Lembrieko 28 - The Holy Bible In Alur (Lur) Revised Orthography

Judubo ku Jubero

¹ Ng’atu ma rac ringo ka ng’atu moko mbe m’urieme; Ento ng’atu ma pwe bedo ku tegocwiny pamir umvor.

² Ni kum kier mi ng’om judongomawijone gi dupa; Ento ni kum dhanu ma weg ng’eyothelembe ku ng’eyong’ec nindo mi bedone bimedre.

³ Ng’atu ma jacanpiny ma sendo dhanu ma sai E calu koth ma core ma weko cemo ngo.

⁴ Ju m’uweko cik nwang’u gipaku judubo; Ento ju m’uworo cik nwang’u gipiembri kugi.

⁵ Dhanu ma rac ng’eyo lembapoka ngo; Ento ju m’uyenyo Yehova ging’eyo gin ceke.

⁶ Jacan ma wotho i bedocu pare e ber, Sagu ng’atu ma kite mbe i yo pare, kadok elony.

⁷ Ng’atu ma tek woro cik nwang’u en e wodo ma riek; Ento ng’atu ma jarimb jumbo nyayu lewic wi won.

⁸ Ng’atu ma raedo piny pare ku kuloka man nyai, Ecoke pi ng’atu ma ngisi nege kum jucan.

⁹ Ng’atu ma loko ithe cen kum winjo cik, Cil rwo pare en e ginmajudagu.

¹⁰ Ng’atu ma tek uketho ng’atu m’atira kier i yo ma rac, Ebipodho gire i vur pare; Ento ju ma cu gibibedo ku bero ni musolu.

¹¹ Ng’atu m’ulony e riek i wang’e gire; Ento jacan ma won ng’eyothelembe yenye.

¹² Kinde ma ju ma pwe sagu, dwong’ ma dit nuti; Ento kinde ma judubo wodhri, dhanu pondo.

¹³ Ng’atu ma umo kier pare lembe pare bibedo miero ngo; Ento ng’atu ma tek utuco man ewekogi ebinwang’u kisa.

¹⁴ Ng’atu ma lworo nege thiri thiri en e jamutoro; Ento ng’atu m’udwoko adundene nwang’ ebipodho i ruvwa.

¹⁵ Calu umvor ma rundo, ku wai m’urwokni, E jabim ma rac ubedo kumeno wi dhanu ma sai.

¹⁶ Jaditmawijo ma ng’eyothelembe mbe kude e jasend ma dit bende; Ento ng’atu m’udagu ketho cwiny hai kum piny ebimedo nindo pare.

¹⁷ Ng’atu ma ter mi rimo pa ng’atu moko ni i wie Ebiringo i vur; ng’atu moko kud ucere.

¹⁸ Ng’atu ma tek uwotho atira biboth; Ento ng’atu ma kite mbe i yo pare bipodho pio.

¹⁹ Ng’atu m’ufuro podho pare ebidhir ku kwen; Ento ng’atu ma lubo ng’atu ma kite mbe ebibedo ku canpiny ma rome.

²⁰ Ng’atu ma won bedo mandha bisagre ku mugisa; Ento ng’atu m’urikni kara elony bibedo mbe send ungo.

²¹ Bedo tung’ tung’ i wang’ jo e ber ungo; Kum dhanu bikier pi ng’et kwen.

²² Ng’atu ma won wang’ ma rac rikni kum lonyo, Man eng’eyo ngo nia canpiny biwok i wie.

²³ Ng’atu ma juko dhanu yo ku ng’eye ebinwang’u bero kendo Sagu ng’atu ma yero lem ma mit mananu ku leb.

²⁴ Ng’atu ma tek uyaku won kadi min, man m’uwacu kumae, En e kier ungo, Ng’atuca en e wadi janyoth.

²⁵ Ng’atu ma en e won ketho cwiny ma dit kum piny nyayu piem; Ento ng’atu ma ketho genogen pare ba Yehova jubiketho ecwe.

²⁶ Ng’atu ma geno adundene gire en e jakasegu; Ento ng’atu ma tek wotho ku rieko, ebigonjre.

²⁷ Ng’atu ma mio ni jucan, piny birem ire ngo; Ento ng’atu ma panu wang’e binwang’u kwong’ dupa.

²⁸ Kinde ma judubo wodhri, dhanu pondo; Ento ka ginyothri, ju ma pwe nyai.