Lembrieko 3 - The Holy Bible In Alur (Lur) Revised Orthography

Juk mi Woro

¹ Woda, wii kud uwil kum cik para; Ento wek adundeni wor lembang’ola para:

² Kum gibimedo iri nindo m’ung’adu, Man rundi mi kwo, ku kwiocwiny.

³ Bedober ku lemandha kud uweki: Dhokgi i ng’uti; Kieugi wi ban mir adundeni:

⁴ Kum kumeno ibinwang’u bero man ng’eyothelembe ma ber I wang’ Mungu ku dhanu.

⁵ Gen Yehova kud adundeni ceke, Man kud ijengri kum ng’eyothelembe peri giri:

⁶ Ng’eye i yo peri ceke, Man ebinyutho yo peri.

⁷ Kud ibed riek i weng’i giri; Lwor Yehova, man iai i lembe ma rac:

⁸ Ebibedo kwo ni ii, Man mio ni cogoni.

⁹ Yung Yehova ku piny peri, Man kum mwoka mi nyai peri ceke;

¹⁰ Kum kumeno dero peri bip ong’ ku piny dupa, Man pany peri bithakni ku pigulok ma nyen.

¹¹ Woda, kud icai ponji mir ukede pa Yehova; Kadi kud iol ku juk pare:

¹² Kum ng’atu ma Yehova maru ejuke, Calu won nyathin juko wode m’emaru.

¹³ Ng’atu m’unwang’u rieko en e jamutoro, Man ng’atu m’unwang’u ng’eyothelembe.

¹⁴ Kum kuloka pare ber ma sagu kuloka mi mola ma tar, Man kulokane sagu mola ma kwar ma leng’.

¹⁵ Pire tek ma sagu kidi mi ruko ma kwar: Man gin moko mbe m’iyenyo ma copo pore kude.

¹⁶ Nindo m’ung’adu ni yo ku cinge ma yor acwic; Lonyo ku yung ni yo ku cinge ma yor acam.

¹⁷ Yo pare yo mi bero, Man yo pare ceke kwiocwiny.

¹⁸ En e yen mi kwo ni ju m’umaku kume: Ku ba dhanu ceke m’ucere i bang’e en e jamutoro.

¹⁹ Yehova timo ng’om ni kum rieko; Eketho polo cungo ni kum ng’eyothelembe.

²⁰ Ku ng’eyong’ec pare pi ma thuth ung’eny, Man polo vong’o thoi.

²¹ Woda, kud iyi giai kud i weng’i; Gwok rieko ma cu ku riu:

²² Kum kumeno gibibedo kwo ni ng’eyong’ec peri, Man bero ni ng’uti.

²³ Ibilund wotho i yo peri museme, Man tiendi bikier ungo.

²⁴ Kinde m’ivuto piny, lworo binegi ngo: Eyo, ibivuto piny, man nindo peri bibedo mit.

²⁵ Kud ilwor lworo ma vur vur, Kadok nyoth mi judubo, kinde m’ebino:

²⁶ Kum Yehova bibedo genogen peri, Man ebigwoko tiendi kara ku jumake.

²⁷ Kud icer bero ni ju m’emakugi, Kinde m’eni i tego mi cingi m’itime ko.

²⁸ Kud iwac ni jadhugcla peri kumae, Cidhi, man ibin kendo, Man urwo abimio; Kinde m’enuti kudi.

²⁹ Kud ipor lembe ma rac kum jadhugola peri, Kum ebedo museme i vuti.

³⁰ Kud ibed ku lembe ku ng’atu moko ma there mbe, Tek etimi rac ungo.

³¹ Kumira kud unegi kum jarop, Man kud ifoi yo pare moko.

³² Kum ng’atu ma kit lembe pare mbe en e ginmajudagu i wang’ Yehova; Ento lembapora pare ni ku ju m’atira.

³³ Kwong’ pa Yehova ni i ot pa jadubo; Ento emio mugisa kum kabedo mi ju ma pwe.

³⁴ Andha ecayu jucac; Ento emio bero ni ju ma mol.

³⁵ Jurieko binwang’u dwong’ ni aba; Ento dodri mi jukusegu bibedo ni lewic.