Malaki 2 - The Holy Bible In Alur (Lur) Revised Orthography

¹ Man kawono, E wu julam, lembang’ola maeni en e piwu.

² Tek wubiwinjo ngo, man tek wubiketho cwinywu i kume ngo, kara wumi yung ni nyinga, Yehova mir udul uwacu, abilund oro kwong’ i wiwu, man abikwong’o mugisa mu; eyo, adaru kwong’ogi, kum wuketho cwinywu i kume ngo.

³ Nen, abijuko kodhi mu, man abiwiro weyo i weng’wu, en e weyo mir agba mu; e jubikabuwu woko, karacelo kude.

⁴ Man wubing’eyo nia aoro lembang’ola maeni iwu an, kara lembariba para bed ku Lawi, Yehova mir udul uwacu.

⁵ Lembariba para bedo kude mi kwo man mi kwiocwiny; man amiogi ire kara lworo nege; e elwora, man ndiri make kum nyinga.

⁶ Cik mi lemandha ni i dhoge, man gondri nwangre ngo i dendhoge: wawotho wakude i kwiocwiny man atira, man eloko dhanu dupa kud i kier.

⁷ Kum maku dendhu jalam ugwok ng’eyong’ec, man maku giyeny cik i dhoge; kum en e jakwenda pa Yehova mir udul.

⁸ Ento wukier kud i yo; wuketho dhanu dupa podho i cik; wunyotho lembariba pa Lawi, Yehova mir udul uwacu.

⁹ Ka kumeno an bende adwokowu ni gin mi cac ku gin ma ng’ic i wang’ dhanu ceke, calku yo para ma wugwoko ngo, ento dhanu bedo tung’ tung’ iwu i cik.

Jucimo Israel kum Bedo Mandha Ngo Migi

¹⁰ Wan ceke wegwa acel ungo? Mungu acel ucwiowa ngo? nedi watimo kud awondi ng’atuman ku wadi man ku wadi, ma wacido ko lembariba pa kwaruwa?

¹¹ Yuda timo kud awondi, man ginmajudagu utimbre i Israel man i Yerusalem: kum Yuda cido leng’ pa Yehova m’emaru, man egamu nya mungu ma wi rok.

¹² Ng’atu m’utimo maeni, Yehova bithume cen, ng’atu m’uceu ku ng’atu m’udwoko lembe, kud i hema pa Yakobo, man ng’atu m’uthiero girathiera ni Yehova mir udul.

¹³ Man wutimo maeni kendo: wuumo pemblam pa Yehova ku piwang’, ku ywak, man ku gamucwiny, ketho nia eneno girathiera kendo ngo, kadok ajola de ejole ku mutoro ngo kud i cingwu.

¹⁴ Ento wuwacu kumae, Nedi? Kum Yehova en e jamulembe i kindwu wuku dhaku mir aradu peri, m’itimo ire kud awondi, kadok en e wedu, man dhaku mi lembariba peri.

¹⁵ Man etimo acel ungo, kadok ebedo ku dong’ Tipo? Man acel mir ang’o? Eyenyo kodhi mi koth Mungu. Ka kumeno gwok cwinyi, man ng’atu moko kud utim awondi kum dhaku mir aradu pare.

¹⁶ Kum adagu landumon, Yehova, Mungu mir Israel uwacu, man ng’atu ma umo kendi pare ku rop, Yehova mir udul uwacu: ka kumeno wugwok cwinywu, kara kud wutim awondi.

Ceng’ mi Pokolembe ni Ceng’ni

¹⁷ Wuolo Yehova ku lembe mu. Ento wuwacu kumae, Waole kud ang’o? Kum wuwacu kumae, Ku ba dhanu ceke ma timo dubo ebedo ber i wang’ Yehova, man anyong’a nege i kumgi; kadi Mungu mi pokolembe eni kani?