Malaki 3 - The Holy Bible In Alur (Lur) Revised Orthography

¹ Nen, aoro jakwenda para, man ebiyiko yo i wang’a: man Rwoth, ma wuyenyo, ebiwok mbwang’ i hekalu pare; man jakwenda mi lembariba, ma mutoro negowu i kume, nen, ebino, Yehova mir udul uwacu.

² Ento ng’a ma copo ciro ceng’ mi bino pare? man ng’a ma bicungo kan enyuthre? kum en e calu mac ma wang’u, man calu sabuni pa jalwokbongu:

³ man ebibedo calu jabodho ma wang’u man jadwok mola ma tar leng’, e ebidwoko wot Lawi leng’ man ebidwokogi leng’ calu judwoko mola ma kwar ku mola ma tar leng’; e gibithiero girathiera ni Yehova i bedopwe.

⁴ Girathiera mi Yuda ku girathiera mi Yerusalem bilund nyayu mutoro i Yehova, calu i ceng’ ma con, man calu i rundi ma con.

⁵ E abibino ceng’ni wu i pokolembe; man abibedo mulembe ma pio kum weg ajoga, man kum weg dubriswa, man wi ju ma kwong’o kwong’ mi ndra, man kum ju ma vugo ng’atu ma julonyo ku sukulia, man kum ju ma vugo dhaku ma cware tho, ku kic de, man kum ju ma loko umondo kud unwang’ ng’ol pare, man gilwora ngo, Yehova mir udul uwacu.

Mio Apaje

⁶ Kum an, an a Yehova, alokra ngo; ka kumeno wun, E wot Yakobo wunyothru ngo.

⁷ Ugambre i ceng’ pa kwaruwu wulokru ku kum lembapoka para, man wuwor ogi ngo. Wudwog i bang’a, e abidwogo i beng’wu, Yehova mir udul uwacu. Ento wuwacu kumae, Wadwog i beng’i i gin ma kani?

⁸ Dhanu bikwalu ba Mungu? ento wukwalu i bang’a. Ento wuwacu kumae, Wakwalu i beng’i i gin ma kani? I piny m’apaje ku girathiera.

⁹ Jukwong’owu ku kwong’; kum wukwalu i bang’a, cil thek maeni bo.

¹⁰ Wukel apajpiny ma bo i odkanpiny, kara cam ubed nuti i ot para, man wumul ia kawono kum maeni, Yehova mir udul uwacu, tek abiyabu iwu wang’ polo ngo, man abikonjo iwu mugisa, kara ka m’urome bed umbe.

¹¹ Man abijuko jacam piny piwu, man ebinyotho nying’ ng’om mu ngo; kadok ulok mu de bioyo nyinge ngo i podho ma fodi nindone kutundo ngo, Yehova mir udul uwacu.

¹² Man thek ceke bilwong’owu jumutoro: kum wubibedo ni ng’om ma nyayu mutoro i jo, Yehova mir udul uwacu.

Tung’ Tung’ mi Ju ma Pwe ku Judubo

¹³ Lembe mu bedo tek i kuma, Yehova wacu. Ento wuwacu kumae, Wayero ang’o i kumi?

¹⁴ Wuwacu kumae, Timo ni Mungu en e mananu; man kuloka ang’o iwa ma wakuro kur pare, ma nia wawoth ku can i wang’ Yehova mir uduli?

¹⁵ man kawono walwong’o jukuhaya e ma gi jumutoro; eyo, ju ma gitimo dubo e ma lembe bedo miero igi; eyo, gibidho Mungu, man giboth.

¹⁶ Ju ma lworo Yehova gilund giwecri i kindgi; e Yehova ciko ithe, man ewinjo, e kitabu mi poi ukieure i wang’e, pi ju ma lworo Yehova, man pia igi pido pi nyinge.

¹⁷ E gibibedo para, Yehova mir udul uwacu, cu piny para ma dhe, i ceng’ m’atimo ie maeni; e kisa binega i kumgi, calu kisa nego dhanu kum wode ma dhe ma timo ire.

¹⁸ Wubilund dwogo man wubing’io kind weg bedopwe ku judubo, man ju m’utimo ni Mungu ku ju m’utimo ire ngo.