Lembrieko 27 - The Holy Bible In Alur (Lur) Revised Orthography

¹ Kud iheri giri pir urwo; Kum ing’eyo ngo gin ma ceng’ acel bikelo.

² Wek ng’atu mange peki, dhogi giri re ngo; Jawirok, man dendhogi giri re ngo.

³ Kidi pek, man kwio de pek; Ento kwinyo pa jakasegu pek ma sagu gin ario de.

⁴ Kwinyo bedo ku rop, man ng’ecwiny e dit; Ento ng’a ma copo cungo wang’ nyeko?

⁵ Juk ma ngbeng’ e ber Sagu mer m’aponda.

⁶ Lero pa jarimo en e mandha; Ento cwiolimb pa jadegi e dupa m’usagu.

⁷ Ng’eyong’ec m’uyeng’ nyono pedekic; Ento gin ma kec ceke mit ni ng’eyong’ec ma kec unege.

⁸ Calu winyo ma kier ku i uthac pare, Ng’atu ma kier ku i kakare bedo kumeca.

⁹ Mo ku gin ma ng’wice ng’ar nyayu mutoro i adunde; Mido mi jurimb dhanu ma ai ba lembapora mi berocwiny timo kumeca.

¹⁰ Kud ikun jarimbi ma dhe, ku jarimb wuru; Man kud icidh ba ot p’umeru i nindo mi ruvwa peri: Jadhugola ma ceng’ni e ber sagu umego ma ni bor.

¹¹ Woda, bed riek, man nyai mutoro i adundena, Kara alok lembe ni ng’atu m’ucaya.

¹² Ng’atu ma won pidoic neno lembe ma rac, man epondo; Ento ju ma cobo gikadhu, man gisendri pire.

¹³ Mak kendi pa ng’atu ma mukwatu pa jawirok; Man ng’atu ma en e mukwatu pa dhaku ma nyawirok gamu mukwatu i bang’e.

¹⁴ Ng’atu ma mio mugisa ni jarimbe ku dwande ma tek, m’eai ko pir kugweno, Jubikwane ni kwong’ ire.

¹⁵ Kuzumbi Ku dhaku ma jadhau en e acel:

¹⁶ Ng’atu m’uyenyo ecere nwang’u ecero yamu; Man cinge ma yor acwic rombo ku mo.

¹⁷ Nyunyu paku nyunyu; Dhanu de paku wang’ jarimbe kumeca.

¹⁸ Ng’atu m’ugwoko yendubolo ebicamu nyinge; Man ng’atu ma ketho cwinye kum jadit pare jubiyunge.

¹⁹ Calu wang’ lokre ba wang’ i pi, Adunde dhanu de yo ba dhanu wadi kumeca.

²⁰ Liel ku Nyoth giyeng’ ki ngo; Man wang’ dhanu yeng’ ki ngo.

²¹ Agulu mi lwok mi mac en e mi mola ma tar, man uka en e mi mola ma kwar; Man jumulo i dhanu ni kum pak pare.

²² Kadok iod jakasegu i pany ku nyathi pany karacelo ku cam ma juodo, De kasegu pare biai ungo kud i kume.

²³ Bed kud amora m’ing’ei ko maram udul rombe peri bedo ko, Man inen kum udul lim peri cu:

²⁴ Kum lonyo en e mi nja ngo; Man jamkermiwic bedo cil kum dhanum’utuk ceke?

²⁵ Lum m’uthwo jugamu, e lum ma numu nyuthre, Man jucoko uboko mi gudi juroyo.

²⁶ Nyithi rombe en e mi kendi peri, Man diegi gi wel piny mi podho;

²⁷ Man cag diegi bibedo nuti ma romo cemo peri, mi cemo mi juodi, Man cemo mi bong’ peri.