Marko 1 - The Holy Bible In Alur (Lur) Revised Orthography

Ponji pa Yohana ma Jabaputisi

¹ Thangambere mi lembanyong’a ma juboth ko pa Yesu Kristu, ma Wod Mungu.

² Cil calu egore i Isaya ma jabila kumae, Nen, aoro jakwenda para i weng’i, Ma biyiko yo peri;

³ Dwand ng’atu m’ubekok akoka i yamba kumae, Wuyik yo pa Rwoth, Wutir yo pare;

⁴ Yohana bino, m’umio baputisi i yamba man eyero pi baputisi mi lokocwiny mi wekodubo.

⁵ Ng’ommi Yahudi ngung’ gicidho i bang’e, ku ju ma Yerusalem ceke; man emio igi baputisi i kulo Yordan, ma gituco ko dubo migi.

⁶ Yohana kendo kendi mi yuk ngamia, ku foto mir adila i piere, man ebedecamu bonyo ku kic m’i thim.

⁷ Man eyero, ewacu kumae, Ng’atu m’ubino i ng’eya e tek ma saga, ma an aromo ngo ya agung’ agony wara pare.

⁸ Amio baputisi iwu i pi; ento en re ebimio baputisi iwu i Tipo Maleng’.

Yesu Maku Baputisi

⁹ Man etimbre i ceng’ maeno, nia Yesu ai Nazareti mi Galilaya, e Yohana mio ire baputisi i Yordan.

¹⁰ E ndhu ndhu nica kinde m’eai kud i pi, eneno polo kak dra, man Tipo ma calu akuru beloro i wie:

¹¹ e dwal uai kud i polo kumae, In i Woda ma jamerna, ma mutoro nega i kumi.

Jubidho Yesu

¹² E aruca ruca nica Tipo cwale i yamba.

¹³ Ebedo i yamba ceng’ pier ang’wen ma Jok ubedubidhe ko; man ebedo karacelo ku yedi m’i thim; e malaika gitimo ire.

Yesu Caku Tic Pare i Galilaya

¹⁴ Nie yo ng’ei maku Yohana, Yesu bino Galilaya, m’ebeyero lembanyong’a pa Mungu ma juboth ko,

¹⁵ ewacu kumae, Nindo timbre kakare, ker pa Mungu de ni ceng’ni: wulok cwinywu, wuyi lembanyong’a ma juboth ko.

Yesu Lwong’o Junam Ang’wen

¹⁶ Nie kan eberobo nam mi Galilaya, eneno Simon gikud Andrea m’umin Simon ma gibebolo voi i nam; kum gi junam.

¹⁷ Yesu wacu igi kumae, Wubin wulub ng’eya, man abidwokowu ni junam mi dhanu.

¹⁸ E ndhu ndhu nica giweko voi migi, gilubo ng’eye.

¹⁹ Man ecidho nyangba, e eneno Yakobo ma wod Zebedayo, man Yohana m’umin mire, gin de gini i yei gibeyiko voi.

²⁰ E ndhu ndhu nica elwong’ogi: e giweko weggi ma Zebedayo dong’ i yei ku jutic mi sukulia, man gilubo ng’eye.

Won Tipo M’ucido

²¹ Gicidho de i Kapernaum; e aruca ruca nica i ceng’ sabatu emondo i kacoi, kri eponjo de.

²² E igi wang’ lii kum po nji pare: kum eponjogi calu ebedo ku ng’ol, calu jugorcik de ngo.

²³ E ndhu ndhu nica jalacel nuti i kacokri migi ma won tipo m’ucido; ekok akoka,

²⁴ ewacu kumae, Lembe mwa ang’o wakudu, in i Yesu ma Janazareti? ibino ninyothowa? ang’ei in i ng’adi, ma Ng’atu Maleng’ pa Mungu.

²⁵ Yesu juke, ewacu kumae, Bed ling’, ai woko kud i ie.

²⁶ E tipo m’ucido, kan ekaku ie ekok de ku dwande ma tek, eai woko kud i ie.

²⁷ E kagi ceke igi wang’ lii, ketho gipenjri gigi, giwacu kumae, Maeni ang’o? ponji ma nyen! ku ng’ol ejuko cil tipo m’ucido, e giwore.

²⁸ E ndhu ndhu nica pire yik mba mba i ng’om Galilaya ceke.

Yesu Keyo Kum Dhamaru Petro

²⁹ E eni eni, ka giai kud i kacokri, gibino i ot pa Simon gikud Andrea, ku i Yakobo man Yohana.

³⁰ Nwang’u dhamaru Simon uvuto ku tho ma cego kum; e pio pio giyero pire ire:

³¹ man ebino, i eting’e malu ku cinge; e kume m’ucek uweke, en de etimo igi.

Yesu Keyo Kum Weg Tho Dupa

³² Kud uthieno, ka ceng’ upodho, gii kelo ju ma kumgi lith ceke i bang’e, ku weg pajogi bende.

³³ Dhanu ceke ma i i adhura de gicokri karacelo dhugola.

³⁴ E ekeyo kum dhanu dupa ma tho je tung’ tung’, ewodho pajogi de dupa; eyio ngo ya pajogi giweci, kum ging’eye.

Yesu Ponjo kind Pacu Ndri Ndri

³⁵ Kugweno, ma fodi piny nyambiambia, eai malu ewok woko, ecidho ka ma ngele, e erwo keca.

³⁶ Simon ku ju ma gibedo kugi gilubo ng’eye;

³⁷ e ginwang’e, giwacu ire kumae, Dhanu ceke gibeyenyi.

³⁸ Ewacu igi kumae, Wek waci kamange i pacu ma ceng’ni, kara ayer kuca bende; kum abino kum lembe nini.

³⁹ Man emondo i kacokri migi cil i Galilaya ndri ndri, m’eyero ewodho ko pajogi bende.

Yesu Lonyo Kum Won Joi

⁴⁰ Ng’atu acel ubino i bang’e ma won joi, erum piny i bang’e, ekwaye, ewacu ire kumae, Tek iyenyo, icopo dwoka leng’.

⁴¹ E en ma ngisi nege, erieyo cinge, emulo ko kume, ewacu ire kumae, Ayenyo; kumi dok leng’.

⁴² E kadhoge nica joi weke, man edoko leng’.

⁴³ E eng’olo ire lembe ngili ngili, e ndhu ndhu nica ecore woko,

⁴⁴ ewacu ire kumae, Nen kud iyer gin moko ni ng’atu moko: ento cidhi inyuthri ni jalam, ithier gin mi dwokoleng’ peri ma Musa ng’olo, ni lembatuca igi.

⁴⁵ Ento ewok woko, emaku rweyo pire dit, ketho lembene yik tir, ketho ya Yesu copo mondo ngbeng’ kendo ngo i adhura, ento ebedo cen i ka ma ngele: man giai kun ku kun ceke gibino i bang’e.