Luka 1 - The Holy Bible In Alur (Lur) Revised Orthography

Lembagora ni Theofilo

¹ Kum dhanu dupa giketho cing’gi nigoro lembe pi gin maeno m’utimbre kakare i kindwa,

² cil calu gimiogi iwa, ma kwong’a wa jumulembe ma ku wang’ man jutim mi lembe de,

³ e ebedo ber ira bende, kum abedo ku ng’eyong’ec mi gin ceke cu ugambre ku kwong’a, nia agor iri kubang’e kubang’e, Theofilo ma jabero;

⁴ kara ing’ei lemandha mi gin ma juponji kudo.

Junyutho pi Nyol pa Yohana ma Jabaputisi

⁵ I nindo pa Herode, ubimo mi Yahudi, nwang’u jalam ma nyinge Zakaria nuti, i maka pa Abia: man ebedo ku dhaku ma kind nyir pa Harun, nyinge de Elisabeth

⁶ Gin ario de gibedo pwe i wang’ Mungu, ma gibewotho i cik ku lembapoka ceke pa Rwoth umbe gin ma rac.

⁷ Man nyathin umbe kugi, kum Elisabeti mugumba, gin ario de rundi migi kadhu.

⁸ Nie etimbre, kinde m’etimo tic pa jalam maka pare kubang’e kubang’e i wang’ Mungu,

⁹ calu kura mi tic pa jalam, tic pare en e mondo i hekalu niwang’u udok ma ng’wice ng’ar.

¹⁰ Udul ceke mi dhanu berwo woko i saa mir udok ma ng’wice ng’ar.

¹¹ Malaika pa Rwoth uwok i bang’e ecungo yor acwic ba pemblam mir udok ma ng’wice ng’ar.

¹² Zakaria de cwinye ng’abre kan enene, lworo de make.

¹³ Ento malaika wacu ire kumae, Lworo kud unegi, Zakaria: kum kwac peri winjre, cegi Elisabeti binyolo iri nyathin ma nico, man ibilwong’o nyinge Yohana.

¹⁴ Man mutoro kud anyong’a binegi; dhanu dupa de anyong’a binegogi i munyuru pare.

¹⁵ Kum ebibedo dwong’ i wang’ Rwoth, man ebimadhu pigulok kadi giramadha ma mero jo de ngo; man Tipo Maleng’ birome, ugambre kud i min.

¹⁶ Man dhanu dupa mi nyithindho pa Israel ebiloko ni Rwoth Mungu migi.

¹⁷ Man ebicidho i wang’e i tipo ku tego pa Elia, niloko adunde wego ni nyithindho, juco de niwotho i rieko mi weg bedopwe; niyau dhanu m’ubedo ayika ni Rwoth.

¹⁸ Zakaria wacu ni malaika kumae, Abing’eyo maeni nenedi? kum an a ng’atu m’uti, dhaku para de rundi pare kadhu.

¹⁹ Malaika dwoko lembe ewacu ire kumae, An a Gabriel, ma cungo i wang’ Mungu; man juora niyero iri, nikelo iri rwonglembe maeni de.

²⁰ Nen, ibibedo ajuba ibicopo weco de ngo, cil i ceng’ ma gin maeni bitimbre i ie, kum iyio lem para ngo, ma bitimbre kakare i nindone.

²¹ Dhanu de gibekuro Zakaria, igi wang’ lii de kum egalu i hekalu.

²² Kan ewok woko de, ecopo weco i bang’gi ngo: e ging’eyo nia eneno ginmawokiwang’ i hekalu: man enyutho igi anyutha asu, ebedo ling’ de.

²³ Etimbre ka ceng’ mi timotim pare timbre kakare, edok i ot pare.

²⁴ E yo ng’ei ceng’ maeni Elisabeti ma dhaku pare gamu ie; epale de dwi abic, ewacu kumae,

²⁵ Rwoth utimo kumeno ira i ceng’ m’enena i ie, nikabu lewic para woko i kind dhanu.

Junyutho pi Nyol pa Yesu

²⁶ Nie i dwi mir abusiende juoro malaika Gabriel uai ba Mungu ucidho i adhura mi Galilaya, ma nyinge Nazareti,

²⁷ ba nyaku ma sumba ma ng’atu ma nyinge Yusuf ubenyome, ma en e mi ot pa Daudi; nyaku ma sumbane nyinge Mariamu.

²⁸ Emondo i bang’e, man ewacu kumae, Moth iri, in ma mugisa kwenyi, Rwoth ni kudi.

²⁹ Ento ie pido dit kum lembe maeni, ie de bepido ya moth maeni manedi.

³⁰ Malaika de wacu ire kumae, Lworo kud unegi, Mariamu: kum inwang’u bero ba Mungu.

³¹ Man nen, ibigamu ii, ibinyolo nyathin ma nico, man ibilwong’o nyinge Yesu.

³² Ebibedo dwong’, man jubilwong’e Wod Ng’atu ma Malu Ngbir: man Rwoth Mungu bimio ire komker pa kwarumire Daudi.

³³ Man ebicamu ker wi ot pa Yakobo mi nja; kajik mi ker pare de bibedo umbe.

³⁴ Mariamu wacu ni malaika kumae, Maeni bitimbre nenedi, ma k’ang’eyo co ngo e?

³⁵ Malaika dwoko lembe ewacu ire kumae, Tipo Maleng’ bibino i wii, man tego pa Ng’atu ma Malu Ngbir tipone biumi: kum kumeno bende gin maleng’ m’ibinyolo jubilwong’o Wod Mungu.

³⁶ Man nen, wat peri, Elisabeti bende gamu ie mi wode kan eti; maeni de dwi mir abusiende pa ng’atu ma julwong’o mugumba.

