Luka 6 - The Holy Bible In Alur (Lur) Revised Orthography

Julub Ujaku Jang Cam Ceng’ Sabatu

¹ Nie etimbre i ceng’ sabatu, nwang’u ebekadhu ku kind podho cam, julubne gijaku jang cam, gitinyo i cing’gi de, man gimwodo.

² Ento jumoko ma kind Jufarisayo giwacu kumae, Nedi wutimo gin ma cik uyio ngo i ceng’ sabatu?

³ Yesu loko lembe ewacu igi kumae, Wusomo ngo cil maeni ma Daudi timo nwang’u kec ubenege, en, ku ju ma ginuti gikugi de;

⁴ maram emondo ko i ot pa Mungu, man eting’o ecamu kwen m’anyutha, emio de ni ju ma gini i bang’e; ma cik uyio ngo nia jucam ndhu ni julam kengi?

⁵ Ewacu igi kumae, Wod dhanu en e rwoth mi ceng’ sabatu.

Ng’atu ma Cinge Lindre

⁶ Etimbre i ceng’ sabatu mange, nia emondo i kacokri eponjo de: ng’atu moko de ni keca, ma cinge ma yor acwic ulindre.

⁷ E jugorcik ku Jufarisayo de gilibe, tek ebikeyo kum ceng’ sabatu; kara ginwang’ maram gidote ko.

⁸ Ento eng’eyo pidoic migi; man ewacu ni ng’atu ma cinge lindre kumae, Ai malu, man icung i diere. E eai ecungo.

⁹ Yesu wacu igi kumae, Apenjowu, Cik uyio ya jutim beri, kadi rac i ceng’ sabatu? bodho kwo, kadi nyothe?

¹⁰ Enenogi ceke kun ku kun de, man ewacu ire kumae, Riei cingi. E etimo kumeno: man cinge dok kakare.

¹¹ Ento gipong’ ku ng’ecwiny ma tek man giwecri gigi pi gin ma gitim kum Yesu.

Yesu Caku Jukwenda Apar wi Ario

¹² Man etimbre i ceng’ maeni, nia ecidho i got nirwo; man ebedo diewor soro i rwo ni Mungu.

¹³ Man ka piny uru, elwong’o julubne; man egoyo nying’ juapar wi ario kud i kindgi, m’elwong’ogi jukwenda:

¹⁴ Simon, m’elwong’o nyinge Petro, man Andrea m’umin mire, man Yakobo ku Yohana, man Filipo giku Bartolomayo,

¹⁵ man Matayo giku Thoma, man Yakobo ma wod Alfayo, ku Simon ma julwong’o Zelote,

¹⁶ man Yuda ma wod Yakobo, man Yuda Iskariote, m’edoko jaganda.

Yesu Timo ni Udul Dhanu

¹⁷ Man eloro piny gikugi, man ecungo wi pambu, kud udul julubne ma dit, man udul dhanu dupa m’uai i Yahudi ku Yerusalem, man dhu wath mi Turo ku Sidon, ma gibino winje, kara jukei tho migi de;

¹⁸ man ju ma tipo m’ucido sendogi kumgi kei.

¹⁹ Udul dhanu ceke de giyenyo gimul kume; kum tego ai i bang’e m’ukeyo kumgi ceke.

Mugisa ku Can

²⁰ Man eng’ayu wang’e malu ba julubne, ewacu kumae, Mugisa iwu wu ju ma jucan: kum ker pa Mungu en e mu.

²¹ Mugisa iwu wu ju ma kec unegowu kawono: kum wubiyeng’. Mugisa iwu wu ju m’uywak kawono: kum wubing’iero.

²² Mugisa iwu, ka dhanu bidaguwu, ka gibikoyowu kud i kindgi, gicayuwu de, man gibayu nyingwu woko calu gi rac, pi Wod dhanu.

²³ Anyong’a negwu i ceng’ maeno, wupor malu de ni mutoro: kum nen, sukulia mu dit i polo; kum kwaru migi timo kumeno ba jubila.

²⁴ Ento can i wiwu wu ju ma wulony! kum wumaku juk mu.

²⁵ Can i wiwu, wun ma wuyeng’ kawono! kum kec binegowu. Can i wiwu, wun ma wung’iero kawono! kum can binegowu man wubiywak.

²⁶ Can i wiwu, ka dhanu ceke biyero ber piwu! kum kwaru migi timo kumeno ba jubila mi ndra.

