Biblia Todo Logo
Bìoball air-loidhne

- Sanasan -

Lembrieko 26 - The Holy Bible In Alur (Lur) Revised Orthography

1 Calu pei i nindo mi ceng’, man calu koth i nindo mi palacam, E kumeno yung umaku jakasegu ngo.

2 Calu kira i woth pare, calu ugwelo i ringo pare, E kwong’ ma lembe mbe de wok ungo kumeca.

3 Del pi riuni, gwang’ pi kana, Man dul pi ng’ei jukusegu.

4 Kud ilok lembe ni jakasegu calku kasegu pare, Imaru bedo calkude.

5 Lok lembe ni jakasegu calku kasegu pare, Emaru bedo riek i wang’e gire;

6 Ng’atu m’uoro lembe ku cing’ jakasegu Nwang’u ethumo tiende gire woko, man emadhu lem ma rac.

7 Tiend won abala lekele; Lembabola bedo kumeno i dhu jukusegu.

8 Calu ng’atu m’utwio kidi i jungbe, Ng’atu ma mio yung ni jakasegu bedo kumeno.

9 Calu ukudho ma cobo cing andrej kong’o, E lembabola bedo kumeno i dhu jukusegu.

10 Calu won atum ma kilo gin ceke, E ng’atu ma lonyo jakasegu ku ng’atu ma lonyo ju m’ukadhu akadha de bedo kumeno.

11 Calu gwok ma dwogo ba ng’ok pare, E jakasegu ma timo kasegu pare kendo bedo kumeca.

12 Ineno ng’atu moko riek i wang’e gire? Geno jakasegu sagu geno ng’atuca.

13 Janyap wacu kumae, Umvor ni i yo; Umvor ni i gengi.

14 Calu dhugola wire wi jamtwicne, E janyap lokre kumeca wi kavuto pare.

15 Janyap umo cinge i tabu; Kele i dhoge kendo oie.

16 Janyap riek i wang’e gire Sagu dhanu abiro ma wodho thelembe.

17 Ng’atu m’ukadhu akadha, m’emondo de i dhau ma pare ngo, E calu ng’atu m’umaku gwok ku ithe.

18 Calu abelu m’ubayu dhumac, Man athero, ku tho,

19 Ng’atu ma bombo jadhugola pare bedo kumeca, Man ewacu kumae, Atimo tuko ngo?

20 Kum can yen mac tho; Man ka ma jayernying’ umbe i ie, dhau thum.

21 Calu cuk ubedo ni bilo, man yen ni mac, E ng’atu m’umaru dhau ubedo kumeca kara edheth ali.

22 Lembe pa jayernying’ e calu cam ma mit, Man giloro piny i ic.

23 Dendhok ma kud amora man adunde ma rac Gi calu agulu mir ulobo ma jumwono ku ceth mola ma tar.

24 Ng’atu m’udagu elokre ku dendhoge; Ento ekanu abombi yor i ie:

25 Kinde m’eyero lembe ber, kud iyie; Kum ginmajudagu abiro ni i adundene:

26 Kadok adegi pare umbre kud abombi, Dubo pare binyuthre ngbeng’ i wang’ cokri.

27 Ng’atu ma tek utong’o vur bipodho i ie; Man ng’atu m’ung’ielo kidi, ebidwogo i wie.

28 Leb mi ndra dagu ju m’etimogi rac; Man dhok ma mit mananu rebo nyoth.

The Holy Bible In Alur (Lur), Revised Orthography © United Bible Societies, 1970.

Bible Society of the Democratic Republic of Congo
Lean sinn:



Sanasan