³⁷ Kum lembe moko mbe ma ai ba Mungu ma bibedo umbe tego.

³⁸ E Mariamu wacu kumae, Nen, an a bong’ pa Rwoth; dong’ ebed ira calu lembe peri. E malaika weke.

Mariamu Liewo Elisabeti

³⁹ E Mariamu ai i ceng’ maeno ecidho pio pio i ng’om gudi, i adhura mi Yahudi;

⁴⁰ man emondo i ot pa Zakaria emotho Elisabeti de.

⁴¹ Etimbre de, nia kan Elisabeti winjo moth pa Mariamu, mukere por malu i ie; Elisabeti de pong’ ku Tipo Maleng’;

⁴² man eting’o dwande malu ku ba dwal ma dit, ewacu kumae, Mugisa kwenyi kind mon, man mugisa ni nyodo m’i ii de.

⁴³ Man lembe m’unwang’a maeni ai kani, nia min Rwoth para bino i bang’a?

⁴⁴ Kum nen, ka dwand moth peri mondo i itha, mukere por malu i ia ni mutoro.

⁴⁵ Mugisa ni ng’atu m’uyio de; kum lembe m’uai ba Rwoth uyere ire bitimbre kakare.

Mariamu Yungo Rwoth

⁴⁶ Mariamu de wacu kumae, Ng’eyong’ec para beyungo Rwoth,

⁴⁷ Man anyong’a nego cwinya kum Mungu Jalarna.

⁴⁸ Kum eneno wi nok pa bong’ pare: Kum nen, ugambre kawono dhanum’utuk ceke gibilwong’a jamugisa.

⁴⁹ Kum ng’atu ma tek utimo ira gin ma dit; Nyinge de leng’.

⁵⁰ Kisa pare de bedo ni dhanum’utuk ku dhanum’utuk Wi ju m’ulwore.

⁵¹ Enyutho tego ku bote; Elalu jukuhaya ku lembe ma igi pido ku i adundegi.

⁵² Ejwigo juker kud i komker migi, Eting’o dhanu ma kitgi mbe malu.

⁵³ Eyeng’o ju ma kec unegogi ku gin ma ber; Man eketho julonyo gidok mananu.

⁵⁴ Ekonyo jatic pare Israel, Kara epoi kum kisa

⁵⁵ (Calu yang’ eyero ni kwaruwa) Ni Ibrahim ku nyikwaye rondo ku rondo.

⁵⁶ Man Mariamu gibedo gikude ma yenyo romo dwi adek, kan edok i ot pare.

Nyol pa Yohana ma Jabaputisi

⁵⁷ Nie nindo ma Elisabeti binyol i ie utimbre kakare: e enyolo nyathin ma nico.

⁵⁸ Man judhugola pare ku wat pare giwinjo nia Rwoth uketho kisa pare dit i bang’e; e anyong’a negogi dit gikugi.

⁵⁹ Etimbre i ceng’ mir aborane, nia gibino nitimo yaa kum nyathin; giyenyo gilwong’e Zakaria, calu nying won.

⁶⁰ Man min uloko lembe ewacu kumae, Kumeno ngo; ento jubilwong’e Yohana.

⁶¹ E giwacu ire kumae, Nying’ maeni mbe i kind wat peri.

⁶² E gitimo ku giranyutha ni won, maram eyenyo julwong’ ko nyinge.

⁶³ Man elwong’o waraga, egoro de kumae, Nyinge Yohana. E igi kpo wang’ lii.

⁶⁴ Ndhu ndhu nica dhoge yabre, lebe de gonjre, man eyero, ku mio mugisa ni Mungu de.

⁶⁵ E lworo maku dhanu ceke m’ubedo i vutgi: man lembe maeni ceke yik tir i ng’om gudi ceke mi Yahudi.

⁶⁶ Dhanu ceke m’uwinjogi gikanu lembene i adundegi, giwacu kumae, Ka kumeno nyathin mae bibedo ni ang’o? Kum cing Rwoth ni i bang’e.

Ewolembe pa Zakaria

⁶⁷ Zakaria ma won de Tipo Maleng’ urome ndhu, man eewo, ewacu kumae,

⁶⁸ Mugisa ni Rwoth, Mungu pa Israel; Kum eliewo dhanu pare etimo war de igi,

⁶⁹ Man eting’o tung mi both iwa I ot pa jatic pare Daudi

⁷⁰ (Calu eyero ku dhu jubila pare ma leng’ m’ugambre por con),

⁷¹ Ebodhowa ni judegiwa, kud i cing’ dhanu ceke m’udaguwa de;

⁷² Mi nyutho kisa ni kwaruwa, Man mi poi kum lembariba pare ma leng’;

⁷³ Kwong’ m’ekwong’o ni kwaruwa Ibrahim,

⁷⁴ Nia edwok iwa, wan ma waboth kud i cing’ judegiwa Ya watim ire ma lworo mbe,

⁷⁵ I leng’cwiny man bedopwe i wang’e i ceng’ mwa ceke.

⁷⁶ Eyo in de, nyathin, jubilwong’i jabila pa Ng’atu ma Malu Ngbir: Kum ibicidho i nyim wang’ Rwoth niyiko yo pare;

⁷⁷ Nimio ng’eyong’ec mi both ni dhanu pare I wek mi dubo migi,

⁷⁸ Kum kisa ma ng’ic pa Mungu mwa, Ni kum maeni rupiny m’uai malu biliewowa,

⁷⁹ Nirieny wi ju m’ubedo i mudho ku tipo mi tho; Niketho tiendwa woth i yo mi kwiocwiny.

⁸⁰ Nyathin udongo, cwinye de doko tek, ebedo i yamba de cil i ceng’ m’enyuthre ie ni Israel.