Maru Judegi

²⁷ Ento awacu iwu kumae, wu ju m’uwinjo, Wumar judegiwu, wutim ber ba ju m’udaguwu,

²⁸ wumi mugisa ni ju m’ulamuwu, wurwo pi ju m’uyenyowu ku rop.

²⁹ Ng’atu m’upadu thengi acel lok kurucel bende; ng’atu m’umayu jabia peri mi ire semisi peri bende.

³⁰ Mi ni dhanu ceke m’ukwei; ng’atu m’umayu piny peri de kud ilwong’ kendo.

³¹ Man calu wuyenyo nia dhanu gitim iwu, wutim igi bende kumeca.

³² Tek wumaru ju m’umaruwu, jufoyowu kum ang’o? kum cil judubo gimaru ju m’umarugi.

³³ Man tek wutimo ber ni ju m’utimo ber i beng’wu, jufoyowu kum ang’o? kum cil judubo gitimo kumeno.

³⁴ Man tek wumio banja ni ju ma wugeno nia wubigamu wang’e, jufoyowu kum ang’o? cil judubo mio banja ni judubo, kara gigam wang’e kendo.

³⁵ Ento wumar judegiwu, wutimgi ber, wumi banja, kud wugen nia wang’e dwog iwu; man sukulia mu bibedo dit, wun de wubibedo wot Ng’atu ma Malu Ngbir: kum e ber ni ju m’umbe foyofoc ku judubo bende.

³⁶ Kisa negwu, cil calu kisa nego Wegwu.

Pokolembe wi Jumange

³⁷ Kud wupok lembe, ka wun de jubipoko lembe mu ngo: kud wupok lembe rac, e ka wun de jubipoko lembe mu rac ungo: wuweki, e ka wun de jubiwekowu:

³⁸ wumi, e ka jubimio iwu; mukero ma ber, ma jucung’o ie, ma juyenge de, ma jukonjo pong’ hau, gibimio i korwu. Kum ku mukero ma wuporo ko jubiporo ko iwu bende.

³⁹ Man eyero lembabola bende igi kumae, Abinga copo telo wi abinga wadi? gin ario de gibipodho i vur ungo?

⁴⁰ Jalub sagu japonji pare ngo: ento ku ba dhanu nzu ka judwoke ndhu cu ebibedo calu japonji pare.

⁴¹ Nedi ineno ng’ili m’i wang’ umeru, ento ii pido ngo pi riu ma ni i weng’i ini?

⁴² Kadi icopo wacu ni umeru nenedi kumae, Umira, wek akab ng’ili ma ni i weng’i, kan ineno riu ma ni i weng’i in ungo? I won ambili, ilar iwodh riu kud i weng’i in, kan ibilund neno cu m’ikabu ko ng’ili kud i wang’ umeru.

Jung’eyo Yen ni kum Nyinge

⁴³ Kum yen ma ber umbe ma cego nyinge ma rac; kadok yen ma rac de mbe ma cego nyinge ma ber.

⁴⁴ Kum ku ba yen ceke ng’eire ni nyinge. Kum jupono nying ulam ungo ku kum ukudho, kadok nying ulok de jupono ngo ku kum ucok.

⁴⁵ Ng’atu ma ber kud i piny pare m’akana ma ber mir adunde ewodho maeno m’e ber; ng’atu ma rac de kud i piny pare m’akana ma rac ewodho maeno m’e rac: kum kud i sagri ma dit mir adunde dhoge yero.

Ka The Ot Ario

⁴⁶ Wulwong’a Rwoth, Rwoth, nedi ke wutimo gin m’awacu ngo?

⁴⁷ Ku ba dhanu ceke m’ubino i bang’a, m’uwinjo lem para de, man m’utimogi, abinyutho iwu ng’atu m’e cal kude:

⁴⁸ e calu dhanu m’ubegomo ot, m’ukunyo ng’om unyang’, man eporo kathere wi cana: man ka pi m’ucoro ng’om uwok, kulo dhongo ot maeno, man ecopo yenge ngo: kum ecungo wi cana.

⁴⁹ Ento ng’atu m’uwinjo, etimo de ngo, e calu ng’atu m’ugomo ot wi ng’om ma kathere mbe; ma kulo dhonge, e eni eni ode rwombre; man rwombrene bedo dit.