Malaki 1 - The Holy Bible In Alur (Lur) Revised Orthography

Mer pa Yehova ba Yakobo

¹ Ewolembe mi lembe pa Yehova ni Israel ni kum Malaki.

² Amaruwu, Yehova wacu. Ento wuwacu kumae, Imaruwa ni kum ang’o? Esau en e umin Yakobo ngo? Yehova wacu: ento amaru Yakobo:

³ ento Esau adagu, man adwoko gudi pare ni uvuru, man amio camupacu pare ni utho m’i yamba.

⁴ Kadok Edom uwacu kumae, Junyonowa piny, ento wabidwogo man wabigomo ka m’udong’ ni uvuru; Yehova mir udul uwacu kumae, Gibigomo, ento abirwombo piny; man dhanu bilwong’ogi kumae, Kieu mi dubo, man kumae, Dhanu ma ng’ecwiny unego Yehova i kumgi nja.

⁵ E weng’wu bineno, man wubiwacu kumae, Dong’ juyung Yehova loka kieu mir Israel.

Yehova Juko Julam

⁶ Wod yungo won, man jatic jadit pare: ka kumeno tek an a wego, yung para ni kani? man tek an a jadit, lworo para ni kani? Yehova mir udul upenjowu, E julam, ma wucayu nyinga. Man wuwacu kumae, Wacayu nyingi kum ang’o?

⁷ Wuthiero kwen m’ucido wi pemblam para. Man wuwacu kumae, Wacidi kum ang’o? Kum wuwacu kumae, Mesa pa Yehova bedo mi cac.

⁸ Man ka wuthiero abinga ni lam, en e dubo ngo? man ka wuthiero gin m’abala mi tielo ni i kume ku gin ma kume ju tho, maeni en e dubo ngo? Thiere kawono ni jabim peri; anyong’a binege i kumi? kadi ebijolo kumi? Yehova mir udul uwacu.

⁹ Man kawono, akwayuwu, wukwai ngisi pa Mungu, kara ebed ku bero i kumwa: gin maeni wok ni kumwu: ebijolo kind kumwu moko? Yehova mir udul uwacu.

¹⁰ A tek ng’atu acel ni i kindwu ma biciko dhugola, kara kud wukudh mac mananu wi pemblam para! mutoro nega ngo i kumwu, Yehova mir udul uwacu, kadok lam mi cingwu de abijolo ngo.

¹¹ Kum ugambre i wok mi ceng’ cil kum mwony mi ceng’ nyinga bibedo dwong’ i kind Thekdhanumange; man i kaka ceke jubithiero udok ma ng’wice ng’ar ni nyinga, man lam ma leng’: kum nyinga bibedo dwong’ i kind Thekdhanumange, Yehova mir udul uwacu.

¹² Ento wucide; kum wuwacu kumae, Mesa pa Yehova cido, ku nyingene de, cil cemo pare, en e mi cac.

¹³ Wuwacu bende kumae, Nen, gin maeni olojo kumeni! man wucwaku umwu i kume, Yehova mir udul uwacu; man wukelo gin ma jugamu ku rop, ku gin m’abala mi tielo ni i kume, ku gin ma kume ju tho; wukelo girathiera kumeno: maku ajol maeni kud i cingwu? Yehova wacu.

¹⁴ Ento kwong’ ubed wi jabombi, m’ebedo ku co i udul rombe pare, man eng’olo lembang’ola, elamu ni Rwoth de gin ma poyo ni i kume; kum an a Ubimo ma dit, Yehova mir udul uwacu, man nyinga en e ung’oindiri i kind Thekdhanumange.