Lembrieko 6 - The Holy Bible In Alur (Lur) Revised Orthography

Cim pi Nyap ku Ndra

¹ Woda, tek idoko mukwatu ni jadhugola peri, Tek cingi ribre karacelo ku jawirok;

² Nwang’u uwic umeki kum lembe m’i dhogi, Nwang’u jumeki ku lembe m’i dhogi.

³ Tim maeni kawono, woda, man ibodhri giri Kum imondo i cing’ jadhugola peri: Cidhi, jwigri giri, man idwok cwiny jadhugola peri;

⁴ Kud iwek weng’i nindi, Kadi rip rip de kud umak biendweng’i;

⁵ Bodhri giri calu min ruda both kud i cing’ jadwar, Man calu winyo kud i cing’ jacikuwic.

⁶ Ci bang’ ukok, in i janyap; E pid pi yo pare, man ibedriek:

⁷ M’umbe rwoth, Nyapala, kadi jabim,

⁸ Eketho cemo ire i nindo mi ceng’, Man ecoko cemo pare i nindo mi mwoka.

⁹ Ibinindo rokani, E janyapi? Ibiai ku wang’ nindo peri awene?

¹⁰ Nindo ma nok, rip rip ma nok, Dolocing’ nyanok kara unindi;

¹¹ Kum kumeno canpiny peri bibino calu won ayeki, Man canpiny peri calu won jamtho.

¹² Ng’atu m’uwotho ku dhok mi co, En e ng’atu ma kite mbe, ng’atu ma won kier;

¹³ Ma mio wang’e, ma weco ku tiende, Ma nyutho ku lwete;

¹⁴ Ma lem ma kite mbe ni i adundene, Ma poro lembe ma rac thiri thiri, Ma thubo dhanu.

¹⁵ Ka kumeno ruvwa pare birube aruba; Ebitur ngik, man ma kabothne mbe.

¹⁶ Lembe abusiel ma Yehova dagu; Eyo, abiro ma en e ginmajudagu ire:

¹⁷ Wang’ mi kuhaya, leb mi ndra, Man cing’ ma cwiro rimo ma lembe mbe;

¹⁸ Adunde ma poro lembakece mi dubo, Tielo ma ringo pio kum lem ma rac,

¹⁹ Jamulembe mi ndra ma yero lemndra, Man ng’atu ma thubo kind umego. Cim pi Tarwang’

²⁰ Woda, wor lembang’ola pa wuru, Man kud iwek ponji pa meru:

²¹ Twigi thiri thiri kum adundeni; Twigi i ng’uti.

²² Kinde m’iwotho, ebitelo wii; Kinde m’inindo, ebikuri; Man kinde m’iceu, wubiweco wukude.

²³ Kum lembang’ola en e thala; man cik en e der; Man juk mi ponji en e yo mi kwo:

²⁴ Kara ugwoki ni dhaku ma rac, Ni lembe ma mit mananu mi dhu nyawirok.

²⁵ Kud iketh adundeni kum leng’kume. Kadok ku biendwang’e de kud iyi emeki.

²⁶ Kum ni kum dhaku ma won asara dhanu tundo kum kubegu; Man dhaku ma won dubriswa yenyo kwo ma pire tek.

²⁷ Ng’atu ma nico copo gamu mac i kore, Ma kendi pare kuwang’ ungo?

²⁸ Kadi ng’atu moko copo wotho wi cukmac ma lieth, Man tiende kuwang’ ungo?

²⁹ Ng’atu m’umondo wi ci jadhugola pare bedo kumeca; Ng’atu ma tek umulo kume bibedo mbe send ungo.

³⁰ Jucayu jakwo ngo, tek ekwalu kwo Kara uyeng’e kinde ma kec unege;

³¹ Ento tek jurube, ebidwoko wang’ abiro; Ebimio piny ceke m’i ot pare.

³² Ng’atu m’udubo dhaku nwang’u ng’eyothelembe mbe kude: Ng’atu m’utimo nwang’u enyotho ng’eyong’ec pare gire.

³³ Ebinwang’u lero ku lewic; Man jubiyweyo cac pare woko ngo.

³⁴ Kum nyeko en e kwinyo pa dhanu; Man ebiweko ngo i ceng’ mi culokwor.

³⁵ Ebiyio cul moko ngo; Kadi cwinye de bikwio ngo, kadok imio giramia dupa.