ dhanu, an bende abituce i wang’, Vwa ma ni i polo.

³³ Ento ng’atu ma tek bikwera i wang’ dhanu, an bende abikwere i wang’ Vwa ma ni i polo.

Kwiocwiny Ungo, Ere Palamularu

³⁴ Iwu kud uwac nyo abino bolo kwiocwiny i ng’om: abino bolo kwiocwiny ungo, ento palamularu re:

³⁵ Kum abino poko kind nico ku won mire, nyaku ke giku min mire, dhaku ke ku wang’umire:

³⁶ man ke judegi pa ng’atu moko bibedo wat pare ma dhe.

³⁷ Ng’atu m’umaru won kadi min ma sagu an eromo kuda ngo; ng’atu m’umaru wode kadi nyare de ma sagu an eromo kuda ngo.

³⁸ Ng’atu m’uting’o yen m’athara pare ngo elubo ng’eya de, romo kuda ngo.

³⁹ Ng’atu m’unwang’u kwo pare ebirwinye; man ng’atu m’urwinyo kwo pare pira ebinwang’e.

Sukulia

⁴⁰ Ng’atu m’ujolowu nwang’u ejolo an, man ng’atu m’ujolo an nwang’u ejolo ng’atu m’uora.

⁴¹ Ng’atu m’ujolo jabila i nying’ jabila ebimaku sukulia pa jabila: ng’atu m’ujolo ng’atu ma pwe i nying’ ng’atu ma pwe ebimaku sukulia pa ng’atu ma pwe.

⁴² Ng’atu ma tek bimio kikombe mi pi ma ng’ic ni ng’atu acel m’i kind nyithindho ma thindho maeni ya emadhi, i nying’ jalub, awacu iwu andha sukulia pare birwinyo ire ki ngo.